ފުށް ލޮނު އުފެއްދުމުގެ ނަމުގައި ސަރުކާރުން ދައްކަނީ ހުސް މަންޒަރެއް - ބޮންޑާ
ދިވެހިރާއްޖޭގައި ލޮނު އުފައްދަން ބިޒްނަސް ސެންޓަރ ކޯޕަރޭޝަން (ބީސީސީ) އާއި ހަވާލުކޮށްފައިވޭ
މާފަންނު މެދު ދާއިރާގެ މަޖިލިސް މެންބަރު އިބްރާހީމް ރަޝީދު (ބޮންޑެ) ފަލަ ސުރުހީ ޕްރޮގްރާމްގައި ވާހަކަދައްކަވަނީ
ފުށް ލޮނު އުފެއްދުމުގެ ނަމުގައި ސަރުކާރުން ދައްކަނީ ހުސް މަންޒަރެއް ކަމަށް މާފަންނު މެދު ދާއިރާގެ މަޖިލިސް މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުންނެވެ. ބޮންޑާ ވިދާޅުވީ މި ސަރުކާރުން ކަންކަން ކުރުމުގައި އެއްވެސް ޕްލޭނެއް ނެތް ކަމަށެވެ. އަދި ސަރުކާރުގެ އަމަލުތައް ހުރީ ވަރަށް ބޮޑަށް މާޔޫސްވާ ގޮތަށް ކަމަށް އޭނާ ވިދާޅުވިއެވެ. ދުނިޔޭގެ އެހެން ޤައުމުތަކުގައި ވެރިކަމަށް އަންނަނީ ޝެޑޯ ކެބިނެޓަކާއި އެކު ވަރަށް ރަނގަޅަށް އިންތިޒާމުވެގެން ކަމަށް އޭނާ ވިދާޅުވިއެވެ. ނަމަވެސް މި ސަރުކާރު ވެރިކަމަށް އައި އިރު ސަރުކާރު ހިންގާ ޕީއެންސީ އަކީ ކުޑަ ކުޑަ ޕާޓީ އެއް ކަމަށް އޭނާ ވިދާޅުވިއެވެ. އަދި ސަރުކާރުގެ ވަޒީރުންގެ ގޮތުގައި ވެސް ތިބީ ކުއްލިއަކަށް އެ މަޤާމަށް އައްޔަން ކުރެއްވި ބޭފުޅުން ކަަމަށް ފާހަގަކުރެއްވިއެވެ. އެހެންކަމުން ސަރުކާރު ދިފާއުކުރަން އަދި ސަރުކާރަށް ކަންކަން ކުރެވޭކަން ދެއްކުމަށް ކޮންމެވެސް ވާހަކަތަކެއް ދައްކަން އެ ވަޒީރުންނަށް މަޖުބޫރުވާ ކަމަށެވެ. ފުށް ލޮނު ހެދުމުގެ ވާހަކަ އަކީ އެފަދަ ވާހަކަ އެއް ކަމަށް ބޮންޑާ ވިދާޅުވިއެވެ. މި ސަރުކާރުން އަބަދުވެސް ދައްކަނީ ކޮންމެވެސް އެއް ދިރާސާ އެއް ކުރާ ވާހަކަ ކަމަށާއި އެއީ ތާކުންތާކު ޖެހޭ ވާހަކަތަކެއް ނޫން ކަމަށް ވެސް މެމްބަރު ވިދާޅުވިއެވެ.
އޭނާ އެފަދައިން ވިދާޅުވެފައި ވާއިރު ދިވެހިރާއްޖޭގައި ލޮނު އުފައްދަން ބިޒްނަސް ސެންޓަރ ކޯޕަރޭޝަން (ބީސީސީ) އާއި ހަވާލުކޮށްފައިވާ ކަމަށް އިކޮނޮމިކް މިނިސްޓަރ މުހައްމަދު ސައީދު ވަނީ ވިދާޅުވެފައެވެ. ސައީދު ވިދާޅުވީ ރާއްޖޭގައި ތަފާތު އެކި ސިނާއަތްތައް ކުރިއެރުވުމުގެ ވިސްނުން ސަރުކާރުން ގެންގުޅޭ ކަމަށެވެ. އެގޮތުން ރާއްޖެއަކީ ވަށައިގެން ބޮޑު ކަނޑެއް އޮތް ޤައުމެއް ކަަމަށް ވުމާއި އެކު އެކަމުގެ ބޭނުން ފުރިހަމައަށް ހިފުން މުހިންމު ކަމަށް ސައީދު ވަނީ ވިދާޅުވެފައެވެ. ދިވެހިރާއްޖޭގައި ލޮނު އުފެއްދުމުގެ މަސައްކަތް ފެށުމަށް ހަވާލުކޮށްފައި ވަނީ ބިޒްނަސް ސެންޓަރ ކޯޕަރޭޝަން، ބީސީސީ އާ ކަމަށް އޭނާ ވިދާޅުވިއެވެ. އެހެންނަމަވެސް އެ މަރުހަލާ އަށް ކިހާ ދުވަހެއް ހޭދަވާނެކަން އޭނާ ހާމައެއް ނުކުރައްވައެވެ. ސައީދު ވަނީ އުންމީދަކީ މި 5 އަހަރު ދުވަހުގެ ތެރޭގައި އެކަން ކޮށް ނިންމުންކަމަށެވެ.
