ރައްޔިތުންގެ މަޖިލީހުގެ ޖަލްސާތައް ގަވާއިދުން ނުބޭއްވޭނަމަ ސަރުކާރުން ކަންކުރާނީ ބޭނުންގޮތަކަށް ކަމަށް ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވެއްޖެއެވެ.

މަޖިލީހުގެ ގަވާއިދުގައިވާ ގޮތަށް ހަފްތާއަކު މަދުވެގެން 3 ދުވަހު މަޖިލީހުގެ އާންމު ޖަލްސާތައް ބޭއްވުމަށް ގޮވާލާ ހުށަހަޅާފައިވާ މައްސަލައަށް ބަހުސް ކުރައްވަމުން މެންބަރު ހަސަން ލަތީފް ވިދާޅުވީ ސަރުކާރުން ކުރާ ކަންކަމަށް ފާރަވެރިވާން އޮންނަ މުއައްސަސާއަކީ، ރައްޔިތުންގެ މަޖިލިސް ކަމަށެވެ. އަދި މެންބަރުން އެއްކައިރިއަށް ޖެހިލައިފިއްޔާ، ސަރުކާރުން ކުރަމުންގެންދާ ކަންކަން ކުރަމުން ގެންދާނި މަޖިލިސް އެއީ ނެތްތަނެއް ކަމަށްބަލައިގެން ކަމަށެވެ. މެންބަރު ހަސަން ވިދާޅުވީ މަޖިލީހަކީ ނެތް ތަނެއް ކަމަށް ބަލައިގެން ސަރުކާރުން މަސައްކަތް ކުރާނެ ކަމަށާއި، ދެން ފެނިގެންދާނީ ޖަވާބުދާރިވުން، އެ މަފްހޫމް ނެތް ގޮތެއްގައި ސަރުކާރެއް ހިންގާ މަންޒަރު ކަމަށެވެ.

މެންބަރު ވިދާޅުވީ އޭގެ ސަބަބުން ރައްޔިތުންނަށް ވަރަށް ގިނަ ގެއްލުންތަކެއް ވެގެންދާނެ ކަމަށެވެ. ސަރުކާރުން ފައިސާއާއި މުދާ ނަހަމަ ގޮތުގައި އެކި ތަންތަނުން އެކި މިންވަރަށް ބޭންކުރަމުން ގެންދާނެކަމަށާއި، އެއީ ދިވެހި ރައްޔިތުން އެދޭނެ ގޮތެއް ނޫން ކަމަށާއި، މަޖިލީހާ ހަވާލުކޮށްފައި ހުރި މަސައްކަތަށް ބަލާއިރު ވެސް އެއީ ދޫކޮށްލައިގެންވާނެ ކަމެއްނޫން ކަމަށެވެ.

މެންބަރު ހަސަން ވިދާޅުވީ މަޖިލީހުގައި މި ވަގުތުހުރި މަސައްކަތަށް ބަލާއިރު، އެތައް ބައިވަރު ބިލެއްގެ މަސައްކަތް ކޮމިޓީތަކުގައި އެބަހުރި ކަމަށެވެ. އަދި އެ މަސައްކަތް ވެސް ކުރަންޖެހޭ ކަމަށާއި، ކޮމިޓީތައް ވެސް ބާއްވަންޖެހޭ ކަމަށެވެ. މީގެ އިތުރުން ސަރުކާރު ޖަވާބުދާރީ ކުރުމުގެ ގޮތުން ކުރާ އެތައް ކަމެއްގެ ތެރޭގައި ވަޒީރުންނާއި ސުވާލުކުރުންވެސް ހިމެނޭ ކަމަށެވެ.

މެންބަރު ހަސަން ވިދާޅުވީ ސަރުކާރު ޖަވާބުދާރީ ނުކުރެވޭނަމަ ސަރުކާރުން އޭގެ ނާޖާއިޒް ފާއިދާ ނަގާނެ ކަމަށާއި، އެކަން ހުއްޓުވުން އެއީ ރައްޔިތުންގެ މަޖިލީހުގެ އަތްމަތީގައި އޮތްކަމެއް ކަމަށެވެ.