20 ވަނަ ރައްޔިތުންގެ މަޖިލީހުގެ ރައީސަށް އަބްދުއް ރަހީމް
23 މެއި 2024 | ބުރާސްފަތި 13:40ޕީއެންސީން ގެންނާނެ ބޭފުޅަކާ މެދު ކުރެވުނު ބަހުސްގައި އަބްދުއްރަހީމްގެ ނަން ހުށަހެޅުއްވީ ރައީސް މުއިއްޒު
އަބްދުއްރަހީމް އާއި ރައީސް ޑރ މުޙައްމަދު މުއިއްޒު
ކުރިއަށް އޮތް 20 ވަނަ ރައްޔިތުންގެ މަޖިލީހުގެ ރައީސް ކަމަށް އަބްދުއްރަހީމް ހަމަ ޖައްސަވަން ރައީސް ޑރ މުއިއްޒު ނިންމަވާފައވ ކަމަށް އަބްދުއްރަހީމް ވިދާޅުވެއްޖެއެވެ.
"މިހާރު" ނޫހަށް ބުރާސްފަތި ދުވަހު އަބްދުއްރަހީމް ދެއްވި ބަސްދީގަތުމެއްގައި މަޖިލީހުގެ ރައީސް ކަމަށް ޕީއެންސީން ގެންނާނެ ބޭފުޅަކާ މެދު ކުރެވުނު ބަހުސްގައި އަބްދުއްރަހީމްގެ ނަން ހުށަހެޅުއްވީ ރައީސް މުއިއްޒު ކަމަށާއި "ރައީސް ހުށަހެޅުއްވުމާއެކު އެކަން ވަނީ ނިމިފައި" ކަމަށް އަބްދުއްރަހީމް ވިދާޅުވިއެވެ.
މީގެ އިތުރުން 20 ވަނަ މަޖިލީހުގެ ނައިބު ރައީސް ކަމަށް ދިއްގަރު ދާއިރާގެ ގޮނޑިއަށް އިންތިޚާބުވި އަހްމަދު ނާޒިމް ގެނައުމަށް ރައީސް ޑރ. މުއިއްޒު ނިންމަވާފައިވާ ކަމަށް އަބްދުއްރަހީމް އާ ހަވާލާދީ "މިހާރު" ނޫހުގައި ވެއެވެ.
އަބްދުއްރަހީމް ވިދާޅުވި ގޮތުން، މަޖީލިހުގެ ތަޅުމަށް މަޖިލީހުގެ ރައީސް ކަމަށާއި ނައިބު ރައީސް ކަމަށް ޕީއެންސީން ހުށަހަޅާނީ ޑރ މުއިއްޒު ނިންމަވާފައިވާ ނަންތަކެވެ.
20 ވަނަ ރައްޔިތުންގެ މަޖިލީހުގެ ސްޕަރ މެޖޯރިޓީ ޑރ މުއިއްޒު ނިސްބަތްވެ ވަޑައިގަންނަވާ ޕީއެންސީ އަށް އޮތުމާއެކު 20 ވަނަ މަޖިލީހުގެ މަގާމުތަކަށް ހޮވޭނީ އެޕާޓީން ތާއީދު ކުރާ ކެންޑިޑޭޓުންނެވެ.
ގިނަ ބަޔަކު ބުނަމުންދަނީ 20 ވަނަ މަޖިލީސް ވާނީ ރައީސް މުއިއްޒުގެ "ރަބަރ ސްޓޭމްޕް" މަޖިލީހެއް ކަމަށެވެ.
