ގުޅުން ބަދަހިކުރަން ފޮރިން މިނިސްޓަރު ޒަމީރު އިންޑިއާއަށް

އިންޑިއާއާއި ގޯސްވެފައިވާ ގުޅުން ރަނގަޅުކޮށް އެހީ ހޯދުމަށް ފޮރިން މިނިސްޓަރު މޫސާ ޒަމީރު އިންޑިއާއަށް ވަޑައިގެންފިއެވެ.

ފޮރިން މިނިސްޓަރު މޫސާ ޒަމީރު އިންޑިއާއަށް ވަޑައިގެންނެވީ ބުދަ ދުވަހުއެވެ. ފުރާ ވަޑައިގަތުމުގެ ކުރިން އެކްސްގައި ކުރެއްވި ޕޯސްޓެއްގައި މިނިސްޓަރު ވިދާޅުވީ ދެ ގައުމުގެ ރައްޔިތުންނަށް ފައިދާކުރަނިވި ކަންކަމުގައި އެއްބާރުލުން އިތުރުކުރުމަށް އުންމީދުކުރައްވާ ކަމަށެވެ.

މީގެ އިތުރުން އިންޑިއާގެ މިނިސްޓަރ އޮފް އެކްސްޓަރނަލް އެފެއާޒް ޑރ. އެސް ޖައިޝަންކަރާއި ބައްދަލުކޮށް، ދެގައުމުގެ ރައްޔިތުންގެ ދެފަރާތުގެ ފައިދާއަށްޓަކައި ރާއްޖެއާއި އިންޑިއާއާ ދެމެދު އެއްބާރުލުން އިތުރުކުރުމާ ބެހޭގޮތުން މަޝްވަރާކުރައްވާނެ ކަމަށެވެ.

ފޮރިން މިނިސްޓްރީން ބުނީ މި ދަތުރުފުޅުގައި ރާއްޖެއާއި އިންޑިއާއާ ދެމެދު އޮތް ގިނަދުވަސްވީ ގުޅުން އިތުރަށް ބަދަހިކުރުމާގުޅޭ ގޮތުން މަޝްވަރާ ކުރައްވާނެ ކަމަށެވެ.

ފޮރިން މިނިސްޓަރު ޒަމީރު އިންޑިއާއަށް ވަޑައިގަންނަވާއިރު، މި ސަރުކާރު ވެރިކަމަށް އައިފަހުން އިންޑިއާއެކު އޮތް ގާތް ގުޅުން ވަނީ ވަރަށް ބޮޑަށް ހީނަރުވެފައެވެ. މީގެ އެއް ސަބަބެއްގެ ގޮތުގައި މި ސަރުކާރުގެ ނާގާބިލު، ތަންދޮރު ނުދަންނަ، ޑިޕްލޮމަސީގެ ހަމައެއްލަމައެއް ނެނގޭ ޑެޕިއުޓީ މިނިސްޓަރުން ވަނީ އިންޑިއާއަށާއި، އިންޑިއާގެ ރައްޔިތުންނާއި، ވެރިންނަށް މަލާމާތްކޮށް ފުރައްސާރަކޮށްފައެވެ.

މީގެ އިތުރުން ރާއްޖެއަށް އަންނަ އިންޑިއާ ފަތުރުވެރިންގެ އަދަދު މަދުވެ، އިގްތިސާދަށް އޭގެ އަސަރުކުރަމުންދާއިރު، އެކަންކަން ހައްލުކުރުމަށް އެދުމާއި ގުޅުން ރަނގަޅުކުރުމުގެ އިތުރުން ސަރުކާރު ހިންގަން ބޭނުންވާ އެހީތެރިކަމަށް އެދޭނެކަމުގެ މައުލޫމާތު ވަނީ ލިބިފައެވެ.