ފްރާންސްގެ ލީލް އަށް އިރުޝާދު ދެމުން އައި ޕޯޗުގަލްގެ ޕައޮލޯ ފޮންސެކާ އެ ކުލަބުގެ ކޯޗުކަމުން ވަކިވެއްޖެ އެވެ.

ލީލްގެ ކޯޗުކަމާ ފޮންސެކާ ހަވާލުވީ 2022 ވަނަ އަހަރު އެވެ. އެ ކުލަބާ އެކު އޭނާ ސޮއި ކުރީ ދެ އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ ޖޫން މަހުގެ ނިޔަލަށެވެ. ފޮންސެކާ ވަނީ ލީލްގެ އެއްބަސްވުން އިތުރަށް އައު ނުކުރަން ނިންމައިފަ އެވެ.

ލީލް އިން ބުނީ އެ ކުލަބުގެ ކޯޗުކަމުން ފޮންސެކާ ވަކިވާން ނިންމާފައިވާ ކަމަށާއި، ކުލަބުން އެ ނިންމުން ބަލައި ގަންނަ ކަމަށެވެ. އަދި ލީލްގެ ރައީސް އާއި ކުލަބުގެ އެންމެހާ އިސްވެރިން އަދި ސަޕޯޓަރުންގެ ފަރާތުން ފޮންސެކާ އަށް ޝުކުރު އަދާ ކުރާ ކަމަށް ވަނީ ބުނެފަ އެވެ. ފާއިތުވި ދެ އަހަރުގެ ތެރޭގައި ލީލް އާއެކު ފޮންސެކާ ކޮށްފައިވާ މަސައްކަތް ބަލައި ގަންނަ ކަމަށް ވެސް އެ ކުލަބުން ވަނީ ބުނެފަ އެވެ. އަދި ފޮންސެކާ އަށް އިތުރު ކާމިޔާބާއި، ކުރިއެރުމަށް އެދޭ ކަމުގައި ވެސް ބުނެފައިވެ އެވެ.

ލީލްގެ ކޯޗުކަމުން ފޮންސެކާ ވަކިވެފައިވާއިރު، އިޓަލީގެ އޭސީ މިލާނުން އަންނަނީ އޭނާ ހޯދުމުގެ މަސައްކަތް ކުރަމުންނެވެ. އެގޮތުން މިލާންގެ ހުށަހެޅުމެއް ފޮންސެކާ އަށް ހުށަހަޅާފައިވާއިރު، ފޮންސެކާ ހުރީ އެ ހުށަހެޅުމަށް ޤަބޫލު ވެގެން ކަމަށް ވެސް ވަނީ ބުނެފަ އެވެ. އެހެންކަމުން ކުރިއަށް އޮތް ދުވަސްތަކުގެ ތެރޭގައި، ފޮންސެކާ އޭސީ މިލާންގެ ކޯޗުކަމާ ހަވާލުވާނެ ކަމަށް ވަނީ ބުނެފަ އެވެ.

ފޮންސެކާ އޭނާގެ ކޯޗިން ކެރިއަރު ފެށީ 2005 ވަނަ އަހަރު އެވެ. އޭގެ ފަހުން މިހާތަނަަށް އޭނާ ވަނީ ގިނަ ކުލަބުތަކެއްގައި މަސައްކަތް ކޮށްފަ އެވެ. ފޮންސެކާ އިރުޝާދު ދީފައިވާ ކުލަބުތަކުގެ ތެރޭގައި، ޕޯޓޯ، ބްރާގާ، ޝަޚްތަރު ޑޮނެސްކް އަދި ރޯމާ ފަދަ ކަލަބުތައް ހިމެނެ އެވެ.

ފޮނެސްކާގެ އިރުޝާދުގެ ދަށުން ލީލް ވަނީ 89 މެޗު ކުޅެފަ އެވެ. އޭގެ ތެރެއިން 47 މެޗުން އެ ޓީމު މޮޅުވެފައިވާއިރު، 18 މެޗުން ވަނީ ބަލިވެފަ އެވެ. 24 މެޗެއް ނިމުނީ އެއްވަރުވެގެންނެވެ. މި ސީޒަންގެ ފްރާންސް ލީގުގައި އެ ޓީމު އޮތީ ވެސް ތިން ވަނައިގަ އެވެ.