20 ވަަނަ މަޖިލީހުގެ މެމްބަރުން ހުވާކުރައްވައިފި

20 ވަަނަ ރައްޔިތުންގެ މަޖިލީހުގެ މެމްބަރުން ހުވާކުރައްވައިފިއެވެ.

އަންގާރަ ދުވަހު ހެނދުނު 09:00ގައި މަޖިލީހުގެ އިދާރައިގައި އޮތް ރަސްމިއްޔާތެއްގައި އެ މެމްބަރުންނަށް ހުވާލައިދެއްވާފައި ވަނީ އުއްތަމަފަނޑިޔާރު އަލްއުސްތާޛް އަހުމަދު މުޢުތަސިމް އަދުނާނެވެ. އެ މެމްބަރުން ވަނީ އިސްލާމްދީނަށް ހުރުމަތްތެރިކޮށް ހިތުމަށާއި، ރައްޔިތުންގެ ހައްގުތައް ދެމެހެއްޓުމަށް، އަދި ޤާނޫނުއަސާސީ އާއި ޤާނޫނާއި އެއްގޮތްވާ ގޮތުގެ މަތިން، ތެދުވެރިކަމާއި އަމާނާތްތެރިކަމާއި އެކު މެމްބަރުންގެ ޒިންމާ އަދާކުރުމަށް ހުވާކުރައްވާފައެވެ. މެންބަރުން ވަނީ ހުވާކުރެއްވުމަށްފަހު ހުވާގެ އިޤްރާރުގައި ސޮއިކުރައްވާފައެވެ.

އެ ރަސްމިއްޔާތުގައި މަޖިލީހުގެ އަމީންއާއްމު ފާތިމަތު ނިއުޝާ ވަނީ 20 ވަނަ މަޖިލީހުގެ ޒިންމާތައް އަދާކުރުމަށް ފުރިހަމައަށް އެއްބާރުލުން ދެއްވާނެ ކަމުގެ ޔަޤީންކަން އަރުވާފައެވެ.

20 ވަނަ މަޖިލީހުގެ ބޮޑު ބައެއް ހިއްސާކުރަނީ ވެރިކަންކުރާ ޕީއެންސީގެ މެމްބަރުންނެވެ. އެގޮތުން މަޖިލީހުގައި ތިއްބަވާ 93 މެންބަރުންގެ ތެރެއިން ޕީއެންސީގެ 75 މެންބަރުން ތިއްބަވާނެއެވެ. އަދި މިނިވަން މެންބަރުންގެ ގޮތުގައި ތިއްބަވާނީ ދެ މެންބަރުންނެވެ.