ރާއްޖޭގައި ގާމެންޓްސް ފެކްޓްރީ އެއް އުފައްދަން ސަރުކާރުން ބޭނުންވޭ - ސަޢީދު
2 ޖޫން 2024 | އާދީއްތަ 09:38މީގެ ކުރިން ސަރުކާރުން ވަނީ ރާއްޖޭގައި ލޮނު އުފެއްދުމުގެ މަސައްކަތް ކުރުމަށް ދިރާސާ ކުރުމަށް ބީސީސީ އާއި ހަވާލުކޮށްފައިވާ ކަމަށް ބުނެފަ
އިގްތިސާދީ ތަރައްގީއާއި ވިޔަފާރިއާބެހޭ ވަޒީރު މުޙައްމަދު ސަޢީދު
ރާއްޖޭގައި ގާމެންޓްސް ފެކްޓްރީ އެއް އުފައްދަން ސަރުކާރުން ބޭނުންވާ ކަމަށް އިގްތިސާދީ ތަރައްގީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
މިނިސްޓަރ ސަޢީދު އެފަދައިން ވިދާޅުވީ ބީސީސީގެ 7 ވަނަ އަހަރީ ދުވަހާ ގުޅުވައިގެން ބޭއްވި ސްޓާފް ގާލާ ނައިޓްގައި ވާހަކަދައްކަވަމުންނެވެ. މިނިސްޓަރ ވަނީ ރާއްޖޭގެ އުފެއްދުންތައް ކުރިއެރުވަން މަސައްކަތް ކުރަން ޖެހޭ ކަމަށް ވިދާޅުވެފައެވެ. ބީސީސީ އަކީ މިހާރުވެސް ރާއްޖޭގެ އުފެއްދުންތެރިކަން އިތުރުކުރުމުގައި ވަަރަށް މުހިންމު ދައުރެއް އަދާކުރާ ތަނެއްކަން ފާހަގަކޮށް ސައީދު ވަނީ އެ ކުންފުނީގެ ހިންގުން ހަރުދަނާކޮށް ދެކޮޅު ޖެހޭ ވިޔަފާރިއެއް ގޮތުގައި ކުރިއަށްގެންދިއުމަށް މަސައްކަތްކުރަންޖެހޭ ކަމަށް ވިދާޅުވެފައެވެ. ކުންފުނި ކުރިއެރުވުމުގެ ގޮތުން ރާއްޖޭގައި އެކި ކަހަލަ ކާރުހާނާތައް އުފެއްދުމަކީ ކުރެވިދާނެ ކަމެއް ކަމަށް މިނިސްޓަރ ވަނީ ވިދާޅުވެފައެވެ. ގާމެންޓް ފަދަ ތަކެތި އުފެއްދުމަށް މާކެޓް ހޯދުމުގެ މަސައްކަތް ވެސް ކުރާނެ ކަމަށް އެ މަނިކުފާނު ވަނީ ވިދާޅުވެފަވެ.
މީގެ އިތުރުން ސަރުކާރުގެ ވިސްނުމަކީ ވިޔަފާރިތައް ޕްރައިވެޓައިޒްކުރުމާއި ޕަބްލިކް ޕްރައިވެޓް ޕާޓްނާޝިޕްތައް އުފެއްދުމަށްކަމަށް ސައީދު ވަނީ ވިދާޅުވެފައެވެ. މިނިސްޓަރ ވަނީ ޗައިނާއާއެކު އެކުލަވާލާފައިވާ މިނިވަން ވިޔަފާރި އެއްބަސްވުމަށް މިއަހަރު އަމަލުކުރަން ފެށުމުން އެފަދަ މާކެޓްތަކަށް ފުރުސަތު ހުޅުވިގެންދާނެ ކަމަށް ވިދާޅުވެފަވެ. ސައީދު ވަނީ ކޮލިޓީއާ ސްޓޭންޑަޑް އިންފްރާސްޓްރަކްޗަރއެއް ގާއިމްކޮށް އިމްޕޯޓް ކުރާ ތަކެތީގެ ކޮލިޓީ އިތުރަށް ހަރުދަނާ ކުރުމަށް މަސައްކަތް ކުރަމުންދާކަމަށް ވިދާޅުވެފައެވެ. އަދި އިތުރު ބައެއް ޤައުމުތަކާއި އެކު ފްރީޓްރޭޑް އެއްބަސްވުންތައް އެކުލަވާލަމުންދާ ކަމަށް ވެސް ވަޒީރު ވަނީ ވިދާޅުވެފައެވެ. ސައީދު ވަނީ ރާއްޖޭގެ އިޤްތިޞާދުގައި ބީސީގެ ދައުރު ފުޅާކުރަން ޖެހޭ ކަމަށް ވެސް ވިދާޅުވެފައެވެ.
ރާއްޖޭގައި ރާއްޖޭގައި ގާމެންޓްސް ފެކްޓްރީ އެއް އުފައްދަން ސަރުކާރުން ބޭނުންވާކަން ހާމަކޮށްފައިވާ އިރު މީގެ ކުރިން ސަރުކާރުން ވަނީ ރާއްޖޭގައި ލޮނު އުފެއްދުމުގެ މަސައްކަތް ކުރުމަށް ދިރާސާ ކުރުމަށް ބީސީސީ އާއި ހަވާލުކޮށްފައިވާ ކަމަށް ބުނެފައެވެ. ނަމަވެސް އެ މަސައްކަތާއި ގުޅޭ އިތުރު ތަފްސީލެއް ހާމައެއް ނުކުރެއެވެ.
