ހައްޔަރު ކުރި ކެޕްޓަންގެ ބަންދަށް 15 ދުވަސް ޖަހައިފި
ފުލުހުން ދަނީ އިތުރަށް މިހާދިސާ ތަހުގީގު ކުރަމުން
ފާނަ ނަގަން މީހާ އޮތް ސަރަހައްދު
ލޯންޗަކުން ޖެހި ބިދޭސީއަކު މަރުވި މައްސަލައާ ގުޅިގެން އެލޯންޗު ދުއްވަން އިން ކެޕްޓަންގެ ބަންދަށް 15 ދުވަސް ޖަހައިފިއެވެ.
ލޯންޗަކުން ޖެހި ފާނަ މަސްވެރިކަން ކުރަން އުޅުނު ބިދޭސީއެއް މަރުވިކަމުގެ ރިޕޯޓު ފުލުހުންނަށް ލިބިފައިވަނީ ހޮނިހިރު ދުވަހުގެ ހެނދުނު 7:55 ގައެވެ. މިމައްސަލައާ ގުޅިގެން ފުލުހުން ބުނީ މަރުވި މީހާގެ ގައިގައި ޖެހުނު ލޯންޗު ދުއްވަން އިން ކެޕްޓަން ހައްޔަރުކޮށްފައިވާ ކަމަށެވެ. އެއީ ދިވެހި ފިރިހެނެއް ކަމަށް ފުލުހުން ބުނެއެވެ.
ފުލުހުން ބުނީ މި މައްސަލައާއި ގުޅިގެން ހައްޔަރުކުރި މީހާގެ ބަންދާމެދު ގޮތެއް ނިންމުމަށް ހޮނިހިރު ދުވަހު ކޯޓަށް ހާޒިރުކުރުމަށް 15 ދުވަހަށް ބަންދުކުރުމަށް އަމުރުކޮށްފައިވާ ކަމަށެވެ.
މިހާދިސާ ހިނގާދިޔަ ގޮތާ ގުޅޭގޮތުން ރާއްޖެއެމްވީއަށް ފ. ފީއަލީ ކައުންސިލްގެ ރައީސް މޫސާ އަހުމަދު ވިދާޅުވީ ކައްދާމް ނަމަކަށް ކިޔާ އެ ބިދޭސީމީހާއަކީ އެރަށުގައި ފާނަ މަސްވެރިކަމުގައި އުޅޭ މީހެއް ކަމަށެވެ.
މޫސާ ވިދާޅުވީ ހޮނިހިރު ދުވަހު އެ ބިދޭސީމީހާ ފާނައަށް ދިޔަ ކަމަށާއި، އެދޯނި ދިޔައީ އދ.ދަނގެތި ކައިރިއަށް ކަމަށެވެ. އެސަރަހައްދުން މޫދަށް އެރި އުޅެނިކޮށް އެމީހާގެ ގައިމަތިން ލޯންޗެއް ދިޔަ ކަމަށެވެ. އެމީހާގެ ކަނދުރާއަށް ވަރަށް ބޮޑަށް އަނިޔާވެފައިވާ ކަމަށާއި، މިހާރު އެމީހާގެ ހަށިގަނޑު އޮތީ ދަނގެތީގެ ސިއްހީ މަރުކަޒުގައި ކަމަށެވެ.
މިހާދިސާއާ ގުޅޭގޮތުން ފުލުހުން ބުނީ ލޯންޗުގައި ޖެހުނު މީހާ ދަނގެތި ސިއްހީ މަރުކަޒަށް ގެންދިޔައިރު ވެސް މަރުވެފައިވާ ކަމަށް އެމަރުކަޒުން މައުލޫމާތު ދީފައިވާ ކަމަށެވެ.
ފުލުހުން ދަނީ އިތުރަށް މިހާދިސާ ތަހުގީގު ކުރަމުންނެވެ.
