ކިންގ ސަލްމާން މިސްކިތުގައި ނަމާދުކުރަން ފަށައިފި

ކިންގ ސަލްމާން މިސްކިތް ރަސްމީކޮށް ހުޅުވައި މިސްކިތުގައި ނަމާދުކުރަން ފަށައިފިއެވެ.

ސަލްމާން މިސްކިތް ރަސްމީކޮށް ހުޅުވާފައިވަނީ މިއަދުގެ ހުކުރު ނަމާދަށެވެ. އަދި މިއަދުގެ ހުކުރު ނަމާދުން ފެށިގެން މި މިސްކިތުގައި ނަމާދުކުރަމުންދާނެ ކަމަށް އިސްލާމިކް މިނިސްޓްރީން ބުނެފައިވެއެވެ.

މިއަދުގެ ހުކުރު ނަމާދަށް ގިނަ ބަޔަކު ވަނީ ސަލްމާން މިސްކިތަށް ގޮސްފައެވެ. މިސްކިތް އެތެރެ އެއްކޮށް ފުރާލާފައިވާއިރު، މުޅި މިސްކިތް ސަރަހައްދުވެސް ވަނީ ފުރިފައެވެ.

މިސްކިތް ރަސްމީކޮށް ހުޅުވާނީ ސައޫދީ އަރަބިއްޔާގެ ވަފުދެއް ރާއްޖެ އައުމުން ކަމަށް މިނިސްޓްރީން މީގެ ކުރިން ބުނެފައިވެއެވެ.

ކިންގް ސަލްމާން މިސްކިތަކީ ސައޫދީ ސަރުކާރުން ބޮޑު ހޭދައެއް ކޮށްގެން ބިނާކޮށްފައިވާ މިސްކިތަކަށްވާއިރު, އެ މިސްކިތް ރަސްމީކޮށް ހުޅުވުމުގެ ރަސްމިއްޔާތުގައި ބައިވެރިވުމުގެ ޝައުގުވެރިކަން ސައޫދީ ސަރުކާރުން ވަނީ ފާޅުކޮށްފައެވެ. ސަލްމާން މިސްކިތުގެ ފުރަތަމަ އަދި ދެވަނަ ފަންގިފިލާގައި ޖުމުލަ 4000 މީހުންނަށް ނަމާދު ކުރެވޭއިރު, ތިންވަނަ ފަންގިފިލާގައި 40 ޖާގައިގެ 4 ކްލާސްރޫމާއި، 5 ސެމިނަރ ރޫމް ހުންނާނެއެވެ. ހަތަރު ވަނަ ފަންގިފިލާގައި ލައިބްރަރީއަކާއި، 350 މީހުންގެ ޖާގައިގެ އޮޑިޓޯރިއަމެއް ހުންނާނެކަމަށް މިނިސްޓްރީން ބުނެއެވެ.