އިންޑިއާއިން ރާއްޖެއަށް ހަދިޔާކޮށްފައިވާ ހެލިކޮޕްޓަރާއި ޑޯނިއާ އަލުން އޮޕަރޭޝަނަށް ގެނައުމާއި ގުޅޭގޮތުން މަޝްވަރާކޮށްފިއެވެ.

ރާއްޖޭގެ ފޮރިން މިނިސްޓްރީން ނެރުނު ނޫސްބަޔާނުގައި ބުނީ މި މަޝްވަރާތައް ބާއްވާފައިވަނީ ރާއްޖެއާއި އިންޑިއާ ދެމެދު ބޭއްވުނު ހައިލެވެލް ކޯ ގްރޫޕުގެ ތިންވަނަ މަޝްވަރާ ބައްދަލުވުމުގެ ތެރެއިން ކަމަށެވެ. އަދި މި ބައްދަލުވުމުގައި ހެލިކޮޕްޓަރު އަދި ޑޯނިއަރ އަލުން އޮޕަރޭޝަނަށް ގެނައުމުގެ މަޝްވަރާތައް ކުރިއަށް ގެންދިޔަ ކަމަށާއި ދެ ގައުމުގައި ބޮޑުވެފައިވާ މައްސަލަތަކުގެ މައްޗަށް މި ބައްދަލުވުމުގައި މަޝްވަރާކޮށްފައިވާ ކަމަށެވެ.

ރާއްޖޭގެ ފޮރިން މިނިސްޓްރީން ނެރުނު ނޫސްބަޔާނުގައި އިތުރަށް ބުނެފައިވަނީ އޭވިއޭޝަން ޕްލެޓްފޯމްތަކުގެ ތެރެއިން 1 ޕްލެޓްފޯމުގައި ތިބި އިންޑިއާ ސިފައިން މިހާރު އަނބުރާ ގައުމަށް ގޮސްފައިވާކަމަށެވެ. އަދި ބާކީ 2 ޕްލެޓްފޯމްގައި ތިބި އިންޑިއާ ސިފައިން އޭޕްރީލް މަހުގެ 10 ވަނަ ދުވަހާއި މޭ މަހުގެ 10 ވަނަ ދުވަހު އަނބުރާ ދިއުމަށް ހަމަޖެހިފައިވާކަމަށެވެ.

މީގެއިތުރުން މި ބައްދަލުވުމުގައި ދެ ގައުމު ގުޅިގެން އިގްތިސާދީ އަދި ތަރައްގީގެ ރޮނގުން ކުރެވޭނެ ކަންކަމާ ގުޅޭގޮތުން މަޝްވަރާކޮށްފައިވާކަމަށް ފޮރިން މިނިސްޓްރީގެ ބަޔާނުގައި ބުނެފައިވެއެވެ. އަދި މީގެ އިތުރުން ދެ ގައުމުގެ ގުޅުން އިތުރަށް ބަދަހިކޮށް ދެ ޤައުމު ގުޅިގެން ކުރިއަށްގެންދާ ތަރައްގީގެ މަޝްރޫއުތައް އަވަސްކަމާއެކު ކުރިއަށް ގެންދިއުމާގުޅޭގޮތުން ވެސް މި ބައްދަލުވުމުގައި މަޝްވަރާކޮށްފައިވާކަމަށް ފޮރިން މިނިސްޓްރީން ބުނެއެވެ.

ނަމަވެސް އިންޑިއާގެ ފޮރިން މިނިސްޓްރީން ނެރުނު ނޫސްބަޔާނުގައި ރާއްޖޭގެ ފޮރިން މިނިސްޓްރީން ދެއްކި ވާހަކަތަކަށް އަލިއަޅުވާލާފައި ނުވެއެވެ. އަދި ދިވެހި ސަރުކާރުން ބުނެފައިވާ ތާރީހުގައި އިތުރު ދެ ޕްލެޓްފޯމުން ސިފައިން ގެންދާނެ ތާރީހެއް ފައިނަލް ކުރެވިފައިވާކަމަށް ވެސް އިންޑިއާގެ ބަޔާނުގައި ބުނެފައިނެތެވެ.

އިންޑިއާގެ ފޮރިން މިނިސްޓްރީން ނެރުނު ނޫސްބަޔާނުގައި ބުނެފައިވަނީ ސިފައިންގެ ބަދަލުގައި ސިވިލް މަސައްކަތްތެރިން ގެނައުމާއި ގުޅޭވާހަކަތައް މުރާޖާކޮށްފައިވާ ކަމަށެވެ. އަދި ބައިލެޓްރަލް ކޯޕަރޭޝަނާއި ބައިލެޓެރަލް ވިޔަފާރިއާއި އިންވެސްޓްމަންޓް ފުޅާކުރުމާއި ގުޅޭގޮތުން މަޝްވަރާކުރެވުނު ކަމަށް އިންޑިއާއިން ވަނީ ބުނެފައެވެ.

ކޯރ ގްރޫޕުގެ 3 ވަނަ ބައްދަލުވުމެއް ބާއްވާފައިވާއިރު، ދެން މި ގްރޫޕުގެ ބައްދަލުވުމެއް އޮންނާނީ ނިއުދިއްލީގައި ދެފަރާތަށް ވެސް ފަސޭހަވާނެ ތާރީހެއްގައި ކަމަށްވެސް ރާއްޖޭގެ ފޮރިން މިނިސްޓްރީން ނެރުނު ބަޔާނުގައި ބުނެފައިވެއެވެ.