ރަސްމާލެ ހަވާލުކުރީ ކުޑަމިނުން އެކްސްކަވޭޓަރެއް ވެސް ނެތް ކޮންޓްރެކްޓަރަކާ - ނާޒިލް

ރަސްމާލެ ހަވާލުކުރީ ކުޑަމިނުން އެކްސްކަވޭޓަރެއް ވެސް ނެތް ކޮންޓްރެކްޓަރަކާ ކަމަށް ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވިދާޅުވެއްޖެއެވެ.

ނާޒިލް އެފަދައިން ވިދާޅުވީ ރައްޔިތުންގެ މަޖިލީހުން ފާސްކޮށް ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 91 ވަނަ މާއްދާގެ (ހ)ގެ ދަށުން ތަޞްދީޤުކުރެއްވުމަށް ރައީސުލްޖުމްހޫރިއްޔާ އަށް ފޮނުވި ދިވެހިރާއްޖޭގެ ބިމާބެހޭ ޤާނޫނަށް 9 ވަނަ އިސްލާހް ގެނައުމުގެ ބިލާމެދު އަލުން ވިސްނެވުމަށް ރައީސުލްޖުމްހޫރިއްޔ ފޮނުއްވާފައިވާ މައްސަލަ އަށް ބަހުސްކުރައްވަމުންނެވެ.

ނާޒިލް ވިދާޅުވީ 40 އަހަރުން ރައްޔިތުންނަށް ލިބުނު ކުޑަކުޑަ އުންމީދުވެސް މި ސަރުކާރުން ނިގުޅައިގަނެފައިވާ ކަމަށެވެ. އަދި ޕީއެންސީގެ މެމްބަރުން ދަނީ އޮޅުވާލާ ދޮގު ހަދަމުން ކަމަށް އޭނާ ވިދާޅުވިއެވެ. ރަސްމާލެ ތަރައްޤީ ކުރުމަށް ވީ ވައުދު މަސައްކަތް ފުރިހަމަ ކުރުމަށް ރައީސް ޑރ.މުހައްމަދު މުއިއްޒު މަސައްކަތް ކުރެއްވި ގޮތާއި މެދު ނާޒިލް ވަނީ ސުވާލު އުފައްދަވާފައެވެ. އެގޮތުން އެ މަސައްކަތް ކޮންޓްރެކްޓަރާއި ހަވާލު ކުރި ބަންޖެހޭ މިންވަރަށް ނުބަލާ ކަމަށާއި މަސައްކަތް ހަވާލު ކުރި ކުންފުންޏަކީ އެކްސްކަވޭޓަރެއްވެސް އޮތް ކުންފުންޏެއް ނޫން ކަމަށް އޭނާ ވަނީ ވިދާޅުވެފައެވެ. މީގެ އިތުރުން އެ މަޝްރޫޢޫ ކުރިއަށް ގެންދާނީ މާލެ ސަރަހައްދުން ބިން ދީގެން ކަމަށް ސަރުކާރުން ބުނި އިރު، 10 ހެކްޓަރުގެ ބިން ކޮންޓްރެކްޓަރާއި ހަވާލުކުރި ކުރުމަކީ އެއްގޮތަކަށް ވެސް ބަލައިގަނެވޭ ކަމެއް ނޫން ކަމަށް އޭނާ ވިދާޅުވިއެވެ. 3 އަހަރުގެ ތެރޭގައި އެ މަޝްރޫޢު އަށް ކަނޑައެޅީ 1.35 ބިލިއަން ރުފިޔާ ކަމަށް ނާޒިލް ވިދާޅުވިއެވެ. ނަމަވެސް ހުޅުމާލެއިން 10 ހެކްޓަރގެ ބިމުގެ އަގަކީ އެންމެ ކުޑަކޮށް ބެލިއަސް 7.5 ބިލިއަން ރުފިޔާ ކަމަށް ނާޒިލް ވިދާޅުވިއެވެ. އެހެންކަމުން އަގުގެ ގޮތުން ބަލާއިރު އެ މަޝްރޫޢުގެ އަގަށް ވުރެ ބިމުގެ އަގު މާ ބޮޑު ކަމަށް އޭނާ ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރިން ވިދާޅުވެފައިވާ ގޮތަށް ކ. ފުށިދިއްގަރުފަޅު ހިއްކުމުގެ މަޝްރޫއުގެ މަސައްކަތް ފެށިތާ 8 މަސް ދުވަހުގެ ތެރޭގައި ނުނިމޭނެކަން ސަރުކާރުން ވަނީ ހާމަކޮށްފައެވެ.

ނިމިދިޔަ ހަފްތާގެ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި އިންފްރާސްޓްރަކްޗަރު މިނިސްޓަރު ޑރ. އަބްދުﷲ މުއްތަލިބު ވަނީ ރަސްމާލެ ހިއްކުމުގެ މަޝްރޫއުއަކީ ރާއްޖޭގައި ބޯހިޔާވަހިކަމަށް ޚާއްސަކޮށްގެން ހިންގާ އެންމެ ބިޔަ މަޝްރޫއުކަމަށް ސިފަކުރައްވާފައެވެ. އެ މަޝްރޫއު އަށް މަސްދުވަހުގެ ތެރޭގައި ނިންމައިނުލެވޭނެ ކަމަށާއި، އެހެންކަމުން އެ މަޝްރޫޢު އާއި މެދު ސަރުކާރުން އެހެން ގޮތްތަކެއް ހޯދަމުންދާ ކަމަށް އެމަނިކުފާނު ވިދާޅުވިއެވެ. މީގެ ކުރިން ސަރުކާރުން ނިންމާފައި ވަނީ އެ މަޝްރޫއަށް ޚަރަދުކޮށްގެން މަސައްކަތް ކުރިއަށް ގެންދިއުމުގެ ބަދަލުގައި 70 ހެކްޓަރުގެ ބިން އެ މަސައްކަތް ކުރާ ކޮންޓްރެކްޓަރަށް ދީގެން އެ މަސައްކަތް ނިންމުމަށެވެ. އެގޮތުން ހުޅުމާލެއިން 10 ހެކްޓަރުގެ ބިމާއި ރަސްމާލެ މަޝްރޫއިން 60 ހެކްޓަރުގެ ބިން އެ މަޝްރޫޢުގެ މަސައްކަތް ކުރާ ކުންފުންޏަށް ދޭން ނިންމިއެވެ. މިނިސްޓަރު ވަނީ އެއީ ސަރުކާރަށް ލޯނު ނެގުމަކާ ނުލާ ބޮޑު ދަރަންޏެއް ނެތި އެ މަޝްރޫޢު ކުރިއަށް ގެންދެވޭނެ މަގެއް ކަމަށް ވިދާޅުވެފައެވެ.