މިއަދު ސިޔާސީ މަޤާމުތަކަށް އައްޔަނުކުރާ މީހުންގެ މައުލޫމާތަކީ ވަންހަނާ، ސިއްރު މައުލޫމާތު: މީކާއީލް
18 މެއި 2024 | ހޮނިހިރު 09:40ރައީސް ޑރ މުޙައްމަދު މުއިއްޒު ވެރިކަމަށް ވަޑައިގަތީ "މަތި ލުއި"، ކުޑަ ސަރުކާރެއް ހިންގަވާނެކަމަށް ވިދާޅުވަމުން
ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
މިއަދު ސިޔާސީ މަޤާމުތަކަށް އައްޔަނުކުރާ މީހުންގެ މައުލޫމާތަކީ ވަންހަނާ، ސިއްރު މައުލޫމާތަށް ވެފައިވާކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް ވިދާޅުވެއްޖެއެވެ.
ރާއްޖެޓީވީގެ "ފަލަސުރުޙީ" ޕްރޮގްރާމްގައި ވާހަކަ ދައްކަވަމުން މީކާއިލް ވިދާޅުވީ، ރައީސް ޑރ މުޙައްމަދު މުއިއްޒު ވެރިކަމަށް ވަޑައިގަތީ "މަތި ލުއި"، ކުޑަ ސަރުކާރެއް ހިންގަވާނެކަމަށް ދައްކަވަމުން ކަމަށެވެ.
އެހެންނަމަވެސް ދިވެހިރާއްޖޭގެ ތާރީޚުގައިވެސް ސަރުކާރަކުން އައްޔަނު ނުކުރާ ވަރަށް ސިޔާސީ މަޤާމުތަކަށް މީހުން އައްޔަނު ކޮށްފައިވާ ކަމަށާއި، ކުރިން ނެތް މަޤާމުތައް އުފައްދައި އެތައް ބަޔަކު އެ މަޤާމުތަކަށް އައްޔަނު ކުރަމުންދާކަން މީކާއީލް ފާހަގަ ކުރެއްވިއެވެ.
ރިޔާސީ ބަޔާން އިއްވަވަމުން ރައީސް މުއިއްޒު ވަނީ ކޮންމެހެން ޒަރޫރީ ޙާލަތެއްގައި މެނުވީ ސިޔާސީ މަޤާމުތަކަށް މީހުން އައްޔަނު ނުކުރައްވާނެ ކަމަށެވެ.
މީކާއީލް ވިދާޅުވީ، މަޖިލިސް އިންތިޚާބަށް ދެ ދުވަހަށް ވެފައިވަނިކޮށްވެސް ސިޔާސީ މަޤާމުތަކަށް މީހުން އައްޔަނު ކޮށްފައިވާ ކަމަށެވެ. އެގޮތުން މަޖިލިސް އިންތިޚާބުގެ ޕީޕީއެމް ޕީއެންސީ ޕްރައިމަރީގައި ނާކާމިޔާބުވި ފަރާތްތަކާއި، ނަން އަނބުރާ ގެންދިޔަ ފަރާތްތައް އޭގެ ތެރޭގައި ހިމެނެއެވެ.
އެހެންނަމަވެސް އެތައް މަޤާމުތަކަކަށް މީހުން އައްޔަނު ކުރަމުންދާއިރުވެސް އެއްވެސް ހާމަކަމެއް ނެތުމަކީ ކަންބޮޑުވުމެއްކަން ފާހަގަ ކުރައްވައި މީކާއީލް އިތުރަށް ވިދާޅުވީ، އެންމެ ކުޑަމިނުން މަޤާމުތަކުގައި ތިބީ ކޮން ބައެއްކަންވެސް މިއަދު ހާމަ ނުކުރާ ކަމަށެވެ.
އެއީ ކުރިން ފެންނަން ހުންނަ މައުލޫމާތުކަމަށް އޭނާ ވިދާޅުވިއެވެ.
މިއަދު ސިޔާސީ މަޤާމުތަކަށް އައްޔަނުކުރާ މީހުންގެ މައުލޫމާތަކީ ވަންހަނާ، ސިއްރު މައުލޫމާތުތަކަށްވެފައިވާކަންވެސް މީކާއީލް ފާހަގަ ކުރެއްވިއެވެ.
ސިޔާސީ އިސް މަގާމުތަކަށް އިތުރަށް މީހުން އައްޔަން ނުކުރަން ނިންމަވާފައިވާކަމަށް ރައީސް ޑރ މުއިއްޒު ރިޔާސީ ބަޔާން އިއްވަވަމުން ވިދާޅުވިނަމަވެސް، އޭގެ ފަހުންވެސް ގެންދެވީ މަޤާމުތަކަށް މީހުން އައްޔަން ކުރައްވަމުންނެވެ. ނަމަވެސް ފަހުން އައްޔަން ކުރާ ފަރާތްތަކުގެ މައުލޫމާތު ވެސް އާންމު ނުކުރާއިރު، އެއީ ވެބްސައިޓް މައްސަލައެއް ދިމާވެގެންކަމަށް ރައީސް އޮފީހުން ބުނެފައިވެއެވެ.
އަދި ސިޔާސީ މަޤާމުތަކަށް އައްޔަންކުރާ މީހުން މަސައްކަތް ނުކުރާނަމަ، އެމީހުން ވަޒީފާއިން ވަކި ކުރައްވާނެކަމަށް ވެސް ރައީސް ވިދާޅުވިއެވެ. ރައީސް ވިދާޅުވާ ގޮތުގައި މިހާރު އައްޔަން ކުރައްވާފައިވާ ފަރާތްތަކަށް އެވަނީ މަސައްކަތް ކުރުމަށް ފުރުސަތެއް ދެވިފައެވެ.
