އައިސްލެންޑުން އިންގްލެންޑު ބަލިކޮށްފި

ބައިނަލްއަޤުވާމީ ރަޙުމަތްތެރިކަމުގައި އިންގްލެންޑާ ދެކޮޅަށް ކުޅުނު މެޗުން އައިސްލެންޑް މޮޅުވެއްޖެ އެވެ.

މިއީ މި މަހު ޖަރުމަނުގައި ފަށާ ޔޫރޯ ފުޓުބޯޅަ މުބާރާތަށް ތައްޔާރުވުމުގެ ގޮތުން ކުޅުނު ރަޙުމަތްތެރިކަމުގެ މެޗެކެވެ. އިންގްލެންޑުގެ ވެމްބްލީ ސްޓޭޑިއަމްގައި ކުޅުނު މެޗުން އައިސްލެންޑް މޮޅުވީ 1-0ންނެވެ.

މެޗުގައި ރަނގަޅަށް ކުޅުނީ އިންގްލެންޑެވެ. މެޗުގައި އިންގްލެންޑަށް ލަނޑު ޖަހާނެ ރަނގަޅު ފުރުސަތުތަކެއް ލިބުނު ނަމަވެސް، އެ ޓީމަށް އެއްވެސް ފުރުސަތެއްގެ ބޭނުމެއް ނުހިފުނެެވެ. މެޗުގައި އައިސްލެންޑުން ލަނޑު ޖަހާފައި ވަނީ ފުރަތަމަ ހާފުގަ އެވެ. މެޗު ފަށައިގެން 12 ވަނަ މިނެޓުގައި އެ ޓީމަށް ލީޑު ނަގައިދިނީ ޖޯން ޑަގޫ ޕޯސްޓެއިންސަން އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ހާކޮން އާނާ ހެރާލްޑްސަން އެވެ.

ޔޫރޯ އަށް ތަައްޔާރުވުމުގެ ގޮތުން އިންގެލެންޑުން ވަނީ ރަޙުމަތްތެރިކަމުގެ ދެ މެޗު ކުޅެފަ އެވެ. ފުރަތަމަ މެޗުގައި ބޮސްނިއާ އަތުން މޮޅުވި ނަމަވެސް، ދެ ވަނަ މެޗުގައި އައިސްލެންޑު އަތުން ބަލިވީ އެވެ.

ޔޫރޯ މުބާރާތުގެ ގްރޫޕް ސްޓޭޖުގެ ފުރަތަމަ މެޗުގައި އިންގްލެންޑުން ސާބިއާއާ ދެކޮޅަށް ނިކުންނާނީ މި މަހުގެ 17 ވަނަ ދުވަހު އެވެ. އޭގެ ތިން ދުވަސް ފަހުން ދެ ވަނަ މެޗުގައި ނިކުންނާނީ ޑެންމާކާ ދެކޮޅަށެވެ. ގްރޫޕް ސްޓޭޖުގެ ފަހު މެޗުގައި 26 ވަނަ ދުވަހު ނިކުންނާނީ ސްލޮވޭނިއާއާ ދެކޮޅަށެވެ.