އެމްޑީޕީން ކުރިއަށް އޮތްތަނުގައި ރާއްޖޭގެ ހިންގުން ރަނގަޅު ކުރުމަށް ގިނަ މަސައްކަތްތައް ކުރާނެ: ނިޔާޒު
19 ވަނަ މަޖިލީހުގެ މަސައްކަތަށް 90 ޕަސެންޓަށްވުރެ މަތިން މާކްސް ލިބޭނެ
ހުޅުމާލޭ ދާއިރާގެ މެންބަރު އަލީ ނިޔާޒު
އެމްޑީޕީން ކުރިއަށް އޮތްތަނުގައި ރާއްޖޭގެ ހިންގުން ރަނގަޅު ކުރުމަށް ގިނަ މަސައްކަތްތައް ކުރާނެ ކަމަށް ހުޅުމާލޭ ދާއިރާގެ މެންބަރު އަލީ ނިޔާޒު ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ނިޔާޒު ވިދާޅުވީ އެމްޑީޕީން ފަށާފައިވާ ރާއްޖެ އިސްލާހު ކުރުމުގެ މަސައްކަތާއި، ލާމަރުކަޒީ އުސޫލުން ޖަޒީރާ ރާއްޖެ ގޮތުގައި ބޭއްވުމުގެ ތަސައްވުރުގައި މަސައްކަތްތައް ކުރިއަށް ގެންދާނެ ކަމަށެވެ. ނިޔާޒު ވިދާޅުވީ އެމްޑީޕީއާއެކު ރާއްޖޭގެ ހިންގުން ރަނގަޅު ކުރުމުގެ މަސައްކަތާއި، ރާއްޖޭގެ ރައްޔިތުންނަށް ތަނަވަސްކަން ގެނައުމަށް ކުރަންޖެހޭ މަސައްކަތްތައް ކުރާނެ ކަމަށެވެ. އަދި ކުރިއަށް އޮތްތަނުގައި އިންތިޚާބުތައް ކާމިޔާބު ކުރުމުގެ މަސައްކަތް ކުރާނެ ކަމަށާއި، ސަފުތައް އަލުން ރުކުރުވާލާނެ ކަމަށެވެ.
19 ވަނަ ރައްޔިތުންގެ މަޖިލީހަށް އިޝާރާތް ކުރައްވައި ނިޔާޒު ވިދާޅުވީ ކުރެވުނު މަސައްކަތްތަކަށް ޕަސެންޓޭޖުން މާކްސް ދޭ ކަމަށްވާނަމަ 90 ޕަސެންޓޭޖަށްވުރެ މަތިން މާކްސް ލިބޭނެ ކަމަށެވެ. އެމްޑީޕީގެ މެންބަރުން 19 ވަނަ މަޖިލީހަށް އައީ އެޖެންޑާ 19 ގެ އެޖެންޑާއާއެކު ކަމަށާއި، އެޖެންޑާގައި ހިމަނާފައިވާ 19 ގާނޫނުގެ މަސައްކަތްތައް ގާތްގަނޑަކަށް ނިމިފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ ގާނޫނުތައް ވުޖޫދުކުރުމުގެ އިތުރުން ބައެއް ބިލްތަކަށް އިސްލާހު ގެނެސްފައިވާ ކަމަށެވެ.
ނިޔާޒު ވިދާޅުވީ ރައްޔިތުންގެ ލާބަޔާ މަންފާއަށް ގިނަ މަސައްކަތްތަކެއް ކުރެވިފައިވާ ކަމަށެވެ. އެގޮތުން މިނިވަންވޭޖާއި، ސްޓޫޑެންޓް ލޯނުގެ އިންޓްރެސްޓް ރޭޓް ކުޑަކުރުމާއި، އިންކަމް ޓެކްސް ނެގުމުގެ ބިލާއި، ލާމަރުކަޒީ ނިޒާމަށް ގެނައި ބަދަލުތައް ފާހަގަކޮށްލެވޭ ކަމަށެވެ. އަދި ވިދާޅުވީ ކުރިއަށް އޮތްތަނުގައި ވެސް ރައްޔިތުންނަށް ފައިދާވާ ގޮތަށް މަސައްކަތްތައް ކުރާނެ ކަމަށެވެ.
