ކިންގ ސަލްމާން މިސްކިތަށް އަދިވެސް އިތުރު މުވައްޒަފުން ބޭނުންވާ ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވެއްޖެއެވެ.

ރާއްޖެއެމްވީއަށް މައުލޫމާތު ދެއްވަމުން އިސްލާމިކް މިނިސްޓަރު ވިދާޅުވީ, އިތުރަށް ނެގި ހަތަރު މުވައްޒަފުންނާއެކު ޖުމްލަ 10 މުވައްޒަފުން މަސައްކަތު މީހުންގެ ގޮތުގައި ނަގާފައިވާ ކަމަށެވެ.

މަސައްކަތު މީހުން ޖުމްލަ 20 މީހުން ބޭނުންވާނެ ކަމަށާއި އެ ތަން ބޮޑުވުމުން، ހުކުރު ދުވަހު އިސްލާމީ މަރުކަޒު ފޮޅާ ސާފުކުރާ ފަދައިން ސަލްމާން މިސްކިތް ވެސް ދޮވެ، ފޮޅާ ސާފު ކުރަން ޖެހޭނެ ކަމަށް މިނިސްޓަރ ވިދާޅުވިއެވެ.

ޓެކްނިކަލް ބައެއް މީހުންނަށް އިއުލާންކޮށްގެން ޝަރުތުތައް ފުރިހަމަ ނުވާތީ ބައެއް މީހުން ނެގިފައިނުވާ ކަމަށާއި އެ ދާއިރާއަށް މީހުން ހޯދުމުގައި ދަތިވާ ކަމަށް މިނިސްޓަރ ވިދާޅުވިއެވެ.

ކިންގ ސަލްމާން މިސްކިތުގެ ނަމާދު ކުރާ ބައި ރަސްމީކޮށް ހުޅުވައި މިސްކިތުގައި ނަމާދުކުރަން ފަށާފައިވަނީ އޭޕްރިލް މަހުގެ އެއްވަނަ ދުވަހުގައެވެ. ސަލްމާން މިސްކިތް ރަސްމީކޮށް ހުޅުވާފައިވަނީ އެދުވަހުގެ ހުކުރު ނަމާދަށެވެ.

މިސްކިތް ރަސްމީކޮށް ހުޅުވާނީ ސައޫދީ އަރަބިއްޔާގެ ވަފުދެއް ރާއްޖެ އައުމުން ކަމަށް މިނިސްޓްރީން މައުލޫމާތުދެއެވެ. ކިންގް ސަލްމާން މިސްކިތަކީ ސައޫދީ ސަރުކާރުން ބޮޑު ހޭދައެއް ކޮށްގެން ބިނާކޮށްފައިވާ މިސްކިތަކަށްވާއިރު, އެ މިސްކިތް ރަސްމީކޮށް ހުޅުވުމުގެ ރަސްމިއްޔާތުގައި ބައިވެރިވުމުގެ ޝައުގުވެރިކަން ސައޫދީ ސަރުކާރުން ވަނީ ފާޅުކޮށްފައެވެ. ސަލްމާން މިސްކިތުގެ ފުރަތަމަ އަދި ދެވަނަ ފަންގިފިލާގައި ޖުމުލަ 4000 މީހުންނަށް ނަމާދު ކުރެވޭއިރު, ތިންވަނަ ފަންގިފިލާގައި 40 ޖާގައިގެ 4 ކްލާސްރޫމާއި، 5 ސެމިނަރ ރޫމް ހުންނާނެއެވެ. ހަތަރު ވަނަ ފަންގިފިލާގައި ލައިބްރަރީއަކާއި، 350 މީހުންގެ ޖާގައިގެ އޮޑިޓޯރިއަމެއް ހުންނާނެކަމަށް މިނިސްޓްރީން ބުނެއެވެ.