ސަލްމާން މިސްކިތަށް ބައެއް ސާމާނު ގަތުމަށް ބަޖެޓުން 2.6 މިލިއަން ރުފިޔާ ހަމަޖައްސާފައިވޭ: އިސްލާމިކް މިނިސްޓަރު
މިސްކިތަށް ބޭނުންވާ އިތުރު ފަރުނީޗަރު ގަތުމަށްޓަކައި ސައުދީ ސަރުކާރުން ދެ މިލިއަން ޑޮލަރު ދޭނެ
ކިންގް ސަލްމާން މިސްކިތް
ކިންގް ސަލްމާން މިސްކިތަށް ބޭނުންވާ ބައެއް ސާމާނު ގަތުމަށްޓަކައި ސަރުކާރުގެ ބަޖެޓުން 2.6 މިލިއަން ރުފިޔާ ހަމަޖައްސާފައިވާ ކަމަށް އިސްލާމިކް މިނިސްޓަރު ޑރ. އަޙްމަދު ޒާހިރު އަލީ ވިދާޅުވެއްޖެއެވެ.
ރަމަޟާން މަހަށް ތައްޔާރުވުމުގެ ގޮތުން ކުރަމުންދާ މަސައްކަތްތަކާއި ގުޅޭ މައުލޫމާތު ދިނުމަށް ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އިސްލާމިކް މިނިސްޓަރު ވިދާޅުވީ ސަރުކާރުގެ ބަޖެޓުން 2.6 މިލިއަން ރުފިޔާ ކަނޑައަޅާފައިވާއިރު މިސްކިތަށް ބޭނުންވާ އިތުރު ފަރުނީޗަރު ގަތުމަށްޓަކައި ސައުދީ ސަރުކާރުން ދެ މިލިއަން ޑޮލަރު ދޭނެ ކަމަށް ބުނެފައިވާ ކަމަށެވެ. އެކަމުގެ ފެހި ސިގްނަލް ލިބިފައިވާ ކަމަށާއި ވަރަށް އަވަހަށް އެ ފައިސާ ދޭނެ ކަމަށް ބުނެފައިވާ ކަމަށް ވެސް މިނިސްޓަރ ވިދާޅުވިއެވެ.
1 އޭޕްރީލްވާ ހުކުރު ދުވަހުގެ ހުކުރު ނަމާދުން ފެށިގެން ސަލްމާން މިސްކިތުގައި ނަމާދު ކުރެވޭނެކަމަށް ވެސް މިނިސްޓަރުވަނީ ވިދާޅުވެފައެވެ.
ސަލްމާން މިސްކިތް ރަސްމީކޮށް ހުޅުވުން ފަސްކޮށްފައިވީނަމަވެސް، 1 އޭޕްރީލްވާ ހުކުރު ދުވަހުގެ ހުކުރު ނަމާދުން ފެށިގެން އެ މިސްކިތުގައި ނަމާދުކުރަން ފެށޭނެކަމަށް މިނިސްޓަރު ވިދާޅުވިއެވެ. މިސްކިތް ރަސްމީކޮށް ހުޅުވާނީ ސައޫދީ އަރަބިއްޔާގެ ވަފުދެއް ރާއްޖެ އައުމުން ކަމަށް މިނިސްޓްރީން މީގެ ކުރިން ބުނެފައިވެއެވެ.
ކިންގް ސަލްމާން މިސްކިތަކީ ސައޫދީ ސަރުކާރުން ބޮޑު ހޭދައެއް ކޮށްގެން ބިނާކޮށްފައިވާ މިސްކިތަކަށްވާއިރު, އެ މިސްކިތް ރަސްމީކޮށް ހުޅުވުމުގެ ރަސްމިއްޔާތުގައި ބައިވެރިވުމުގެ ޝައުގުވެރިކަން ސައޫދީ ސަރުކާރުން ވަނީ ފާޅުކޮށްފައެވެ. ސަލްމާން މިސްކިތުގެ ފުރަތަމަ އަދި ދެވަނަ ފަންގިފިލާގައި ޖުމުލަ 4000 މީހުންނަށް ނަމާދު ކުރެވޭއިރު, ތިންވަނަ ފަންގިފިލާގައި 40 ޖާގައިގެ 4 ކްލާސްރޫމާއި، 5 ސެމިނަރ ރޫމް ހުންނާނެއެވެ. ހަތަރު ވަނަ ފަންގިފިލާގައި ލައިބްރަރީއަކާއި، 350 މީހުންގެ ޖާގައިގެ އޮޑިޓޯރިއަމެއް ހުންނާނެކަމަށް މިނިސްޓްރީން ބުނެއެވެ.
