ހުސްގޮނޑި ބާކީވި ގޮތަށް ވަޒީފާއަށްނެގި ކުދިންކޮޅު ބާކީވަނީ

މިފަހަރުވެސް ކަންވެ ނިމުނީއެވެ. މަޖިލީހުގެ ސުޕަރ މެޖޯރިޓީ ލިބި "ބަންޑާރަ ހަސަނަށް މޫދު ހިތަކަށް ލިބުނުހެން" ތިންބާރު އަތްމައްޗަށް ހެޔޮވަރަށް ފިރުކާލެވުނީއެވެ. ގައުމު ހިންގާނެ ގޮތަކަށް ހިންގާން، ވެރިކަމުގައި ޖަހާނެހާ ސަކަރާތެއް ޖަހާން ހުރިހާ ބާރެއް މުތުލަގަށް ލިބުނީއެވެ. ކިޔޭނެ އެއްޗެއް، ލެވޭނެ ހަޅޭކެއް އަދި ޖެއްސޭނެ ވައްވަކެއް އަމުދުން ނެތުނީއެވެ. ކިތަންމެ ތުންފިއްތިއަސް ހޭކޭނެ ބޮޑަލެއްވެސް ދެނެއް ނެތެވެ.

ގާތުގައި ލައިގެން ގެންގުޅުނު ކުދިންނަށް ވިސްނެން ފެށޭނީ ދެނެވެ. ވާނުވާ ހިތަށް އަރާނީވެސް މިހާރުއެވެ. ހަމަރަނގަޅަށްވެސް "ރިޔާ ދަށުވެއްޖެ" ކަމުގެ އިހްސާސް މިހާރު ކުރެވޭނެއެވެ. "ކެޔޮގަނޑު ކަނޑާލެވުނީއެވެ. ގަހުގެ ބޭނުމެއް ދެނެއް ނޯންނާނެއެވެ". "ބާނާފައި އެއްލާލި ކޮރަކައްޔެއް ތެޅޭހެން ތެޅިތެޅި" މަރުވަންދެން ޖެހޭނީ އޮންނާށެވެ. ހިތްވަރުކޮށްފައި "ތެޅުނު ވަރަކަށް ދާނީ ހުޅުނބެވެ".

ދައްކާން މިއުޅޭ ވާހަކަ މިހާރު ފަހުމުވެއްޖެ ދޯއެވެ. ކިޔާން މިއުޅެނީ ކީކޭކަން އެނގެން ފަށައިފިދޯއެވެ.

މިހާރުގެ ކުދިން ބުނާހެން "ގެޓް ނުވަންޏާ" އެއްކަލަ "ހުސްގޮނޑި" މަތިން ހަނދާން އާކޮށްލާށެވެ. ރިޔާސީ އިންތިޚާބުގެ ކެންޕޭން ދުވަސްވަރާ ހަމައަށް ކުޑައިކޮށް ފަހަތަށް ސޮއްސާލާށެވެ.

ނިމިދިޔަ ރިޔާސީ އިންތިޚާބުގެ ކެންޕޭނުގައި ޑރ މުއިއްޒުގެ އެންމެ ބާރުގަދަ ހަތިޔާރަކަށް ބޭނުން ކުރެއްވީ " ހުސްގޮނޑި" އަކާއި އިސްކޮޅު ހުންނަވަރުގެ " ރައީސް ޔާމީންގެ ފޮޓޯފުޅެކެވެ." އެންމެ ގިނައިން ބޭނުން ކުރެއްވި ބަސްފުޅަކީ ނުވަތަ ޖުމްލައިގާ އެންމެ ގިނައިން ވިދާޅުވީ ރައީސް ޔާމީންގެ ނަންފުޅެވެ. ޕީޕީއެމް ޕީއެންސީގެ މެންބަރުންގެ ލޭ ކައްކުވާލުމަށެވެ. އެހެން މީހަކަށް ވޯޓުލިޔަ ނުދީ ޑރ މުއިއްޒަށް ވޯޓު ދޭންޖެހޭކަމަށް ވިސްނައިދިނުމަށެވެ.

