އާއްމުންގެ ޝަކުވާ ބޮޑުވުމާއި ގުޅިގެން އަގުތައް ފެންނާނެހެން ބޯޑުތައް ހަރުކޮށް، އެއާޕޯޓުގެ ޓެކްސީ މައްސަލަ ހައްލުކުރުމުގެ މަސައްކަތް ފަށައިފި
ގަވާއިދާ ހިލާފަށް އަމަލުކޮށްފައިވާ މީހުންނާއި މެދު ފިޔަވަޅުއަޅާނަން
ޑޮމެސްޓިކް ޓާމިނަލުގެ ކައިރީގައި ކާރެއް މަޑުކޮށްލައިގެން
ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް ދިމާވެފައިވާ ޓެކްސީގެ މައްސަލަ ހައްލު ކުރުމަށް އިދާރާތައް ގުޅިގެން މަސައްކަތް ފަށައިފިއެވެ.
މިމައްސަލަ ހައްލު ކުރުމަށް މަސައްކަތް ފަށާފައިވަނީ ޓްރާންސްޕޯޓް މިނިސްޓްރީ އާއި ހޯމްލޭންޑް ސެކިއުރިޓީ އަދި އެމްއޭސީއެލް ގުޅިގެންނެވެ.
ޓްރާންސްޕޯޓް މިނިސްޓްރީން ބުނީ އެއާޕޯޓްގެ ޓެކްސީ މައްސަލަ ހައްލު ކުރުމަށް އިދާރާތައް ގުޅިގެން މަސައްކަތް ކުރާނެ ކަމަށާއި، އެއާޕޯޓު ޓެކްސީ މެނޭޖްކުރާނެ ގޮތުގެ ޕްލޭން ތަންފީޒު ކުރަމުންދާނެ ކަމަށެވެ. މިނިސްޓްރީން ބުނީ އެއާޕޯޓް ޓެކްސީ ކިއުއާ ގުޅޭގޮތުން ގިނަ ޝަކުވާތައް ލިބެމުންދާ ކަމަށެވެ. އަދި ކިއުއާރު ކޯޑް މެދުވެރިކޮށް ޝަކުވާ ހުށަހެޅޭގޮތް ހެދުމުން ގިނަ އަދަދެއްގެ މައްސަލަ ހުށަހެޅެމުންދާކަން މިނިސްޓްރީން ފާހަގަކޮށްފައިވެއެވެ. ޓްރާންސްޕޯޓު މިނިސްޓްރީން ބުނީ އެމައްސަލަތައް ބަލަމުންދާނެ ކަމަށާއި، ގަވާއިދާ ހިލާފަށް އަމަލުކޮށްފައިވާ މީހުންނާއި މެދު ފިޔަވަޅުއަޅާނެ ކަމަށެވެ.
ޓެކްސީތަކާއި ގުޅޭގޮތުން ލިބެމުންދާ ޝަކުވާތަކާއި ގުޅޭގޮތުން މިނިސްޓްރީން ބުނީ ކަނޑައަޅާފައިވާ އަގަށް ވުރެ ބޮޑު އަގު ނެގުމުގެ މައްސަލަ ވަރަށް ބޮޑު ކަމަށެވެ. އަދި ވަކި މަންޒިލަކަށް ނޫނީ ދަތުރުކޮށްދޭން ބޭނުން ނުވުމާއި ބިދޭސީން ޓެކްސީ ކުރާ މައްސަލަ ސަމާލުކަމަށް އައިސްފައިވާ ކަމަށެވެ. ޓެކްސީކުރާ ބިދޭސީންނާ މެދު ހަރުކަށި ފިޔަވަޅު އަޅަން ނިންމާފައިވާ ކަމަށް ވެސް ޓްރާންސްޕޯޓު މިނިސްޓްރީން ބުނެއެވެ.
މިނިސްޓްރީން ބުނީ މިހާރު ޓެކްސީތަކުގެ އަގުތައް ފަސޭހައިން ފެންނާނެ ގޮތަށް އެއާޕޯޓުގައި ބޯޑުތަކެއް ހަރުކޮށްފައިވާ ކަމަށެވެ.
އެއާޕޯޓް ޓެކްސީ ކިއުއާ ގުޅޭގޮތުން ހުށަހަޅާ މައްސަލަތައް ބެލުމަށް ކޮމެޓީއެއް އެކުލަވާލާފައިވާއިރު، އެއާޕޯޓުގައި ހަރަކާތްތެރިވާ ފުލުހުން ވެސް މިމައްސަލަތައް ހައްލު ކުރުމަށް ދަނީ ހަރަކާތްތެރިވަމުންނެވެ.
