ރައީސް މުއިއްޒަށް އެނގިވަޑައިނުގެން މި ސަރުކާރުގައި ކިތަންމެ ބޮޑުކަމެއްވެސް ހިނގާފާނެ - ހަސަން ލަތީފް
ރައީސް މުއިއްޒު ވިދާޅުވިޔަސް، ވިދާޅުވާހާ ކޮންމެ އެއްޗަކީ ތެދުފުޅަކަށް ވެދާނެ ކަމަށް ގަބޫލުނުކުރައްވަން
ހެންވޭރު ހުޅަނގު ދާއިރާގެ މެންބަރު ހަސަން ލަތީފް
ރައީސް މުއިއްޒަށް އެނގިވަޑައިނުގެން މި ސަރުކާރުގައި ކިތަންމެ ބޮޑުކަމެއްވެސް ހިނގާފާނެ ކަމަށާއި، އެމަނިކުފާނު ވިދާޅުވާ ހުރިހާ ވާހަކައަކީ ތެދުފުޅުކަށް ނުވެދާނެކަމަށް ހެންވޭރު ހުޅަނދު ދާއިރާގެ މެންބަރު ހަސަން ލަތީފް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން މެންބަރު ހަސަން ލަތީފް ވިދާޅުވީ ހަމަ ހަގީގަތުގައި ވެސް ރައީސުލްޖުމްހޫރިއްޔާ ހުންނެވީ ރައީސުލްޖުމްހޫރިއްޔާއަކަށް ނޫން ކަމަށެވެ. އަދި ރައީސް މުއިއްޒަށް އެނގިވަޑައިނުގެން މި ސަރުކާރުގައި ކިތަންމެ ބޮޑުކަމެއްވެސް ހިނގާފާނެ ކަމަށާއި، އެކަން ފުރިހަމައަށް ގަބޫލުކުރައްވާ ކަމަށެވެ. އަދި ރައީސް މުއިއްޒު ވިދާޅުވިޔަސް، ވިދާޅުވާހާ ކޮންމެ އެއްޗަކީ ތެދުފުޅަކަށް ވެދާނެ ކަމަށް ގަބޫލުނުކުރައްވާ ކަމަށާއި އެކަމުގެ ވެސް އެތައް ބައިވަރު ސަބަބުތަކެއް އެބަހުރި ކަމަށެވެ.
މެންބަރު ހަސަން ވިދާޅުވީ މިވެނިއެވެނި ކަމެއް ހިނގި ގޮތެއް އެމަނިކުފާނަށް އެނގިވަޑައިނުގަންނަވާ ކަމަށް ރައީސް މުއިއްޒު ވިދާޅުވި ނަމަވެސް އެއީ ރައީސް މުއިއްޒަށް އެކަން އެނގިވަޑައިނުގެން ހުންނަވާނެ ސަބަބެއް ނޫން ކަމަށެވެ. އެއީ އެހެން އޮންނަ ކަމެއް ނޫން ކަމަށާއި، ނަމަވެސް ހަގީގަތުގައިވެސް ރައީސް މުއިއްޒަށް ސަރުކާރުގެ ތެރޭގައި ހިނގާ ކަންކަން އެނގިވަޑައިނުގެން ވެސް ހުންނަވާފާނެކަމަށް މެންބަރު ހަސަން ވިދާޅުވިއެވެެ.
މެންބަރު ހަސަން ވިދާޅުވީ ބައެއް ކަހަލަ ގާނުނީ ކަންކަމުގައި ނިންމަވާ ނިންމެވުން ވެސް މިފަދަ ކަންކަމުގެ ތެރޭގައި ހުންނަ ކަމަށެވެ. މިކަމަށް އިޝާރާތްކުރައްވާ މެންބަރު ހަސަން ވިދާޅުވީ ގާނޫނެއް ތަސްދީގުނުކުރައްވާ މަޑުކޮށްލަވައިގެން ރައީސް މުއިއްޒު ހުންނެވި ކަމަށާއި، އެއީވެސް ދެވަނަ ފަހަރަށް ރައްޔިތުންގެ މަޖިލީހުން އެ ބިލު ފާސްކުރުމުން ކަމަށް ވެސް މެންބަރު ހަސަން ވިދާޅުވިއެވެ.
މެންބަރު ހަސަން ލަތީފް އިޝާރާތް ކުރައްވާފައިވަނީ ރައްޔިތުންގެ މަޖިލީހުގެ އިންތިހާބު ރޯދައިގެ ފަހުން ބޭއްވުމަށް އިންތިޚާބުތަކާބެހޭ އާންމު ޤާނޫނަށް އިސްލާޙް ގެނައުމުގެ ގާނޫނަށް ގެނައި އިސްލާހުގެ ވާހަކައެވެ. ރޯދަ މަހުގެ ތެރޭގައި އިންތިހާބު ބާއްވާނަމަ އެކަމުގައި ހުރި ހުރަސްތައް ގިނަކަމުން މަޖިލީހުން ނިންމީ ރޯދަ މަސް ނިމި 10 ދުވަސް ފަހުން އިންތިހާބު ބާއްވާށެވެ.
ނަަމަވެސް އިންތިޚާބުތަކާބެހޭ އާންމު ޤާނޫނަށް އިސްލާޙް ގެނައުމުގެ ބިލު ފުރަތަމަ ފޮނުވާލުމުން، ދެ ހަފްތާ ވަންދެން އެ ބިލު ތަސްދީގުނުކުރައްވާ ބޭއްވުމަށްފަހު އަލުން އަނބުރާ މަޖިލީހަށް ރައީސް މުއިއްޒު ފޮނުއްވިއެވެ. އަދި އަނެއްކާވެސް ބިލު އޮތް ގޮތަށް މަޖިލީހުން ފާސްކޮށް ގާނޫނަކަށް ބަދަލުކުރިއެވެ. ނަމަވެސް ދެވަނަ ފަހަރަށް ފޮނުވުމުން ވެސް ގާނޫނު ތަސްދީގުނުކުރައްވާ އެތައް ދުވަހެއް ވަންދެން މަޑުކުރައްވައިގެން ހުންނެވިއެވެ.
