އިންޑިޔާ ސިފައިންގެ ފަހު ބެޗް މިމަހުގެ 10ގެ ކުރިން ފުރާނެ: ފޮރިން މިނިސްޓްރީ

އިންޑިޔާ ސިދައިން ރާއްޖެއިން ބޭލުމަށް ކުރަމުންދާ މަސައްކަތުގެ ޝެޑިޔުލާ އެއްގޮތަށް މެއި މަހުގެ 10 ގެ ކުރިން އެންމެ ފަހު ބެޗް ރާއްޖެއިން ފުރާނެކަމަށް ފޮރިން މިނިސްޓްރީން ބުނެފިއެވެ.

ފޮރިން މިނިސްޓްރީން މިގޮތަށް ބުނީ ރާއްޖެ އާއި އިންޑިޔާ އާ ދެމެދު ކުރިޔަށްދާ ހައި ލެވެލް ކޯ ގްރޫޕްގެ ހަތަރު ވަނަ ބައްދަލުވުމަށްފަހު ނެރުނު ބަޔާނުގައެވެ. މިމަޝްވަރާތައް ކުރިޔަށްދަނީ މައިގަނޑު ގޮތެއްގައި ރާއްޖޭގައި ތިބި އިންޑިޔާ ސިފައިން ބޭލުމާއި ގުޅޭގޮތުންނެވެ. އިންޑިޔާގެ ނިއު ދިއްލީގައި ހުންނަ އިންޑިޔާގެ އެކްސްޓާނަލް އެފެއާޒް މިނިސްޓްރީގައި ކުރިޔަށްދިޔަ މަޝްވަރާތަކުގައި ދެފަރާތުންވެސް ވަނީ މިހާރު މިކަމުގައި ދެގައުމުން އެއްބާރުލުން ދެމުންދާ ގޮތް މުރާޖަޢާކޮށްފައެވެ. އަދި ތަރައްޤީއާއި ދިފާޢީ އެއްބާރުލުން ހިމެނޭ ގޮތަށް ދެފަރާތުގެ ޝައުޤުވެރިކަން ހުރިކަންކަމާއި ގުޅޭގޮތުން ފުޅާ ދާއިރާއެއްގައި މަޝްވަރާތައް ކޮށްފައިވާކަމަށް ފޮރިން މިނިސްޓްރީން ބުނެއެވެ.

ފޮރިން މިނިސްޓްރީން ބުނީ ދެ ފަރާތުންވެސް ހިތްހަމަޖެހުމާއެކު ފާހަގަކުރީ ޝެޑިއުލްގައިވާ ގޮތުގެ މަތިން ލޮޖިސްޓިކަލް ހުރިހާ އިންތިޒާމުތަކެއް ކުރިއަށްދާކަންކަމަށެވެ.

ރާއްޖެއާއި އިންޑިއާއާ ދެމެދު އެކުލަވާލާފައިވާ ލައިލެވެލް ކޯ ގްރޫޕަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އިންޑިއާގެ ބޮޑުވަޒީރު ނަރެންދުރަ މޯދީއާއެކު މިދިޔަ ޑިސެމްބަރު މަހު ދުބާއީގައި ބޭއްވި ބައްދަލު ކުރެއްވުމުގައި، ދެ ލީޑަރުން އެއްބަސްވެވަޑައިގަތް ގޮތަށް އެކުލަވައިލާފައިވާ ގްރޫޕެކެވެ.

މީގެއިތުރުން މިބައްދަލުވުމުގައި އިތުރަށް އެއްބަސްވެފައިވަނީ ހައި ލެވެލް ކޯ ގްރޫޕްގެ ފަސް ވަނަ ބައްދަލުވުން ޖޫން ނުވަތަ ޖުލައި މަހުގެ ތެރޭގައި ދެ ފަރާތުން އެއްބަސްވާ ތާރީޚެއްގައި މާލޭގައި ބޭއްވުމަށެވެ.