މި ސަރުކާރުން ދައްކަނީ ހުސް ކުރެހުން ކަމަށާއި، މަޝްރޫއެއް ނުހިންގޭކަމަށް ދިއްދޫ ދާއިރާގެ މެންބަރު އަބްދުﷲ ވަހީދު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން މެންބަރު ވަހީދު ވިދާޅުވީ، ސަރުކާރުން ރައްޔިތުންނަށް ގިނަ ކުރެހުންތަކެއް ދައްކާފައިވާ ކަމަށެވެ. ނަމަވެސް އެއިން އެއްވެސް މަޝްރޫއެއްގެ އަމަލީ މަސައްކަތް ފެށޭނެ ދުވަހެއް ނޭނގޭކަމަށް ވަހީދު ވިދާޅުވިއެވެ.

ރަސްމާލޭ ޕްރޮޖެކްޓަކީވެސް ވެރިކަމަށް އައިސް ރައްޔިތުންނަށް ކަމެއް ކޮށްދޭނެކަން ދެއްކުމަށްޓަކައި ފަށަން ނިންމި ޕްރޮޖެކްޓެއްކަމަށް އޭނާ ވިދާޅުވިއެވެ.

ވަހީދު އިތުރަށް ވިދާޅުވީ، މިހާރުވެސް ކުރިއަށްދާ ކަންކަމަކީ ނިމިދިޔަ އެމްޑީޕީ ސަރުކާރުން ފަށާފައިވާ ކަންކަން ކަމަށާއި، މި ސަރުކާރުގައި ތަރައްޤީގެ މެނިފެސްޓޯއެއް އޮތްކަމަށް ފެންނަމުން ނުދާ ކަމަށެވެ.

ރަސްމާލެ މަޝްރޫއުވެސް މަޑުޖެހިފައިވަނީ އެއްވެސް ޕްލޭނެއް ނެތި އެ މަސައްކަތް ފެށުމުންކަން ވަހީދު ފާހަގަ ކުރެއްވިއެވެ.

ކަން އެހެން އޮތްއިރު، ހާމަކަން ބޮޑު ވެރިކަމެއް ކުރާނެކަމުގެ ވައުދާއެކު އައި ސަރުކާރަކުން އެކަންކަން ރައްޔިތުންނަށް ސާފުކޮށްދޭންޖެހޭނެކަމަށްވެސް މެމްބަރު ވިދާޅުވިއެެވެ.

ފުށިދިއްގަރުފަޅު ހިއްކަނީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ)އަށް ޖުމްލަ 70 ހެކްޓަރު، ދިގު މުއްދަތަށް ދީގެންނެވެ. ބިން ދޫކުރުމަށް ނިންމައި، މަޝްރޫއު ފަށާފައިވާއިރު، ހުޅުމާލެއިން ދޫކުރި 10 ހެކްޓަރުގެ ބިމުގެ އަަގާއި ރަސްމާލެއިން ދޭ 60 ހެކްޓަރުގެ ބިމުގެ އަގަކީ ކޮބައިކަން، ނޫސްވެރިން އޭރު ތަކުރާރުކޮށް ސުވާލުކުރި ނަމަވެސް ސަރުކާރުން އޮޅުންފިލުވައިދީފައެއް ނުވެއެވެ.