އިންތިޚާބު ނިމި ވެރިކަމަށް ވަޑައިގެންނެވުނީމާ ކަންވީގޮތް ކޮންމެހެން އަހަރެން ބުނެދޭކަށް ނެތީމެވެ. އެކަން ނޭނގޭ މީހަކު މި "އުޑު ބަޅުކުރި" ހިސާބަކު ނުހުންނާނެއެވެ. އެކަމަކު އެވާހަކަ އަޑުނޭހީ ސަރުކާރުގެ ވަޒީފާތަކަށް ލޯއަޅައިގެންތިބި މީހުންނެވެ. ކޮންމެވެސް ހިސާބަކުން ލިބޭނެ މަގާމަކަށް ހިތްކިޔަކިޔާތިބި ކުދިންނެވެ. އެވެރިންނަށް "ހުސްގޮނޑިއާ" "ޔާމީންގެ ފޮޓޯފުޅު"ގެ ވާހަކަވީ ބޮޑު ޖޯކަށެވެ. ސަރުކާރަށް ފާޑުކިޔާންވެގެން ޔާމީންގެ ސަޕޯޓަރުންނާ ގާތްމީހުން ކިޔާ އުޅޭ ފިލިކޯޅި ހަމަނުވާ ޅެންބައިތެކެވެ. "ކުރައެއްގައި އޮންނަ ބޮކަށް ފެން ބޮވޭވަރު" ނޭނގޭހެން ޑރ މުއިއްޒުގެ އަސްލު އަމާޒު އެކުދިންނަށް އޭރު ރޭކާވެސް ނުލިއެވެ. އެއަށްވުރެ ބޮޑަށް ހިތުގައި އޮތީ އެއްކަލަ ބޮޑު ވަޒީފާއެވެ. އޭގެ އަވައިގާ ފިތިބާރުވެ "ބެދޭމަޅި" ޚިޔާލަށް ގެންނާންވެސް އޭރު ބޭނުން ނުވީއެވެ.

ރައީސްކަމަށް ވަޑައިގެންނެވުނީމާ "ހުސްގޮނޑިއަކާ ހުސްގޮނޑިއެކެވެ. "ފޮޓޯ ފުޅަކާ ފޮޓޯފުޅެއް" ދޫކޮށްލައްވައި ގާތަށް ދަންމަވައިގަތީ އެކުދިންނެވެ. ގެންފައި ނެއްޓި ނުދާނޭހެން " އެތެރެބަނޑަށް ދަންދެން ކާންދިނީ" އެކުދިންނަށެވެ. ވަޒީފާތައް އޮއްސާލިއެވެ. އެކި ނަންނަމުގައި ވަޒީރުން އެއްވެސް މަސައްކަތެއް ނެތަސް ލެއްވީއެވެ. ސްޓޭޓް މިނިސްޓަރުން އިންތިހާއަށެވެ. ޑެޕިއުޓީ މިނިސްޓަރުން ލެއްވީ ހައްދެއް ނެތިއެވެ. ޕޮލިޓިކަލް ޑައިރެކްޓަރުންނާ މިޝަންތަކަށް ސުމާރެއް ނެތިއެވެ. ތަފާތު ނަންނަމުގައި މަގާމްތައް އުފައްދައިގެންވެސް ބަހާ ނެގީއެވެ. މީހުން ގިނަވެގެން ބަނގުރޫޓުވެފައިވާކަމަށް ބުނި ފެނަކައާ، އެމްއާރުޑީސީ ފަދަ ކުންފުނިތަކުން ހަބޭހަށް މީހުން ނެގީއެވެ. ރަށްރަށުގެ އާއިލާތައް ހުރިހުރި ގޮތައް އެތަންތަނަށް ކަހާލީއެވެ. ބޭނުމަކީ ހަމަ އެންމެ ބޭނުމެކެވެ. މަޖިލިސް އިންތިޚާބު ކާމިޔާބު ކުރުމެވެ. އެހިސާބު ޖައްސަވައިގެން ރަށްރަށުގެ މެޖޯރިޓީ ނަންގަވަން ބޭނުންވާ އަދަދަށް އިދިކޮޅު އެމްޑީޕީގެ މީހުންނަށްވެސް ވަޒީފާ ދީފައި "ހޭހަން ކޮށްލީ" އެވެ.

