ރާއްޖޭގައި ތިބި އިންޑިޔާ ސިފައިންގެ ބަދަލުގައި މަދަނީން ބައިތިއްބަން ހުށަހެޅީ އިންޑިޔާ ސަރުކާރުންތޯ ނުވަތަ ރާއްޖޭގެ ސަރުކާރުންތޯ ކުރި ސުވާލަށް ސަރުކާރުގެ ސާފު ޖަވާބެއް ނެތެވެ.

ހޮނިހިރު ދުވަހު ރައީސް އޮފީހުގައި ކުރިޔަށްގެންދިޔަ ނޫސްވެރިންގެ ބައްދަލުވުމުގައި އެ ހުށަހެޅުން ހުށަހެޅީ ކޮން ސަރުކާރަކުންތޯ ނޫސްވެރިއަކު ކުރި ސުވާލަށް ޖަވާބު ދެއްވަމުން މިކަމުގެ މަޝްވަރާތަކުގައި އެންމެ އިސްކޮށް ހުންނެވި އަދި މިހާރު އދ ށް ކަނޑައަޅުއްވާފައި ހުންނަވާ ދާއިމީ މަންދޫބު ޑރ އަލީ ނަސީރު ވިދާޅުވީ، ރިޔާސީ އިންތިޚާބުގެ ތެރޭގައި ރައީސް ޑރ މުހައްމަދު މުއިއްޒު ވައުދުވެވަޑައިގެންނެވީ ރާއްޖޭގައި ތިބި ބޭރު ގައުމުތަކުގެ ސިފައިން ރާއްޖެއިން ބާލާނެކަމަށެވެ. އަދި އެ ވައުދުފުޅު ތަންފީޒުކުރުމުގެ ގޮތުން ސަރުކާރާ ހަވާލުވެ އެކަމުގެ މަޝްވަރާތައް ދެ ގައުމުގެ ދެމެދުގައި ކުރިޔަށް ގެންދިޔަކަމަށް ޑރ އަލީ ނަސީރު ވިދާޅުވިއެވެ.

މަޝްވަރާތަކުގައި ދިވެހި ސަރުކާރުގެ ފަރާތުން އިންޑިޔާ ސަރުކާރުގައި އެދުނީ ރާއްޖޭގައި ތިބި އިންޑިޔާ ސިފައިން ރާއްޖެއިން ފައިބާނެ ތާވަލެއް އެކުލަވާލާ އެކަންކުރުމަށްކަމަށް ޑރ އަލީ ނަސީރު ވިދާޅުވިއެވެ. މަޝްވަރާތަކުގައި ހުށަހެޅީ އުޅަނދުތައް ގެންދިޔުމަށްތޯ ނުވަތަ އިންޑިޔާ ސިފައިން ބޭލުމަށްތޯ ކުރި ސުވާލަށް ޖަވާބު ދެއްވަމުން ޑރ އަލީ ނަސީރު ވިދާޅުވީ ރައީސްގެ ވައުދުފުޅަކީ ރާއްޖޭގައި ތިބި އިންޑިޔާ ސިފައިން ބޭލުންކަމަށެވެ. އެއާއެއްގޮތަށް މިމަހުގެ 9 ވަނަ ދުވަހު އެންމެ ފަހު ބެޗް ރާއްޖެއިން ފުރައިގެން ގޮސްފައިވާކަމަށް އޭނާ ވިދާޅުވިއެވެ.

މަދަނީން ބައިތިއްބަން ހުށަހެޅީ ކޮން ގައުމަކުންތޯ ކުރި ސުވާލަށް ސީދާ ޖަވާބެއް ޑރ އަލީ ނަސީރު ނުދެއްވައެވެ. އެސުވާލުގެ ޖަވާބުގައި ވިދާޅުވީ އެ މަޝްވަރާތަކުގެ ތަފްސީލު އެއްވެސް ފަރާތަކުން އެހާ ބޮޑަށް ހާމަކުރައްވާނެކަމަށް ގަބޫލުފުޅު ނުކުރައްވާކަމަށެވެ.

