ގާސިމްގެ ބަލިހާލުކޮޅަށް ބަދަލެއް ނާންނަ ކަމަށާއި އިތުރު ފަރުވާތަކަށް ދެވޭނީ ހަދަންޖެހޭ ހިތުގެ ޓެސްޓުތަކެއް ހެދުމަށް ފަހުގައި ކަަމަށް ޖުމްހޫރީ ޕާޓީން ބުނެފި އެވެ.

ޖުމްހޫރީޕާޓީގެ ސެކެޓްރީ ޖެނެރަލް އަހްމަދު ސަމީރު ވިދާޅުވީ، އެ ޕާޓީގެ ލީޑަރު  ގާސިމް އިބްރާހިމްގެ އެމްއާރްއައި ޓެސްޓް ހައްދަވާފައިވާ ކަމަށާއި، ގާސިމްގެ ހާލުކޮޅު ރަގަޅުވާނީ އިތުރުފަރުވާ ދިނުމަށް ބޭރަށް ގޮސްގެން ކަމަށެވެ. 

ސަމީރު ވިދާޅުވީ، ގާސިމްގެ ޕާސްޕޯޓު ހިފެހެއްޓުމުގެ ސަބަބުން އިތުރުފަރުވާ ނުދެވޭ ކޮންމެ ކޮންމެ ދުވަހު، ސިއްހީ ހާލުކޮޅު އިތުރަށް ގޯސްވުމުގެ ޒިންމާ ނަގަންޖެހޭނީ ސަރުކާރުން ކަމަށެވެ. މިއީ ރައްޔިތުންނަށް އިހްސާންތެރިކަމެއް ނެތް ސަރުކާރެއް ކަމަށް ސަމީރު ވިދާޅުވި އެވެ.

ގާސިމް އޭޑީކޭ ހޮސްޕިޓަލުގައި އެޑްމިޓްކޮށްގެން ފަރުވާ ދެމުންގެންދާ އިރު މިދިޔަ އާދިއްތަ ދުވަހު ވެސް ގާސިމްގެ ޝަރީއަތެއް ތާވަލްކޮށްފައި ވެއެވެ. އާދިއްތަ ދުވަހުގެ ރޭގަނޑު 08:00 ޝަރީއަތް ތާވަލްކޮށްފައިވާ އިރު އެރޭގެ ޝަރީއަތް ކެންސަލްކޮށްފައި ވަނީ ޕްރޮސެކިއުޓަރ ޖެނެރަލްގެ ވަކީލުން ވެސް ހާޒިރުވި ފަހުންނެވެ. އެރެއަށް ތާވަލްކުރީ ހާޒިރު ނުވެއްޖެ ނަމަ ޣައިރު ހާޒިރުގައި ވެސް ޝަރީޢަތް ކުރިއަށް ގެނދާނެ ކަމަށް ކަނޑައަޅާއިގެންނެވެ. ގާސިމަށް އެޑްމިޓްކޮށްގެން ފަރުވާދޭން ފަށާފައިވަނީ އާދިއްތަ ދުވަހުގެ ހެނދުނުގެ ވަގުތެއްގަ އެވެ.

މިދިޔަ މަހު ވެސް ކުއްލިގޮތަކަށް އެޑްމިޓްކޮށް ގާސިމަށް ފަރުވާދީފައި ވެއެވެ. އެފަހަރު ބޭސްފަރުވާއަށް ރާއްޖެއިން ބޭރަށް ވަޑައިގަތުމަށް އެއަރޕޯޓަށް ގެންދިއުމަށް ފަހު ގާސިމްގެ ޕާސްޕޯޓު ހިފަހައްޓާފައިވުމުގެ ސަބަބުން ވަނީ ފުރޭގޮތް ނުވެފަ އެވެ.

މިދިޔަ މަހުގެ 16 ވަނަ ދުވަހުން ފެށިގެން 10 ވަރަކަށް ދުވަސް ވަންދެން އޭޑީކޭ ހޮސްޕިޓަލްގެ އައިސީޔޫގައި ގާސިމަށް ވަނީ ފަރުވާދީފަ އެވެ.