މޮރީނިއޯ ތުރުކީގެ ކުލަބަކާ ހަވާލުވެއްޖެ

ތަޖުރިބާކާރު ކޯޗު ހޯސޭ މޮރީނިއޯ ތުރުކީގެ، ފެނާބާޗޭއާ ހަވާލުވެއްޖެ އެވެ.

އުމުރުން 61 އަހަރުގެ މޮރީނިއޯ އެންމެ ފަހުން ހުރީ އިޓަލީގެ ރޯމާގެ ކޯޗުކަމުގެ މަގާމުގަ އެވެ. 2021 ވަނަ އަހަރު އެ ކުލަބުގެ ކޯޗުކަމާ މޮރީނިއޯ ހަވާލުވީއިރު، ކުލަބުގެ ވެރިންނާ މައްސަލަ ޖެހި މިއަހަރުގެ ޖަނަވަރީ މަހުގެ ތެރޭގައި ވަނީ މޮރީނިއޯ މަގާމުން ވަކިކޮށްފަ އެވެ. އޭގެ ފަހުން މޮރީނިއޯ އަށް ވަނީ ސައުދީ އަރަބިއްޔާގެ ކުލަބުތަކުގެ ހުށަހެޅުން ވެސް ލިބިފަ އެވެ.

ފެނާބާާޗޭގެ ކޯޗުކަމާ މޮރީނިއޯ ހަވާލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން، 2026 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބަށް އިރުޝާދު ދޭނެ އެވެ. މޮރީނިއޯ ވަނީ އެ ކުލަބުގެ އެއްބަސްވުމުގައި ސޮއި ވެސް ކޮށްފަ އެވެ. ފެނާބާޗޭ އިން ވަނީ އެ ކުލަބުގެ ކޯޗަކަށް ހުރި އިސްމާއީލް ކާޓަލް މަގާމުން ވަކި ކުރަން ނިންމައިފަ އެވެ.

ޔޫރަޕުގެ ގިނަ ކުލަބުތަކަށް އިރުޝާދު ދީފައިވާ މޮރީނިއޯ އަކީ އެންމެ މޮޅު ކޯޗުންގެ ތެރޭގައި ހިމެނޭ، ތަޖުރިބާކާރު ކޯޗެކެވެ. ފެނާބާޗޭ އަކީ މޮރީނިއޯގެ ކޯޗިން ކެރިއަރުގައި އޭނާ އިރުޝާދު ދޭނެ 10 ވަނަ ކުލަބެވެ. ބެންފީކާ އިން ކޯޗިން ކެރިއަރު ފެށި މޮރީނިއޯ ވަނީ، ޕޯޓޯ، ޗެލްސީ، އިންޓަ މިލާން، ރެއާލް މެޑްރިޑް، މެންޗެސްޓަރ ޔުނައިޓެޑު، ޓޮޓެންހަމް އަދި ރޯމާ އަށް ވެސް އިރުޝާދު ދީފަ އެވެ. މީގެ ތެރެއިން ޗެލްސީ އަށް އޭނާ ވަނީ ދެ ފަހަރެއްގެ މަތީން އިރުޝާދު ދީފަ އެވެ.

ކޯޗިން ކެރިއަރުގައި 26 ތަށި ކާމިޔާބު ކޮށްފައިވާ މޮރީނިއޯ އަކީ ޕޯޗުގަލަށް ނިސްބަތްވާ މީހެކެވެ.