ރައީސްގެ ރުހުން ނުލިބި އަދި އެމަނިކުފާނަށް އެނގިވަޑައިނުގެން ޓޯލް ފީ ނަގާ ވާހަކަ ވަޒީރު އިއުލާން ނުކުރައްވާނެ - ޔާމީން
ރައްޔިތުންގެ ނުރުހުން އަމާޒުވުމުން ވިދާޅުވީ ބްރިޖް އިން ޓޯލް ނެގުމަކީ އެމަނިކުފާނުގެ ސިޔާސަތެއްނޫން ކަމަށް
ކުރީގެ ރައީސް އަބްދުﷲ ޔާމީން
ރައީސް ޑރ. މުހައްމަދު މުއިއްޒުގެ ރުހުން ލިބިވަޑައިނުގެން އަދި އެމަނިކުފާނަށް އެނގިވަޑައިނުގެން ޓޯލް ފީ ނަގާ ވާހަކަ ކެބިނެޓް މިނިސްޓަރަކު ވިދާޅުނުވާނެކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ޕީއެންއެފް އޮފީހުގައި ކުރިއަށްދިޔަ ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ، އެކަން އަންގާ އިއުލާންކޮށް، އެވަރުވެފައި އޮތްކަމެއްގައި ކެބިނެޓް މިނިސްޓަރަކު ސަރުކާރުގެ އެންމެ އިސްމީހާއަށް ނޭނގި ނުވަަތަ ރައީސްގެ ރުހުން ނުލިބި އެފަދަ ވާހަކައެއް އިއުލާން ކުރައްވާނެ ކަމަށް ގަބޫލުފުޅު ނުކުރައްވާ ކަމަށެވެ.
ރައީސް ޔާމީން ވިދާޅުވީ މިއީ ރައްޔިތުން އަތުން ނަގާ ޓެކްސްއެއް ކަމަށާއި، ބުރިޖާއި ހައިވޭއަކީ އާންމުން ކޮންމެހެން ދަތުރުކުރަން ލާޒިމް ތަނެއް ކަމަށެވެ. ރައީސް ޔާމީން ވިދާޅުވީ ބުރިޖު ދޫކޮށްލާފައި ކަނޑުމަގުން ދާނެ މީހަކު ނުހުންނާނެ ކަމަށެވެ.
ނަމަވެސް ރައްޔިތުންގެ ނަފްރަތު ބޮޑުވެ ކަންބޮޑުވެ ޝަކުވާތައް ކުރަން ފެށުމުން، ރައީސް މުއިއްޒު ވިދާޅުވަނީ އެއީ އެމަނިކުފާނަށް އެނގިވަޑައިގަންނަވާކަމެއް ނޫން ކަމަށެވެ. އަދި އެއީ އެމަނިކުފާނު ކުރައްވާނެކަމެއް ނޫންކަމަށް ވިދާޅުވެ ބުރިޖުން ޓޯލް ފީއެއް ނަގާނީ އިގްތިސާދު އެހިސާބަށް ގޮސް، އިގްތިސާދީ ގޮތުން ދައުލަތަކީ ރަނގަޅު އަދި ރާއްޖެއަކީ ވަރުގަދަ ހިސާބަކަށް ދިއުމުން ކަމަށް ވިދާޅުވި ކަމަށެވެ.
ބުރިޖުން ޓޯލް ފީ ނަގާކަން ހާމަކުރީ މާލެ ފަހި ޕްރޮގްރާމް އިފްތިތާހުކުރުމަށް ބޭއްވި ޖަލްސާގައެވެ. މި ޖަލްސާގައި ޓްރާންސްޕޯޓް މިނިސްޓަރު ވިދާޅުވެފައިވަނީ "މާލެ ފަހި" ޕްލޭނަކީ ސީދާ ރައީސް މުއިއްޒުގެ އިރުޝާދުގެ ދަށުން ކުރައްވާ ކަމެއްގެ ގޮތުގައެވެ. މި ފޮތުގައިވާ މިނިސްޓަރުގެ ބަސްކޮޅުގައި ވަނީ "މާލެ ފަހި" ޕްރޮގްރާމަކީ، އިއްޒަތްތެރި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިސްނެންގެވުމުގެ މަތިން އެމަނިކުފާނުގެ ހާއްސަ އިރުޝާދާއެކީ ފަރުމާކުރެވުނު ޕްރޮގްރާމެއް ކަމަށެވެ.
ނަމަވެސް ރައްޔިތުންގެ ނުރުހުން އަމާޒުވުމާއެކު އެއީ އެމަނިކުފާނުގެ ސިޔާސަތެއް ނޫންކަމަށް ވިދާޅުވެ އެކަން ކުރައްވާނީ ރާއްޖޭގެ އިގްތިސާދު ރަނގަޅުވުމުން ކަމަށް ރައީސް ވަނީ ވިދާޅުވެފައެވެ.
