20 ވަނަ މަޖިލީހުގެ ރަައީސްކަމަށް ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ އާއި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލްގެ ނަން ހުށަހަޅައިފިއެވެ.

އަންގާރަ ދުވަހު ހެނދުނު އޮތް މަޖިލީހުގެ ޖަލްސާގެ ރިޔާސަތުގައި އިންނެވީ މީދޫ ދާއިރާގެ މެމްބަރު އަހުމަދު ސިޔާމެވެ. މަޖިލީހުގެ ރައީސާއި ނައިބު ރައީސް ހޮވުމަށް ނަގާ ސިއްރު ވޯޓު ގުނުމަށް 5 މެމްބަރުންގެ ވަގުތީ ކޮމިޓީ އެއް ނަގަން ވާނެ ކަމަށް މަޖިލީހުގެ ހިންގާ ޤަވާއިދުގައި ބުނެއެވެ.

އެ ކޮމިޓީ އަށް ނަންތައް ހުށަހެޅުއްވީ އިނގުރައިދޫ ދާއިރާގެ މެމްބަރު ފަލާހްއެވެ. އޭނާ ނަންތައް ހުށަހެޅުއްވި ގޮތަކީ

- ޕީއެންސީގެ ފަރާތުން ފޭދޫ ދާއިރާގެ މެމްބަރު އިބްރާހިމް ދީދީ

- އެމްޑީޕީގެ ފަރާތުން ހަނިމާދޫ ދާއިރާގެ މެމްބަރު އަބްދުލް ޢަފޫރު މޫސާ

- ޖުމްހޫރީ ޕާޓީގެ ފަރާތުން މާމިގިލީ ދާއިރާގެ މެމްބަރު ޤާސިމް އިބްރާހިމް

- އެމްއެންޕީގެ ފަރާތުން މާފަންނު އުތުރު ދާއިރާގެ މެމްބަރު ކާނަލް މުހައްމަދު ނާޒިމް

- އެމްޑީއޭގެ ފަރާތުން ވެލިދޫ ދާއިރާގެ މެމްބަރު މުހައްމަދު އައްބާސް

އެ ނަންތަކަށް ތާއީދުކުރެއްވީ ބާރަށު ދާއިރާގެ މެމްބަރު އިބްރާހިމް ޝުޖާއުއެވެ.

އެ ކޮމިޓީ އެކުލަވާލީ މަޖިލީހުގެ ހުރިހާ މެމްބަރުންގެ ފުރިހަމަ އަޣްލަބިއްޔަތުންނެވެ.

މަޖިލީހުގެ ރައީސްކަަމަށް ބޭފުޅަކު އައްޔަންކުރަން ނަން ހުށަހެޅުމަށް ލިބުނު ފުރުސަތުގައި، ދިއްގަރު ދާއިރާގެ މެމްބަރު އަހުމަދު ނާޒިމް ވަނީ ރައީސްކަމަށް ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲގެ ނަން ހުށަހަޅުއްވާފައެވެ. އެ ހުށަހެޅުމަށް އިނގުރައިދޫ ދާއިރާގެ މެމްބަރު އިބްރާހިމް ފަލާހު ވަނީ ތާއީދުކުރައްވާފައެވެ. އަދި ވައިކަރަދޫ ދާއިރާގެ މެމްބަރު ހުސައިން ޒިޔާދު ވަނީ 20 ވަނަ މަޖިލީހުގެ ރައީސްގެ މަޤާމަށް، ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލްގެ ނަން ހުށަހަޅުއްވާފައެވެ. އެ ހުށަހެޅުމަށް ތާއީދުކުރެއްވީ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމެވެ.

މަޖިލީހުގެ ނައިބު ރައީސްކަމަށް ދިއްގަރު ދާއިރާގެ މެމްބަރު އަހުމަދު ނާޒިމް އައްޔަން ކުރުމަށް ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވަނީ ހުށަހަޅުއްވާފައެވެ. އެ ހުށަހެޅުމަށް ތާއީދުކުރެއްވީ ބާރަށު ދާއިރާގެ މެމްބަރު އިބްރާހިމް ޝުޖާއުއެވެ. ވައިކަރަދޫ ދާއިރާގެ މެމްބަރު ހުސައިން ޒިޔާދު ވަނީ 20 ވަނަ މަޖިލީހުގެ ނައިބު ރައީސްގެ މަޤާމަށް މަރަދޫ ދާއިރާގެ މެމްބަރު އަހުމަދު ދީދީގެ ނަން ހުށަހަޅުއްވާފައެވެ. އެ ހުށަހެޅުމަށް ތާއީދުކުރެއްވީ މާވަށު ދާއިރާގެ މެމްބަރު އަހުމަދު ޝާކިރުއެވެ.