ޕީއެންސީ އަށް ނިސްބަތްވާ ރައްޔިތުން މަޖިލީހުގެ މެންބަރު ސައުދުﷲ ހިލްމީގެ ކުންފުންޏެއް ކަމަށްވާ މިމްސް ޕްރައިވެޓް ލިމިޓެޑް އިން އޮޅުވާލައިގެން ފައިސާތަކެއް ނެގި މައްސަލައެއް ފެންމަތިވެއްޖެ އެވެ.

މި މައްސަލައިގައި އާންމު ފަރާތަކުން ކޮމިޝަނަރ އޮފް ޕޮލިސްއަށް ފޮނުވި ސިޓީގެ ކޮޕީއެއް ރާއްޖެ އެމްވީ އަށް ވަނީ ލިބިފައެވެ. އެ ސިޓީގައި ބުނެފައިވަނީ، ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެންމެ ފަހުން ނ. މަނަދޫގައި ބޭއްވި ރަސްމީ ޖަލްސާއެއްގައި ފާހަގަކުރެއްވި ގޮތުގައި އެ ރަށު ސްކޫލުުގެ އިމާރާތް ކުރުމަށް 2021 ވަނަ އަހަރު 360 ދުވަސްތެރޭގައި ނިންމުމަށް ހަވާލު ކުރި މިމްސް ޕްރައިވެޓް ލިމިޓެޑް (ސައުދުﷲ ހިލްމީ / އޯޝަން / ގދ. ތިނަދޫ) ނިމިފައިވަނީ 70 ނުވަތަ 75 އިންސައްތަ މަސައްކަތް ކަމަށެވެ. މިމްސް ކޮންސްޓްރަކްޝަން އިން އެ މަސައްކަތް ކުރުމަށް ހުށަހަޅާފައިވަނީ 15،361،325.49 (ފަނަރަ މިލިއަން ތިންލައްކަ ފަސްދޮޅަސް އެއްހާސް ތިންސަތޭކަ ފަންސަވީސް ރުފިޔާ ސާޅީސް ނުވަ ލާރި) އެވެ. އެ ޕްރޮޖެކްޓަށް ނިންމުމަށް ބޭނުންވާ އެންމެހާ ފައިސާ ވެސް އެ ކުންފުންޏަށް ސަރުކާރުން ދީފައިވާ ކަމަށް އެ ޖަލްސާގައި ރައީސް ވަނީ ވިދާޅުވެފައެވެ.

މިމްސް ކޮންސްޓްރަކްޝަން އިން އެ މަސައްކަތް ކުރުމަށް ހުށަހަޅާފައިވަނީ 15،361،325.49 (ފަނަރަ މިލިއަން ތިންލައްކަ ފަސްދޮޅަސް އެއްހާސް ތިންސަތޭކަ ފަންސަވީސް ރުފިޔާ ސާޅީސް ނުވަ ލާރި) އެވެ.

މިކަމުން ހާމަވަނީ ދިވެހި ދައުލަތަށް ސައުދުﷲ ހިލްމީގެ ކުންފުނި މިމްސް ޕްރައިވެޓް ލިމިޓެޑް އިން އޮޅުވާލައިގެން މަކަރާއި ހީލަތުން ނުހައްގުން ފައިސާ ތަކެއް ހޯދާފައިވާ ކަން ކަމަށް އެ ސިޓީގައި ބުނެފައިވާއިރު މި މައްސަލަ އަކީ ޖިނާއީ ތަހުގީގެއް ހިންގަން ޖެހޭ ކަމެއް ކަމަށާއި ސަރުކާރުގެ އިދާރާތަކަށް އޮޅުވާލުމަކީ ވަރަށްވެސް ސީރިއަސް މައްސަލައެއް ކަމުގައި ރައްޔިތުން ދެކޭކަމަށް އެ ސިޓީގައި ވެއެވެ.

މިމްސް ޕްރައިވެޓް ލިމިޓޭޑް އަކީ ސައުދުﷲ ހިލްމީގެ މެނޭޖިންގ ޑިރެކްޓަރ ކަމުގައި އަދި ޝެއަރ ހޯލްޑަރުންގެ ގޮތުގައި އަނބިކަނބަލުން މިލްނާ ރަޝީދުއާއި، 2 ދަރިކަނބަލުން ކަމުގައިވާ އިމްތިނާން ސައުދުﷲ އަދި ފާތިމަތު އިމްތިސާލް ސައުދުﷲ ނަމުގައި ރަޖިސްޓްރީ ކޮށްފައިވާ ކުންފުންޏެއް ކަން ސަރުކާރުގެ ލިޔެކިއުންތަކުން އެނގެއެވެ.

އެ ސިޓީގައި އެދިފައިވަނީ، މިމްސް ކުންފުނީގެ ނަމުގައި ސައުދުﷲ ހިލްމީ ދައުލަތުގެ އިދާރާ ތަކަށް އޮޅުވާލުމަށްޓަކައި ސައްހަނޫން ލިޔެކިއުންތައް ހުށަހަޅައި އޮޅުވާލައިގެން ނާޖާއިޒް ފައިދާ ހޯދި މައްސަލައާއި، ސައްހަނޫން ލިޔެކިއުންތައް ސަރުކާރުގެ އިދާރާތަކަށް ހުށަހެޅި މައްސަލަތައް ސީރިއަސް މައްސަލައެއްގެ ގޮތުގައި ބަލައިދިނުމަށެވެ.