މިސަރުކާރު ވެރިކަމަށް އައީ ރާއްޖޭގައި ގިނަ އަދަދަކަށް އިންޑިޔާ ސިފައިން ތިބިކަމަށް ބުނެ ރާއްޖޭގެ މިނިވަންކަމަށް އެކަމުން ބުރޫއަރާކަމަށް ބުނެއެވެ. އަދި ރާއްޖޭގައި ތިބި އިންޑިޔާ ސިފައިން ބާލާނެކަމަށް ބުނެ އެ ވައުދާއެކުއެވެ. އެވައުދު ފުއްދުމުގެ ގޮތުން އިންޑިޔާ ސިފައިންގެ ބަދަލުގައި މަދަނީ މީހުން ބައިތިއްބާނެކަމަކަށް އޭރު ރައީސް ޑރ މުއިއްޒު ވިދާޅުވެފައެއްނުވެއެވެ.

ނަމަވެސް ވެރިކަމަށް ވަޑައިގެންނެވިފަހުން އިންޑިޔާ ސިފައިންގެ ބަދަލުގައި ތިބޭނީ މަދަނީންކަމަށް ސަރުކާރުން ބުނުމުން ގިނަ ބަޔެއްގެ ފާޑުކިޔުން އެކަމަށް ވަނީ އަމާޒުވެފައެވެ. ޝެޑިޔުލާ އެއްގޮތަށް ރާއްޖޭގައި ތިބި އިންޑިޔާ ސިފައިންގެ 76 މީހުން ފޮނުވާލާފައިވާކަމަށް ސަރުކާރުން ބުނާއިރު އޭގެ ބަދަލުގައި 76 މަދަނީ މީހުން ވަނީ ގެނެސްފައެވެ. ހޮނިހިރު ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ފޮރިން މިނިސްޓަރު މޫސާ ޒަމީރު ވިދާޅުވީ ސެނަހިޔާގައި މަސައްކަތް ކުރަން ތިބި ޑޮކްޓަރުން ފިޔަވައި، ހުރިހާ ސިފައިން ރާއްޖެއިން ފައިބާފައިވާ ކަމަށެވެ.

މަދަނީންގެ ގޮތުގައި ބަލާފައިވަނީ ހެލިކޮޕްޓަރު އުފެއްދި ކުންފުނިން ފޮނުވާފައިތިބި މީހުންކަމަށާއި އެއީ އަސްކަރީ މީހުންނެއް ނޫން ކަމަށެވެ. އަދި އެއީ ހިންދުސްތާން އެރޮނޮޓިކްސް ލިމިޓެޑް ކިޔާ ކުންފުންޏަކުން އައިސް ތިބި މީހުން ކަމަށާއި، އެއީ ހެލިކޮޕްޓަރު އުފެއްދި ކުންފުނީގެ މީހުން ކަމަށެވެ.

ނަމަވެސް ހިންދުސްތާން އެރޮނޮޓިކްސް ލިމިޓެޑް އަކީ ޕްރައިވެޓް ކުންފުންޏެއް ނޫންކަން ވަނީ ހާމަވެފައެވެ. ހިންދުސްތާން އެއާކްރާފްޓް ލިމިޓެޑްގެ ނަމުން އުފެދުނު ކުންފުނި އުފެއްދީ އިންޑިއާގައި މަތިންދާބޯޓު އުފެއްދުމުގެ މަގުސަދުގައި އޭރުގެ މައިސޫރު ސަރުކާރާ ގުޅިގެން ވަލްޗަންދު ހިރާޗަންދު ކިޔާ މީހަކު 23 ޑިސެމްބަރު 1940 ގައި ބެންގަލޫރުގައެވެ.

މި ކުންފުނީގެ މައިގަނޑު މަސައްކަތުގެ ތެރޭގައި، އަސްކަރީ އުޅަނދުތައް ޑިޒައިން ކުރުމާއި، އުފެއްދުމާއި، ތަރައްގީކުރުމާއި އަދި މަރާމާތުކުރުމުގެ އިތުރުން އޯވަރހޯލް ކުރުމުގެ މަސައްކަތް ހިމެނެއެވެ.