ޣައްޒާ ސިޓީގެ ޒައިތޫން ޑީސްޓްރިކްޓްގައި ހަމާސް ހަނގުރާމަވެރިންނާއި އިޒްރޭލް ސިފައިންނާ ދެމެދު ހަމަލާތައް ބަދަލުކުރުން ވަރުގަދަވެ، ހަނގުރާމަ ހޫނުވެފައިވާ ކަމުގައި އަލްޖަޒީރާއިން ބުނެފިއެވެ.

މި ސަރަހައްދަށް އިޒްރޭލް ސިފައިން ހަމަލާދޭން ފެށިއިރު މީގެ މަސްތަކެއް ކުރިން ބުނެފައިވަނީ އެ ޑިސްޓްރިކްޓުން ހަމާސް މުޅިން ނައްތާލެވިއްޖެ ކަމުގައެވެ.

އިޒްރޭލް ސިފައިން އިރުމަތީ ރަފާގައި ދިރިއުޅޭ އެތައް ހާސް ޢާއްމު ރައްޔިތުން އެ ސަރަހައްދު ދޫކޮށް ދިއުމަށް ދަނީ އަންގަމުންނެވެ.

އަނެއްކޮޅުން އިޒްރޭލުން ހިންގާފައިވާ ހަނގުރާމައިގެ ޖަރީމާއެއްގެ ގޮތުގައި ތުހުމަތު ކުރެވޭ، އައްޝިފާ ހޮސްޕިޓަލް ކޮމްޕްލެކްސް ތެރޭގައި ވަޅުލާފައިވާ އިންސާނުންގެ 80 ހަށިގަނޑު ވަނީ ފެނިފައެވެ.

ހުސްވި އަހަރުގެ އޮކްޓޯބަރ މަހުގެ 7 ވަނަ ދުވަހުން ފެށިގެން އިޒްރޭލުން ޣައްޒާ އަށް ދެމުން ގެންދާ ހަމަލާތަކުގައި މިހާތަނަށް 34،971 މީހުން މަރުވެފައިވެއެވެ. އަދި 78،641 މީހުން ޒަޚަމްވެފައިވެއެވެ.