މިވަގުތު ފްރީ އެޖެންޓެއްގެ ގޮތުގައި ހުރި ޖަރުމަނުގެ އެޓޭކިން މިޑްފީލްޑަރު މާކޯ ރެއުސް ހޯދޭނެ ކަމުގެ އުންމީދު، އެމެރިކާގެ ލޮސް އެންޖަލަސް އަށް ވަރަށް ބޮޑު ކަމަށް މީޑިއާ ތަކުން ރިޕޯޓުކޮށްފި އެވެ.

އުމުރުން 35 އަހަރުގެ ރެއުސް އެންމެ ފަހުން ކުޅުނީ ޖަރުމަނުގެ ބޮރޫޝިއާ ޑޯޓްމަންޑަށެވެ. ޑޯޓްމަންޑުގައި 12 ސީޒަން ހޭދަކުރުމަށްފަހު، ރެއުސް ނިންމީ އެ ކުލަބު ދޫކޮށްލުމަށެވެ. އެއީ ޑޯޓްމަންޑާ އެކު އޭނާ ސޮއި ކޮށްފައިވާ އެއްބަސްވުން ހަމަވުމުންނެވެ. ޑޯޓްމަންޑުގައި ރެއުސްގެ އެންމެ ފަހު މެޗަކަށްވީ، ޔުއެފާ ޗެމްޕިއަންސް ލީގުގެ ފައިނަލްގައި ސްޕެއިންގެ ރެއާލް މެޑްރިޑާ ދެކޮޅަށް ކުޅުނު މެޗެވެ.

ޑޯޓްމަންޑު ދޫކޮށްލަން ނިންމި ނަމަވެސް، ދެން ބަދަލުވާނެ ވަކި ކުލަބެއް ރެއުސް ނުނިންމަ އެވެ. ނަމަވެސް، ރެއުސް ޑޯޓްމަންޑު ދޫކޮށްލަން ނިންމުމާއެކު، ބައެއް ކުލަބުތަކުން ވަނީ އޭނާ ހޯދުމުގެ ޝައުގުވެރިކަން ފާޅުކޮށްފަ އެވެ. އޭގެ ތެރޭގައި ސައުދީ ޕްރޯ ލީގުގެ ކުލަބުތަކާއި، މޭޖާ ލީގު ސޮކާ (އެމެރިކާ ލީގު)ގެ ކުލަބުތައް ހިމެނޭ ކަމަށް ރިޕޯޓުތައް ވަނީ ބުނެފަ އެވެ.

ރިޕޯޓުތަކުގައިވާ ގޮތުން ލޮސް އެންޖަލަސް އިން އަންނަނީ ރެއުސް ހޯދުމުގެ ޝައުގުވެރިކަން ފާޅުކޮށް، އެ މަސައްކަތް ކުރަމުންނެވެ. އެގޮތުން އެ ކުލަބުން ވަނީ ރެއުސް އަށް ހުށަަހެޅުމެއް ހުށަހަޅާފައި ކަމަށް ވެސް ރިޕޯޓުތައް ބުނެ އެވެ. އަދި ލޮސް އެންޖަލަސް އިން އޮތީ ރެއުސް ހޯދުމުގެ ރޭހުގައި ބޮޑު އުންމީދެއްގައި ކަމަށް ވެސް ރިޕޯޓުތައް ބުނެ އެވެ.

މީގެ އިތުރުން މިވަގުތު ރައުސް އަށް ލިބިފައިވާ ހުށަހެޅުންތަކުގެ ތެރެއިން، އެންމެ ރަނގަޅު ހުށަހެޅުމަކަށް އޮތީ ވެސް ލޮސް އެންޖަލަސްގެ ހުށަހެޅުން ކަމަށް ވަނީ ބުނެފަ އެވެ. އެހެންކަމުން، ކުރިއަށް އޮތް ދުވަސްތަކުގެ ތެރޭގައި ރެއުސް، އޭނާ އަށް ލިބިފައިވާ ހުށަހެޅުންތަކަށް ގޮތެއް ނިންމާނެ ކަމަށް ވެސް ރިޕޯޓުތައް ބުނެ އެވެ.

ދާދި ފަހުން ލޮސް ލޮސް އެންޖަލަސް އިން ވަނީ އިޓަލީގެ އޭސީ މިލާނަށް ކުޅެމުން އައި ފްރާންސްގެ ފޯވާޑް، އޮލީވިއޭ ޖިރޫޑްގެ ސޮއި ވެސް ހޯދައިފަ އެވެ. އޭގެ ކުރިން ލޮސް އެންޖަލަސް އިން ވަނީ، ފްރާންސް ޤައުމީ ޓީމުގެ ކުރީގެ އެއް ނަންބަރު ގޯލު ކީޕަރު އަދި ކުރީގެ ކެޕްޓަން ހޫގޯ ލޮރިސްގެ ސޮއި ވެސް ހޯދައިފަ އެވެ.