ގާޒާގެ ރަފާ ސިޓީއަށް ދެމުންދާ ހަމަލާތައް ވަގުތުން ހުއްޓާލަން އިންޓަނޭޝަލް ކޯޓް އޮފް ޖަސްޓިސް (އައިސީޖޭ) ގެ 15 ފަނޑިޔާރުންގެ ބެންޗުން އިޒްރޭލަށް އަމުރު ކޮށްފިއެވެ.
އދ. އެންމެ މަތީ ކޯޓުން ހުކުރު ދުވަހު ނެރުނު އަމުރުގައި ވަނީ ރަފާ ސިޓީއަށް ދެމުންދާ ހަމަލާތައް ވަގުތުން ހުއްޓާލައި އެތަނުން އިޒްރޭލް ސިފައިން ފޭބުމަށެވެ.
އިޒްރޭލުން ގާޒާގައި ހިނގަމުންދާ އަނިޔާވެރި ޖަރީމާތަކުގެ ސަބަބުން ފަލަސްތީންގެ ރައްޔިތުންނަށް އިންތިހާގެ ނުރައްކާ ވަމުންދާތީ އެކަން ހުއްޓުވުމަށް އިޒްރޭލްގެ މައްޗަށް މި އަމުރު ނެރުމަށް އެދި މައްސަލަ ހުށަހެޅީ ދެކުނު އެފްރިކާއިންނެވެ.
އައިސީޖޭއިން ނެރޭ އަމުރަކީ ގާނޫނީ ގޮތުން ބޯލަބަންޖެހޭ އެއްޗެއް ކަމުގައި ވިޔަސް އެ ކޯޓަކީ ހުކުމް ތަންފީޒް ކުރުމުގެ ވަސީލަތްތައް ލިބިފައިވާ މުއައްސަސާއެއް ނޫނެވެ.
