އަލްބޭނިއާ ކައިރިން ލިބުނު މޮޅާއެކު، ސްޕަލެޓީ އަށް ހަމަޖެހުމެއް

ޖަރުމަނުގައި ކުރިއަށްދާ ޔޫރޯ ފުޓުބޯޅަ މުބާރާތުގެ ފުރަތަމަ މެޗުގައި އަލްބޭނިއާއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން އިޓަލީ އަށް ލިބުނު މޮޅާއެކު، ހިތްހަމަ ޖެހުމެއް ލިބިއްޖެ ކަމަށް އެ ޓީމުގެ ކޯޗު ލޫސިއާނޯ ސްޕަލެޓީ ބުނެފި އެވެ.

އަލްބޭނިއާއާ ދެކޮޅަށް ކުޅުނު މެޗު އިޓަލީން ކާމިޔާބު ކުރީ، ފަހަތުން އަރަ އެވެ. އެއީ މެޗު ފަށައިގެން ފުރަތަމަ މިނެޓުގައި އަލްބޭނިއާ އިން ލަނޑު ޖަހައި، ލީޑު ނަގާފައި ވަނިކޮށެވެ. އިޓަލީން ވަނީ ގާތް ގާތުގައި ދެ ލަނޑު ޖަހައިފަ އެވެ.

މެޗަށްފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ސްޕަލެޓީ ބުނީ، މެޗުގައި އޭނާ އަށް ފެނުނީ އިޓަލީގެ ކުޅުންތެރިން ވަރަށް ބޮޑަށް މަސައްކަތް ކުރި މަންޒަރު ކަމަށާއި، މެޗުން މޮޅުވާން ކުޅުންތެރިން ބޭނުންވެފައި ތިބި މިންވަރު ވެސް ފެނުނު ކަމަށެވެ.

ޚާއްސަކޮށް މެޗުގައި އަލްބޭނިއާ އިން ލަނޑު ޖަހާ ލީޑު ނަގާފައި ވަނިކޮށް، އިޓަލީން ފަހަތުން އަރައި ދެ ލަނޑު ޖެހުން ވެގެން ދިޔައީ، މުޅި މެޗު އެ ޓީމު ކޮޅަށް އެނބުރު ސަބަބެއް ކަމަށް ވެސް ސްޕަލެޓީ ވަނީ ބުނެފަ އެވެ. އޭނާ ބުނީ މެޗުގައި އަލްބޭނިއާ އަށް ނުރައްކާ ކުރެވޭނެ ގިނަ ފުރުސަތުތަކެއް އިޓަލީ އަށް ލިބުނު ކަމަށެވެ.

މީގެ އިތުރުން ސްޕަލެޓީ ބުނީ، ކުރިއަށް އޮތް ދެ މެޗަކީ ގްރޫޕް ސްޓޭޖުގައި އިޓަލީން އެންމެ ބޮޑަށް ވިސްނަން ޖެހޭ ދެ މެޗު ކަމަށެވެ. މުބާާރާތުގައި އިޓަލީން ފުރަތަމަ އަމާޒަކީ ގްރޫޕް ސްޓޭޖު ފަހަނައަޅާ ދިޔުން ކަމަށް ވާއިރު، އެކަން ކުރެވޭނެ ކަމުގެ ބޮޑު ޔަގީންކަމެއް ލިބިއްޖެ ކަމަށް ވެސް ސްޕަލެޓީ ވަނީ ބުނެފަ އެވެ.

ސްޕަލެޓީ ފާހަގަ ކުރި ގޮތުގައި އިޓަލީގެ ކުޅުންތެރިން މެޗު ތެރެއަށް ރަނގަޅަށް ވަދެ، ކުޅުމުން އަންނައިރު، ހަމަ ޖެހިލައިގެން މެޗު ބަލަން ހުރެވޭ ކަމަށެވެ. އަދި އޭނާގެ ކުޅުންތެރިންނަކީ ވަރަށް ރަނގަޅަށް މަސައްކަތް ކުރާ ބައެއް ކަމަށާއި، މުބާރާތުގެ ފޭވަރިޓުންނަށް ނުވި ނަމަވެސް، އިޓަލީ އަށް ކުރިއަށް ދެވޭނެ ކަމަށް ސްޕަލެޓީ ވަނީ ބުނެފަ އެވެ.

މުބާރާތުގެ ގްރޫޕް ސްޓޭޖުގައި އިޓަލީގެ ދެ ވަނަ މެޗުގައި އެ ޓީމު ނިކުންނާނީ ސްޕެއިންއާ ދެކޮޅަށެވެ.