އައިއެމްއެފްއިން ބުނާގޮތާއި ސަރުކާރުގެ އަމަލު ދިމާނުވޭ، މިދެވެނީ އިގްތިސާދީ ކާރިސާއަކާ ދިމާލަށް - ހަސަން ލަތީފް

ރާއްޖޭގެ އިގްތިސާދީ އަދި މާލީ ހާލަތާއި ގުޅޭގޮތުން އައިއެމްއެފްއިން ބުނާގޮތާއި ސަރުކާރުގެ އަމަލު ދިމާނުވާ ކަމަށާއި، މިސްރާބު ދަނީ އިގްތިސާދީ ކާރިސާއަކާ ދިމާލަށް ކަމަށް ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވީ ބައިނަލްއަގުވާމީ އެކިއެކި ޖަމިއްޔާތަކުން، ހާއްސަކޮށް ގިނަ ގައުމުތައް ބައިވެރިވާ އަދި ގަބޫލުކުރާ ޖަމިއްޔާތަކުން ދައްކާ ވާހަކަތައް ގަބޫލުކުރަންޖެހޭ ކަމަށެވެ. އެގޮތުން އައިއެމްއެފްއިން ރާއްޖޭގެ އިގްތިސާދާއި ގުޅޭގޮތުން ނެރުނު ރިޕޯޓުގައި ކަންބޮޑުވާ ކަންކަން އެބަހުރި ކަމަށް މެންބަރު ވިދާޅުވިއެވެ.

އެގޮތުން އެތެރެއާއި ބޭރުގެ ދަރަނީގެ ސަބަބުން ރާއްޖެ އޮތީ ނުރައްކަލެއްގެ ތެރޭގައި ކަމަށާއި، އެކަންވެފައިވަނީ ރާއްޖެއިން ގެންގުޅޭ ސިޔާސަތުތަކަށް ބަދަލުތަކެއް ނުގެންނާތީ ދިމާވާކަމެއްގެ ގޮތުގައި ކަމަށް މެންބަރު ހަސަން ލަތީފް ފާހަގަކުރެއްވިއެވެ.

މެންބަރު ހަސަން ލަތީފު ވިދާޅުވީ މި ތިން ކަންކަން ކުރުމަށް ރާއްޖެއަށް ގޮވާލާފައިވާ ކަމަށާއި، އެކަންކަން ނުކޮށްފިނަމަ ބޮޑު އިގްތިސާދީ ކާރިސާއަކަށް ރާއްޖެ ދާނެކަމަށް އަންދާޒާ ކުރެވޭކަމަށް ރިޕޯޓުގައި ބަޔާންކޮށްފައިވާ ކަމަށެވެ.

މެންބަރު ހަސަން ލަތީފް ވިދާޅުވީ ދިވެހި ރައްޔިތަކަށް ވަޒީފާއެއް ލިބޭތީ ކަންބޮޑުވެވަޑައިގަންނަވަނީ ނޫން ކަމަށާއި، ވަޒީފާއެއްނަމަ ކުރަންޖެހޭ މަސައްކަތް ވެސް ހުންނަންޖެހޭ ކަމަށެވެ. މީގެ އިތުރުން އެކިއެކި ޖޫރިމަނާ މައާފްކުރަމުންދާއިރު، ބޭރުގެ މަސްބޯޓެއް ރާއްޖެއަށް ވަގަށްވަދެ މަސްހިފަން އުޅެނިކޮށް ހިފަހެއްޓާ 4 މިލިއަން ރުފިޔާއިން ކުރި ޖޫރިމަނާ ވެސް ސަރުކާރުން މައާފްކޮށްފައިވާ ކަމަށެވެ.

މިއީ ދައުލަތަށް ވަންނަ އާމްދަނީ ކަމަށާއި، ލިބެން ހުރި އާމްދަނީތަކުގެ ތެރޭގައި ޖޫރިމަނާއަކީ ވެސް އާމްދަނީގެ ބައިތަކުގެ ތެރޭގައި ހިމެނޭ އެއްޗެއް ކަމަށެވެ. އެހެންކަމުން ފެންނަމުންދަނީ ރައީސް މުއިއްޒު ދެއްކެވި ވާހަކަފުޅުތައް ދިމާނުވާތަން ކަމަށާއި، އައިއެމްއެފްގައި ބުނާ ކަންކަމާއި، ރައީސް މުއިއްޒު ދައްކަވާ ވާހަކަފުޅާއި، އޭސީސީން ދައްކާފައި ހުރި ވާހަކަތައް ދިމާނުވާ ކަމަށެވެ.

އަދި އައިއެމްއެފްއިން ބުނާގޮތަށް ރާއްޖެއިން އަމަލުނުކޮށްފިނަމަ އިގްތިސާދީ ކާރިސާއަކާއި ދިމާލަށް ރާއްޖެ ދާނެކަމަށް ގަބޫލުކުރައްވާ ކަމަށް ވެސް މެންބަރު ހަސަން ލަތީފް ވިދާޅުވިއެވެ.