އުލިގަން ކާޑަށް ޖެހިފައި، ކާޑު ހުސްވިތާ ފަސް ދުވަސް!

ހއ. އުލިގަމުގައި ކާޑު ވިއްކާ ހަމައެކަނި އެޖެންޓު އަތުން ކާޑު ހުސްވެ ރަށު ރައްޔިތުން ކާޑަށް ޖެހިއްޖެއެވެ.

ނަން ހާމަނުކުރުމަށް ޝަރުތުކޮށް، ރާއްޖެ ޓީވީ އަށް އިތުބާރު ހުރި މަސްދަރަކުން މައުލޫމާތު ދިން ގޮތުގައި އެސްޓީއޯ އިން އެ ރަށަށް ކާޑު ގެނެސް، ރަށުގެ ރައްޔިތުންނަށް ކާޑު ފޯރުކޮށްދެމުން ދަނީ އެންމެ އެޖެންޓެއް މެދުވެރިކޮށެވެ. އަދި ފާއިތުވި ހަފްތާގައި ރާއްޖެ އަށް ކުރި ވިއްސާރައިގެ ސަބަބުން ރަށަށް ބޭނުންވާ ކާޑު ގެނައުމަށް އެ އެޖެންޓަށް ދަތިތަކާއި ކުރިމަތިވިކަމަށް އޭނާ ވަނީ ބުނެފައެވެ. އަދި އެ އެޖެންޓު ތަކުރާރުކޮށް ކުރި މަސައްކަތުން ވެސް ރަށަށް ކާޑުގެ ބާވަތްތައް ގެނެވޭނެ ގޮތެއް ނުހޯދުމުން އޭނާ ވަނީ ރަށު ކައުންސިލުން އެކަމުގައި އެހީތެރިކަމެއް ފޯރުކޮށްދިނުމަށް އެދިފައި ކަމަށް ވަނީ އެނގިފައިވެއެވެ.

އެގޮތުން މިދިޔަ ބުދަ ދުވަހު އުލިގަމު ކައުންސިލްގެ ނައިބު ރައީސް އަސަދުﷲގެ ސަމާލުކަމަށް އެ މައްސަލަ ގެނެސްފައިވާ ކަމަށް އޭނާ ވަނީ ބުނެފައެވެ. އަދި ކައުންސިލުން ރަށަށް ކާޑު ގެނެސްދެވޭނެ މަގެއް ހޯދުމަށް ކަމާއި ބެހޭ ފަރާތްތަކާއި މުއާމަލާތުކުރިކަން ރާއްޖެޓީވީ އަށް ވަނީ އެނގިފައެވެ. ނަމަވެސް ކައުންސިލްގެ ބޭފުޅަކާއި ގުޅުމަށް ކުރި މަސައްކަތް ކާމިޔާބު ނުވާތީ މި މައްސަލަ އާއި ގުޅިގެން ކައުންސިލުން މުއާމަލާތު ކުރީ ކޮން އިދާރާތަކަކާއި ކަން ވަނީ ސާފުވާގޮތް ނުވެފައެވެ.

ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި ބުރާސްފަތި ދުވަހު، އެސްޓީއޯ އިން ވަނީ އެ ރަށުގައި ކާޑު ފޯރުކޮށްދޭ އެޖެންޓަށް ގުޅާ ކާޑަށް ވާ ފައިސާ ޓްރާންސްފަރކުރުމަށް އެދިފައެވެ. އެނގިފައިވާ ގޮތުން އެސްޓީއޯ އިން ފައިސާ ޖަމާކުރަން އެންގީ ވެސް އެ ރަށަށް ކާޑު ގެނެވޭނެ ގޮތެއް ނެތް ކަން އެސްޓީއޯ އަށް އަންގާފައި ވަނިކޮށެވެ. އަދި އެޖެންޓާއި އެކު ކުރި މުއާމަލާތުތަކުގައި އެސްޓީއޯ އިން ވަނީ އެސްޓީއޯ މެދުވެރިކޮށް ކާޑު ފޯރުކޮށްދޭނެކަމަށް އޭނާ އަށް އަންގާފައެވެ. ކާޑަށް ވާ ފައިސާ ޖަމާކުރަން އެޖެންޓު އެއްބަސްވެފައި ވަނީ ވެސް އެސްޓީއޯ މެދުވެރިކޮށް ރަށަށް ކާޑު ގެނެސްދޭނެ ކަަމަށް ބުނުމުންނެވެ، އެހެންކަމުން ބުރާސްފަތި ދުވަހު އެ އެޖެންޓް ވަނީ އެސްޓީއޯ އަށް 30 ބަސްތާ ހަނޑޫ، 30 ބަސްތާ ފުށް އަދި 15 ބަސްތާ ހަކުރަށް ވާ ފައިސާ ޖަމާކޮށްފައެވެ. އޭގެ ދެ ދުވަސް ފަހުން ހޮނިހިރު ދުވަހު މެންދުރު އެސްޓީއޯ އިން ވަނީ އެ އެޖެންޓަށް ގުޅާފައި އެޖެންޓް އަމިއްލަ އަށް އުލިގަމަށް ކާޑު ގެންދެވޭނެ ގޮތެއް ނެތްތޯ ސުވާލުކޮށްފައެވެ. އެހެންކަމުން މި ވަގުތު ރަށަށް ކާޑު ނުގެންދެވި އުލިގަމުން ވަނީ މުޅިން ކާޑު ހުސްވެފައެވެ.

އެ ރަށު މީހަކު ރާއްޖެ އެމްވީ އަށް މައުލޫމާތުދެމުން ބުނީ ރަށުގައި ކާޑު ވިއްކާ އެޖެންޓް އަތުން ކާޑު ހުސްވިތާ 5 ވަރަކަށް ދުވަސް ވެފައިވާ ކަމަށެވެ. މިހާރު އާއްމުން އުޅެމުން ދަނީ ގޭބިސީތަކުގައި ހުރި ކާޑުން ފުއްދައިގެން ކަމަށާއި ރަށަށް ކާޑު ނުލިބޭ ނަމަ ގޭގައި ރައްކާކޮށްްފައި ހުރި ކާޑުގެ ބާވަތްތައް ހުސްވެ، ރަށުގެ ހާލަތު އިތުރަށް ގޯސްވުން އެކަށީގެންވާ ކަމަށް އޭނާ ވަނީ ބުނެފައެވެ.