ގުޅިފަޅުން ގޯތި ދޫކުރުމުގެ މަސައްކަތް މިމަހުގެ މެދުތެރޭގައި ފަށާނަން: ހައުސިން މިނިސްޓްރީ

ގުޅިފަޅުން ގޯތި ދޫކުރުމުގެ މަސައްކަތް މިމަހުގެ މެދުތެރޭގައި ފެށޭނެ ކަމަށް އުންމީދުކުރާ ކަމަށް ހައުސިން މިނިސްޓްރީން ބުނެފިއެވެ.

ގުޅިފަޅަށް ގޯތި ބަދަލުކުރަން ބޭނުންވާ ފަރާތްތަކުގެ ގުރުއަތުލުމުގެ ކަންކަމާއި ގުޅޭގޮތުން މައުލޫމާތު ދިނުމަށް ހޯމަ ދުވަހު ހައުސިން މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި ހައުސިން މިނިސްޓްރީގެ ސްޓޭޓް މިނިސްޓަރު މުހައްމަދު އިރުޝާން އަބްދުﷲ ވިދާޅުވީ ގިރާވަރުފަޅުން ދޫކޮށްފައިވާ ބައެއް ގޯތި ގުޅިފަޅަށް ބަދަލުކުރާނެ ކަމަށާއި، އަންގާރަ ދުވަހުގެ މެންދުރު 12:00 ގައި ގުރުއަތުލުން ފެށިގެން ކުރިއަށް ގެންދާނެ ކަމަށެވެ.

ގުޅިފަޅުން ގޯތިތައް ދޫކުރަން ފަށާނީ ކޮންއިރަކުންތޯ ނޫސްވެރިއަކު ކުރި ސުވާލަށް އިރުޝާން ވިދާޅުވީ މިމަހުގެ މެދުތެރޭގައި ގޯތިތައް ދޫކުރެވޭނެ ކަމަށް އުންމީދުކުރާ ކަމަށެވެ.

އިރުޝާން ވިދާޅުވީ މިހާރު ގުޅިފަޅުގެ ލޭންޑްޔޫސް ޕްލޭނަށް ބަދަލުތައް އައިސްފައިވާ ކަމަށެވެ.

ސަރުކާރުން ކުރިއަށް ގެންގޮސްފައިވާ ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކަށް ގުޅިފަޅަށް ބަދަލުވުމަށް ހައުސިން މިނިސްޓްރީން ދެ ފަހަރެއްގެމަތިން ފުރުސަތު ހުޅުވާލިއެވެ.

ހައުސިން މިނިސްޓްރީން ބުނީ އަންގާރަ ދުވަހު 12:00 ގައި ގުރުއަތުލުން ފެށިގެން ކުރިއަށް ގެންދާނެ ކަމަށާއި، އަމިއްލައަށް ނަން ފޮއްޓަށް ލާން ބޭނުންވާ މީހުން ހެނދުނު 9:00 އާއި 10:00އާ ދެމެދު މިނިސްޓްރީއަށް ހާޒިރުވެ ނަން ކަރުދާސްލުމަށް އެދޭ ކަމަށެވެ.

1250 އަކަފޫޓުގެ 193 ގޯއްޗަށް 1093 މީހުން ވަނީ ކުރިމަތިލާފައެވެ. އަދި 1650 އަކަފޫޓުގެ 683 ގޯއްޗަށް 880 މީހުން ވަނީ ކުރިމަތިލާފައެވެ.