ހައްޔަރުކޮށްފައިވާ ޓެކްސީ ޑްރައިވަރުން ދޫކޮށްލަން ދެން ހަމަހިމޭން އިހުތިޖާޖެއް ކުރިއަށްގެންދަން ޓެކްސީ ޑްރައިވަރުން ނިންމައިފިއެވެ.

އެގޮތުން ޑްރައިވަރުން އިންތިޒާމް ކުރި ފުރަތަމަ އެއްވުން ހުކުރު ދުވަހުގެ ރޭ ވަނީ ބާއްވާފައެވެ. އެކަމާއި ގުޅޭގޮތުން ޓެކްސީ ޑްރައިވާސް ކޮމިއުނިޓީން ބުނެފައި ވަނީ ރުއްގަނޑު ސަރަހައްދުގައި ކުރިއަށްދާ އެ އިހުތިޖާޖު ކުރިއަށް ގެންދާނީ ސުލްހަވެރިކަމާއެކު ކުރިއަށްދާ އެއްވުންތަކެއްގެ ގޮތުގައި ކަމަށެވެ.

އެ އެއްވުންތަކުގެ ބޭނުމަކީ ހައްޔަރު ކޮށްފައި ތިބި ޑްރައިވަރުން މިނިވަންކުރުމާއި، ޓޯ ކޮށްފައި ހުރި ކާރުތަކުގެ ތެރެއިން ދޫކޮށްނުލާ ހުރި ކާރުތައް ދޫކޮށްލަން ގޮވާލުން ކަމަށް ޑްރައިވަރުން ވަނީ ބުނެފައެވެ. މި އެެއްވުންތައް ސިލްސިލާކޮށް ކުރިއަށްގެންދާނެ ކަމަށާއި ޑްރައިވަރުންގެ ކަންބޮޑުވުންތަކަށް ހައްލެއް ނުލިބެނީސް އެއްވުންތައް ހުއްޓާ ނުލާނެ ކަމަށް ޑްރައިވަރުން ވަނީ ބުނެފައެވެ.

ޑްރައިވަރުންނަށް ޕާކް ކުރާނެ ތަނެއް ނުދައްކާ ކާރުތައް ޓޯކުރަމުންދާކަމަށް ފާހަގަކޮށް އެކަމާއި ދެކޮޅަށް ޑްރައިވަރުން ވަނީ އަޑު އުފުލާފައެވެ. މީގެ އިތުރުން ވެސް ޑްރައިވަރުންގެ ހުރި ކަންބޮޑުވުންތައް އެ އެއްވުމަށް ފަހު ޑްރައިވަރުން ވަނީ ހިއްސާކޮށްފައެވެ. އެގޮތުން ސަރުކާރުން ޓެކްސީ ހިދުމަތް ދޭން ފަށަން ކުރަމުންދާ މަސައްކަތާ ދެކޮޅު ހަދައި ޑްރައިވަރުން ވަނީ ޓެކްސީ ފްލީޓުގެ މަސައްކަތް ހުއްޓާލުމަށް ގޮވާލާފައެވެ. އެހެން ނޫންނަމަ ޓެކްސީ ޑްރައިވަރުންގެ މުޒާހަރާތައް އިތުރަށް ވަރުގަދަކުރާނެ ކަމަށް ޑްރައިވަރުން ވަނީ ބުނެފައެވެ.

މީގެ ކުރިން ބުދަ ދުވަހުގެ ހަވީރު ޓެކްސީ ޑްރައިވަރުން ވަނީ އެމީހުންގެ ކަންބޮޑުވުންތައް ސަރުކާރުން އަޑު ނާހާ ކަމަށްބުނެ ސުލްހަވެރި މުޒާހަރާއަށް ނުކުމެފައެވެ. ހުޅުމާލެ ރުށްގަނޑު ޕާކު 1 ގައި ކުރިއަށް ގެންދިޔަ މި މުޒާހަރާގައި ގިނަ އަދަދެއްގެ ޓެކްސީ ޑްރައިވަރުން އެއްވެ ކަންބޮޑުވުން ފާޅުކޮށްފައިވެއެވެ. މި ޑްރައިވަރުންތައް ބުދަ ދުވަހުގެ ހަވީރު 4:00 ގައި މި ސަރަހައްދަށް އެއްވި ނަމަވެސް ފުލުހުން ވަނީ ފުރަތަމަ ހުރަސްއަޅާފައެވެ. އޭގެފަހުން ބުދަ ދުވަހުގެ ރޭ އިޝާ ނަމާދަށްފަހު ޓެކްސީ ޑްރައިވަރުންތައް ވަނީ މަގުމައްޗަށް އަޑު އުފުލުމަށް ނުކުމެފައެވެ. އެގޮތުން ހައިވޭއަށް 4 ފުރޮޅުލީ ވެހިކަލްތަކަށް ނޭރޭ ގޮތަށް މުޅި ސަރަހައްދުގައި ކާރުތައް ޕާކު ކުރުމަށްފަހު ޑްރައިވަރުން ވަނީ އަޑު އުފުލާފައެވެ.

ބުދަ ދުވަހުގެ ރޭ 8:45 ހާއިރު އެސަރަހައްދު ޑްރައިވަރުންތައް ބަންދުކޮށްލުމާއި ގުޅިގެން 9:00 ހާއިރު ގިނަ އަދަދެއްގެ އެސްއޯ ފުލުހުން ގޮސް، މުޒާހަރާގައި އިސްކޮށް އުޅުނު ދެ ޑްރައިވަރުން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް މުޒާހަރާގެ ބައިވެރިން ބުނެފައިވެއެވެ. އަދި ޕާކުކޮށްގެން ތިބި ޓެކްސީތަކުގެ މީހުންނާއި ސުވާލުކޮށް އެސަރަހައްދުން ފޮނުވާލާފައިވެއެވެ. އަދި ބައެއް ޑްރައިވަރުން ހައްޔަރުކޮށް ބައެއް ކާރުތައް ވަނީ ޓޯކޮށްފައެވެ.