ސްޓޫޑެންޓް ލޯން ލިބުނު ފަރާތްތަކަށް ސްޕޮންސަރ ލެޓަރ ހަވާލުކުރުން ބުރާސްފަތި ދުވަހު
މި އަހަރުގެ ލޯނު ސްކީމް މިހާތަނަށް ސެލެކްޓް ވެފައިވާ ދަރިވަރުންގެ އަދަދަކީ 1015
ގައުމީ ޔުނިވަރސިޓީގައި ކިޔަވަމުން އަންނަ ނަރސިންގ ސްޓޫޑެންޓުން
ސްޓޫޑެންޓް ލޯން ލިބުނު ފަރާތްތަކަށް، ބުރާސްފަތި ދުވަހު ސްޕޮންސަރ ލެޓަރ ހަވާލުކުރާނެކަމަށް ހަަޔަރ އެޑިއުކޭޝަން މިނިސްޓްރީން ބުނެފިއެވެ.
ހަޔަރ އެޑިއުކޭޝަން މިނިސްޓްރީން ވަނީ ސްޓޫޑެންޓް ލޯނަށް ކުރިމަތިލި ދަރިވަރުންގެ ތެރެއިން ޝަރުތު ފުރިހަމަވާ ދަރިވަރުންގެ މައުލޫމާތު ހާމަކޮށްފައެވެ. އެގޮތުން ހުޅުވާލި 500 ފުރުސަތަށް 1709 އެޕްލިކޭޝަން ލާފައިވާއިރު، މީގެ ތެރެއިން ކޮލިފައިވީ 1153 ދަރިވަރުންނެވެ. އަދި ކުރީ ސަރުކާރުންވެސް ނިންމި ގޮތަށް ޝަރުތު ފުރިހަމަވާ ހުރިހާ ދަރިވަރުންނަށް ލޯން ދިނުމަށް މިފަހަރުވެސް ވަނީ ނިންމާފައެވެ.
ހަޔަރ އެޑިއުކޭޝަން މިނިސްޓްރީން ބުނީ މި އަހަރުގެ ލޯނު ސްކީމް މިހާތަނަށް ސެލެކްޓް ވެފައިވާ ދަރިވަރުންގެ އަދަދަކީ 1015 ކަމަށެވެ. އަދި މި ދަރިވަރުންނަށް 13 ޖޫން 2024 ވަނަ ދުވަހު ލޯނަށް ހޮވިފައިވާ ކަމުގެ "ސްޕޮންސަރ ލެޓަރ" ލިބިގެންދާނެ ކަމަށެވެ.
މީގެ އިތުރުން ޕައިލެޓް ލައިސެންސް ސްލޮޓްގެ އިއުލާންކުރެވިފައިވަނީ ވަގުތީ ނަތީޖާ ކަމަށާއި، އެހެނިހެން ސްލޮޓްތަކުގެ ސެލެކްޓް ވެފައިވާ ދަރިވަރުންގެ ދާއިމީ ނަތީޖާ ފެންނަން ހުންނާނެ ކަމަށެވެ. އަދި ފައިލެޓް ލައިސެންސްގެ ސްލޮޓަށް ކުރިމަތިލީ ފަރާތްތަކުގެ ވަގުތީ ނަތީޖާ ލިބެން ހުންނާނީ މިނިސްޓްރީގެ ވެބްސައިޓުން ކަމަށާއި، އެހެނިހެން ސްލޮޓްތަކަށް ކުރިމަތިލީ ފަރާތްތަކުގެ ނަތީޖާ ލިބެން ހުންނާނީ މިނިސްޓްރީގެ "މައި އެޑިޔު ޕޯޓަލް" އިން ކަމަށެވެ.
ނަތީޖާގައި ޑިސްކޮލިފައިވި ދަރިވަރުން ޑިސްކޮލިފައިވި ސަބަބު ބަޔާން ކޮށްފައިވާނެ ކަމަށާއި، ނަތީޖާ އާއި މެދު ޝަކުވާ ހުށަހެޅުމުގެ މުއްދަތު 11 ޖޫން 2024ން 25 ޖޫން 2024ށް ހުޅުވާލާފައިވާއިރު، އީމެއިލް މެދުވެރިކޮށް ޝަކުވާ ހުށަހެޅުމަަށް ވަނީ އެދިފައެވެ.