އިސާހިތަކު ޑރ މުއިއްޒުގެ ހިސާބު ސާފު ސީދަލެވެ. ރަމަލާ ފާލު ބަލައިގެންނަމަވެސް އެކަމަށްޖެހި ހިސާބު ރަނގަޅަށްވެސް ދިމާވީއެވެ. މަޖިލިސް  ކާމިޔާބު ކުރެއްވުނީއެވެ. އަތްގުޅިނުކާހާ ބޮޑުތަނުންނެވެ.

ރިޔާސީ އިންތިޚާބެކޭ އެއްގޮތައް މަޖިލިސް އިންތިޚާބަށް "ޖެއްސެވި ބޮޑު ކަޑައިގެ" ބޭނުން ހިފުނީއެވެ. ދެނެކާ ދެނެއް ނެތެވެ. އަސްލު ސޫރައަށް ޖެހިވަޑައިގަތީއެވެ. ކުރިން ތުރުކުރައްވައިގެން ހުންނެވި ކޯޓު ބާލުއްވައި ކޮނޑުގައި އަޅުވާލެއްވީއެވެ. ފުރަތަމަ ފަހުމީއާ ހަމައިންނެވެ. ބަޔަކު ފާޑުކީތީ ބޭރުކޮށްލި ފަހުމީ ގެނެސް މަގާމަށް ވެޑުވީއެވެ. ހެދުނު މިސްޓޭކް އޯކޭ ވީއެވެ. ބޮލިރަވައެއްހެން ގެންގުޅުނު " ކުޑީމެން" ކުދިން ވަކިކުރީއެވެ. އެއޮއްބޮޑު އެޗްޑީސީގެ ޗެއަރމަން ޒުހޫރުވެސް މިހާރު ކަމުނުދިޔައީއެވެ. ޑެޕިއުޓީ މިނިސްޓަރުންގެ ސަސްޕެންޝަނާ ހުރެ ރޮއެ ހޭރެނީއެވެ. އެކި ދިމަދިމާލަށް ނޯޓިސްތަކާއި ސިޓީތައް ލައްގަން ފެށީއެވެ. ބަލަބަލާ ތިއްބާ ވަޒީފާތައް ގެއްލެން ފެށީއެވެ. ކުންފުނިތަކަށް ލީ ކުދިންގެ "ކޮންޓްރެކްޓް" ހަމަވީއެވެ. އާއިލާތައް ގިސްލެވި ބިމަށް ބޯހަރާލަން ޖެހުނީއެވެ.

ކަންވެ ނިމުނީއެވެ. އެންމެ ގާތް ކުދިންކޮޅު ނޫން އެންމެން ހަފޮޅުން ބޭރުވާނެއެވެ. މެންބަރުން ރުއްސަން ދޮޅަހަކަށް މީހުންނާއި އިންތިޚާބުގައި ނުހޮވުނު ބައެއް މީހުން އަދި ދިމަދިމާލަށް ލައިފާނެއެވެ. އެކަމަކު މީހަކަށްފަހު މީހަކު ދެން ޖެހޭނީ ހުސްއަތާ ނުކުންނާށެވެ. އާދަމް ރަމީޒާއި ވައިތެޔޮ އަބްދުﷲ މެން ފަދައިން ނަމެއްގައި ބޭތިއްބިއަސް ދެންތިބި ކުދިން ޖެހޭނީ ފުރަފޭލި ބަނދެގެން އޮޑިއަށް އަރާށެވެ. ހުޅަނގު މޫސުމާއި ޖޫން ޖުލައިގެ ގަދަ ކޮޅިގަނޑުތައް ފަދައިން އެވެރިން އެދަނީ ބުރުއްސާލަމުންނެވެ. ކުރެވޭނެ ޝަކުވާއެއް ދެއްކޭނެ ބަހާނާއެއް ނެތި ހުސްގޮނޑި ބާކީވި ގޮތަށް ވަޒީފާއަށްނެގި ކުދިކޮޅު ބާކީވަނީއެވެ.