ޕާޓޭން ވަންނަ ކަމަށް ބުނެ، ސަލްމާން މިސްކިތް ރޭގަނޑު 9:00ގައި ބަންދުކުރަން ފަށައިފި
މިސްކިތުގެ ހޯލުތައް ބަންދުކުރި ނަމަވެސް ނަމާދު ކުރާ ބައި ބަންދުކުރުމަކީ ބަލައިގަނެވޭނެ ކަމެއް ނޫން
ސަލްމާން މިސްކިތް ބަންދުކޮށްފައި ހުރުމުން ސިޑިކައިރީގައި މީހަކު ނަމާދުކުރަނީ
ކިންގް ސަލްމާން މިސްކިތް ނަމާދުކުރާ ބަޔާއެކު ރޭގަނޑު 9:00ގައި ބަންދުކުރަން ފަށައިފިއެވެ.
މިސްކިތުގައި ކިޔަންވަން ތިބި ދަރިވަރުންތަކެއް ރާއްޖެއެމްވީއަށް ބުނީ މިސްކިތް ރޭގަނޑު 9:00 ގައި ބަންދުކުރާ ކަމަށެވެ. އަދި ފިރިހެނުން ނަމާދު ކުރާ ބަޔާއި، އަންހެނުން ނަމާދު ކުރާ ބަޔަަށް ވެސް ނުވަދެވޭ ގޮތަށް ތަޅުލާ ކަމަށެވެ. މިގޮތަށް މިކަން ކުރާތާ ދުވަސްތަކެއް ވެފައިވާ ކަމަށާއި، މިސްކިތް ބަންދުކުރާތީ އުދަނގޫތަކާ ކުރިމަތިވާ ކަމަށް އެދަރިވަރުން ބުނެފައިވެއެވެ.
މިސްކިތުގެ ހޯލުތައް ބަންދުކުރި ނަމަވެސް ނަމާދު ކުރާ ބައި ބަންދުކުރުމަކީ ބަލައިގަނެވޭނެ ކަމެއް ނޫން ކަމަށާއި، އެއީ ވަރަށް ދެރަ ކަމެއް ކަމަށް ދަރިވަރުން ބުނެފައިވެއެވެ. އެދަރިވަރުން ބުނިގޮތުގައި މިސްކިތް ބަންދުކުރާ ފަހުން ވެސް ވަރަށް ގިނަ މީހުން މިސްކިތަށް ވަނުމަށްފަހު ނަމާދުނުކޮށް ދާންޖެހެއެވެ.
ސަލްމާން މިސްކިތުގެ ސެކިއުރިޓީއާ ހަވާލާދީ އެދަރިވަރުން ބުނެފައިވަނީ މިސްކިތް ބަންދުކުރަނީ ޕާޓޭން މިސްކިތަށް ވަންނާތީ ކަމަށާއި، މިސްކިތުގެ ތަކެއްޗަށް ގެއްލުން ދޭތީ ކަމަށެވެ. ނަމަވެސް މިއީ މައްސަލައިގެ ހައްލު ނޫން ކަމަށާއި، ނަމާދުކުރެވޭ ބަޔަށް ވަދެވެންޖެހޭ ކަމަށް އެދަރިވަރުން ބުނެފައިވެއެވެ.
މިދިޔަ ރަމަޟާން މަހު ވެސް ރޭގަނޑު ތަރާވީސް ނަމާދަށްފަހު މިސްކިތް ބަންދުކުރާ މައްސަލަ ފެންމެތިވެގެން ދިޔައެވެ. ނަމަވެސް އޭރު އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވީ ސަލްމާން މިސްކިތުގެ ނަމާދުކުރާ ބައި ބަންދުނުކުރާ ކަމަށާއި، އެ ވަގުތު ބަންދުކޮށްފައިވަނީ ކާޕެޓްގެ މަސައްކަތްތަކެއް ކުރާތީ ކަމަށެވެ.
މިހާރު ކިންގް ސަލްމާން މިސްކިތް ރޭގަނޑު 9:00ގައި ބަންދުކުރަން ފަށާފައިވާ މައްސަލައާ ގުޅޭގޮތުން އިސްލާމިކް މިނިސްޓްރީގެ ބަހެއް ވަނީ ލިބޭ ގޮތް ނުވެފައެވެ. މިނިސްޓްރީގެ މީޑީއާ އޮފިޝަލަށް ގުޅައި، މެސެޖް ކުރި ނަމަވެސް ޖަވާބެއް ދެއްވާފައިނުވެއެވެ.
ކިންގް ސަލްމާން މިސްކިތް ހުޅުވައި ނަމާދު ކުރަން ފަށާފައިވަނީ 1 އޭޕްރިލް 2022 ގައެވެ. މިއީ ސައޫދީ ސަރުކާރުން ބޮޑު ހޭދައެއް ކޮށްގެން ބިނާކޮށްފައިވާ މިސްކިތެކެވެ.