ފާއިތުވެދިޔަ އަހަރު، 500 އަށްވުރެ ގިނަ ދަރިވަރުންނަށް ރާއްޖެއިން ބޭރުން ޕައިލެޓް ލައިސެންސަށް ކިޔެވުމަށް ލޯނު ދީފައިވެއެވެ. އަދި އެހާ ގިނަ ފުރުސަތު، އެއް ދާއިރާއަކުން ކިޔެވުމަށް ދީފައިވުމުގެ ސަބަބުން ދަރިވަރުންނާއި، ބެލެނިވެރިންނާއި، ކަމާ ބެހޭ އެކިއެކި އިދާރާތަކުން ގިނަގުނަ ޝަކުވާތަކާއި ކަންބޮޑުވުންތައް މިނިސްޓްރީއާ ހިއްސާކޮށްފައިވާ ކަމަށް ވެސް ހަޔަރ އެޑިއުކޭޝަނުން ބުނެއެވެ. އަދި ދަރިވަރުންނަށް ޕްލޭސްމަންޓާއި ވިސާ ލިބުމުގައި ވަރަށް ބޮޑެތި ގޮންޖެހުންތައް ކުރިމަތިވަމުންދާ ކަމަށާއި، ހަމަ އެއާއެކު މިހާ ގިނަ ދަރިވަރުނަތަކެއް އެއްފަހަރާ އެއް ދާއިރާއަކުން ކިޔަވައި ނިމިގެން އައުމުން ވަޒީފައި ހޯދުމުގައި ދަތިތަކާ ކުރިމަތިލާންޖެހުމަކީ އެކަށީގެންވާ ކަމެއްކަމަށް ޓްރާންސްޕޯޓް މިނިސްޓްރީންނާއި ކަމާ ގުޅޭ އެހެނިހެން އިދާރާތަކުން ލަފާކޮށް ކަންބޮޑުވުން ފާޅުކޮށްފައިވާ ކަމަށް ވެސް ހަޔަރ އެޑިއުކޭޝަން މިނިސްޓްރީން ބުނެއެވެ.
އެހެންކަމުން، މި އަހަރު ޕައިލެޓް ލައިސެންސަށް ކިޔެވުމަށް ލޯނުދޭން ހުޅުވާލީ އެންމެ 10 ފުރުސަތު ކަމަށާއި، އެއީ ރާއްޖޭގެ ފްލައިންގ ސްކޫލްގައި ކިޔެވުމަށް ކަމަށް ހަޔަރއެޑިއުކޭޝަނުން ބުނެއެވެ. އަދި މި ސްލޮޓަށް ޝަރުތުހަމަވާ 148 އެޕްލިކޭޝަން ލިބިފައިވީނަމަވެސް ކުރިން ފާހަގަކުރި ކަންކަމާއި ރާއްޖޭގައި ހުރި ޕައިލެޓް ތަމްރީނު ދޭ މަރުކަޒުގެ ކެޕޭސިޓީއަށް ރިޢާޔަތްކޮށް މިނިސްޓްރީން ނިންމާފައިވަނީ ޕައިލެޓް ލައިސެންސައަށް ކިޔެވުމަށް އިޢުލާނުގައި ސްލޮޓް ކަނޑައެޅިފައިވާ އަދަދަށް، މެރިޓް އުސޫލުން އެންމެމަތިން މާކްސް ހޯދާ 10 ދަރިވަރުންނަށް އެ ފުރުސަތުދިނުމަށެވެ.
މި ފުރުސަތައް އެދި ހުށަހަޅާފައިވާ ދަރިވަރުންގެ ތެރެއިން، ޝަރުޠު ހަމަވާ އެހެން ހުރިހާ ދަރިވަރުން، މިއަހަރު އިއުލާންކޮށްފައިވާއި ދާއިރާތަކާއި ސްލޮޓްތަކުގެ ތެރެއިން އެދަރިވަރަކު ޝަރުތުހަމަވާ ސްލޮޓަކަށް ބަދަލުވުމުގެ އިހްތިޔާރު ދިނުމަށް ވެސް ވަނީ ނިންމާފައެވެ.
