ސަލްމާން މިސްކިތް ނިންމަން ދިން ފައިސާއަށް ކުރީ ސަރުކާރުން ހެދި ގޮތެއް ނޭނގޭ: ޕްލޭނިން މިނިސްޓްރީ

ސަލްމާން މިސްކިތަށް ޚާއްސަ ޕާކިން ޒޯނެއް ހެދުމަށް، މިސްކިތް ކުރިމަތީގައި އޮންނަ ސޯމިލް ބިން ދިނުމަށް މާލެ ސިޓީ ކައުންސިލުން އެދިފައިނުވާކަމަށް ޕްލޭނިން މިނިސްޓްރީން ބުނެފައިވެއެވެ.

ސަލްމާން މިސްކިތަށް ޚާއްސަ ޕާކިން ޒޯނެއް އެ ސަރަހައްދުގައި ނެތުމުން އުޅަނދު ޕާކު ނުކުރެވުމުގެ ގިނަ ޝަކުވާތަކެއް ރައްޔިތުން އަންނަކީ ކުރަމުންނެވެ. ރައޔްިތުންގެ ޝަކުވާތައް މިހެން ހުރިއިރު މާލެ ސިޓީ ކައުންސިލްގެ މޭޔަރ ޑރ. މުހައްމަދު މުއިއްޒު ސިޓީ ކައުންސިލްގެ ރަސްމީ ވައިބަރ ގްރޫޕަށް ފޮނުވި މެސެޖެއްގައި ވިދާޅުވީ ސަލްމާން މިސްކިތަށް ޚާއްސަ ޕާކިން ޒޯނެއް ހަދަން، އެމްޓީސީސީގެ ބިމެއް ކަމުގައިވާ ސޯމިލް ބިން ދިނުމަށް ސަރުކާރުގައި އެދިފައިވާނެ ކަމަށެވެ. އެ ބިމަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި މުއިއްޒު ހައުސިން މިނިސްޓަރު ކަމުގައި ހުންނެވިއިރުވެސް ސަލްމާން މިސްކިތަށް ޚާއްސަ ޕާކިން ޒޯން އެޅުމަށް ކަނޑައަޅާފައި އޮތް ބިން ކަމުގައި މުއިއްޒު ވިދާޅުވިއެވެ. އަދި މިކަމުގައި ސަރުކާރުން އެއްބާރުލުން ނުދޭކަމަށް މުއިއްޒު ވިދާޅުވިއެވެ.

މިކަމާއި ގުޅިގެން ރާއްޖެ އެމްވީއަށް ދެއްވި އިންޓަރވިއުއެއްގައި ހައުސިން އެންޑް ޕްލޭނިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ އެ ބިން ހޯދުމަށް ސިޓީ ކައުންސިލުން ޕްލޭނިން މިނިސްޓްރީގައި އެދިފައިނުވާކަމަށެވެ. އަކްރަމް ވިދާޅުވީ ސޯމިލް ބިމުގައި އެކި ކަންކަން ކުރުމަށް މިހާރުވެސް ޕްލޭން ކުރެވިފައިވާކަމަށެވެ. އެހެންކަމުން ކޮންމެ ކޮންމެ ބިމެއް ދޫކުރުމަކީވެސް ކުރެވޭނެ ކަމެއް ނޫން ކަމަށް އަކްރަމް ވިދާޅުވިއެވެ.

އަކްރަމް ވިދާޅުވީ ސަލްމާން މިސްކިތް ހަދަން ހެދި ޕްލޭންގައި އެތަނުގައި އަންޑަރގްރައުންޑް ޕާކިންއެއް ހެދުމަށް ހިމަނާފައިވާކަމަށެވެ. އެހެންނަމަވެސް މަސައްކަތް ނިމުނުއިރު އެ ޕާކިން ޒޯންވެސް ވުޖޫދުގައި ނެތް ކަމަށާއި، މިސްކިތް ބިނާކުރުމަށްފަހު ޕާކިންއެއް ގާއިމްކުރުމަށް ވިސްނައިގެން އެކަން އެގޮތަށް ފަސޭހައިން ނުވާނެކަން މޭޔަރަށް އެނގިލައްވަން ވާނެ ކަމަށް އަކްރަމް ވިދާޅުވިއެވެ. އަދި ސޯމިލް އަކީ މީގެ ކުރިން ޕާކިންއަށް ކަނޑައަޅާފައިވާ ތަން ނޫން ކަމަށްވެސް އަކްރަމް ވިދާޅުވިއެވެ.

އަކްރަމް އިތުރަށް ވިދާޅުވީ މިސްކިތް ބިނާކުރުމަށް ސައުދީ ސަރުކާރުން 14 މިލިއަން ޑޮލަރު ދޭނެ ކަމަށް ބުނެފައިވާކަމަށާއި، އެހެންނަމަވެސް ސަރުކާރަށް ލިބުނީ 8 މިލިއަން ޑޮލަރު ކަމަށެވެ. ބާކީ 6 މިލިއަން ޑޮލަރު ކޭޝްކޮށް ދިންކަން އެނގިފައިވާކަމަށްވެސް އަކްރަމް ވިދާޅުވިއެވެ. މި ފައިސާ އެއްކޮށް ސަރުކާރަށް ލިބިފައި ނެތުމުން މިސްކިތް ނިންމުމަށް ސަރުކާރުން 13 މިލިއަން ޑޮލަރު ޚަރަދުކޮށްފައިވާކަމަށް އަކްރަމް ވިދާޅުވިއެވެ.

މިމަހުގެ 1 ވަނަ ދުވަހު ހުކުރު ނަމާދަށް ސަލްމާން މިސްކިތް ވަނީ ރަސްމީކޮށް ހުޅުވާފައެވެ. އަދި ނަމާދު ވަގުތުތަކުގައި ސަލްމާން މިސްކިތް ކައިރީގައި ގާއިމްކޮށްފައިވާ ޕާކިން ޒޯންތައް ފުރި، މިސްކިތް ކުރިމަތީގައިވެސް ސައިކަލުތައް ޕާކު ކޮށްފައި ހުރެއެވެ. މި މައްސަލައަށް އަވަސް ހައްލެއް ބޭނުންވާކަމަށް ރައްޔިތުން ދަނީ ގޮވާލަމުންނެވެ.