އުފެއްދުންތެރި މަޖިލީހެއްގެ ގޮތުގައި މަސައްކަތްކުރާނެ މަޖިލީހަށް 20 ވަނަ މަޖިލިސް ވެގެން ނުދާނެ ކަމަށް ދިއްދޫ ދާއިރާގެ މެންބަރު އަބްދުﷲ ވަހީދު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން މެންބަރު ވަހީދު ވިދާޅުވީ މަޖިލީހުގެ މެޖޯރިޓީ ޕީއެންސީއަށް ލިބިފައިވާއިރުގައި، އެބޭފުޅުން ރައްޔިތުންނާއި ހަމައަށް އައި އިރުގައި އެ ބޭފުޅުންގެ ލެޖިސްލޭޓިވް އެޖެންޑާއެއް ހާމައެއް ނުކުރައްވާ ކަމަށެވެ. މެންބަރު އަބްދުﷲ ވަހީދު ވިދާޅުވީ 200ށް ވުރެ ގިނަ ބިލު މަޖިލީހުން ފާސްކުރަން ހުރި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވާއިރުގައި އެ ބިލުތަކަކީ ކޮބައިކަމެއް އިންތިހާބުގެ ތެރޭގައި ފާހަގަނުކުރައްވާ ކަމަށެވެ.

އެހެންކަމުން މަޖިލީހުގައި އެ ބޭފުޅުން ކުރަން ވިސްނާފައިވާ ކަމެއް ނެތް ކަމަށާއި، ރައްޔިތުންނަށް ފައިދާވާ އަދި ރައްޔިތުން އެދޭކަހަލަ މަޖިލީހެއް އޮންނާނެކަމަށް ގަބޫލުކުރައްވަން ދަތިކަަމަށް މެންބަރު ވިދާޅުވިއެވެ. ސަބަބެއްގެ ގޮތުގައި މެންބަރު ވިދާޅުވީ އެމްޑީޕީން 2019 ވަނަ އަހަރު މަޖިލީހަށް ނުކުތީ އެޖެންޑާ 19 ހިފައިގެން ކަމަށާއި، އޭގައި ރައްޔިތުންނަށް ފައިދާވާނެ ބިލްތައް ހުރި ކަމަށާއި، ރައްޔިތުންނަށް އެކަންކަން ކިޔައިދެވުނު ކަމަށެވެ.

ނަމަވެސް މިއަދު ފެންނަނީ މަޖިލީހަކީ ރައީސުލްޖުމްހޫރިއްޔާ ވިދާޅުވާގޮތަށް އަމަލުކުރާނެ މެންބަރުން އަންނާނެ ތަނެއްގެ ގޮތުގައި ކަމަށާއި، މަޖިލީހުގެ ރައީސް އާއި ނައިބްރައީސް ހޮވުމުގެ އިތުރުން ކޮމިޓީތައް އެކުލަވާލުމާއި މަޖިލީހުގެ ގަވާއިދު އިސްލާހުކުރުމުގެ ވިސްނުންވެސް އަލަށް އިންތިހާބުވި މަޖިލިސް މެންބަރުންގެ ތެރެއިން ސަރުކާރުގެ މެންބަރުންގެ ހުރީ ނިމިގެން މިދިޔަ 19 ވަނަ މަޖިލީހާއި އިދިކޮޅަށް ކަމަށެވެ.