ހައްޔަރުކޮށްފައިވާ ޑްރައިވަރުންނާއި ޓޯކޮށްފައިވާ ޓެކްސީތައް ވަގުތުން ދޫކޮށްލަން ޓެކްސީ ޑްރައިވަރުންގެ ޖަމިއްޔާއިން ގޮވާލައިފި
ޑްރައިވަރުން އިންތިޒާމް ކުރި ފުރަތަމަ ހަމަހިމޭން އެއްވުން ހުކުރު ދުވަހުގެ ރޭ ވަނީ ބާއްވާފަ
ޑްރައިވަރުންގެ މުޒާހަރާ
ހައްޔަރުކޮށްފައިވާ ޑްރައިވަރުންނާއި ޓޯކޮށްފައިވާ ޓެކްސީތައް ވަގުތުން ދޫކޮށްލަން ޓެކްސީ ޑްރައިވަރުންގެ ޖަމިއްޔާއިން ގޮވާލައިފިއެވެ.
އެ ޖަމިއްޔާއިން އާއްމުކޮށްފައވާ ބަޔާނެއްގައި ބުނެފައި ވަނީ ޑިސެމްބަރު 11 ވަނަ ދުވަހުގެ ރޭ ހުޅުމާލޭ ޓްރެފިކަށް ބާރުބޮޑުވެފައި ވަނީ ފުލުހުން އަމަލުކުރި ގޮތުގެ ސަބަބުން ކަމަށެވެ. ޑްރައިވަރުން ހައްޔަރުކުރުމާއި ކާރުތައް ޓޯކުރުމަކީ މާލީ ގޮތުން ޑްރައިވަރުންނަށް ލިބޭ ބޮޑު ގެއްލުމެއް ކަމަށާއި އެއީ އަނިޔާވެރިކަން ކަމަށް އެ ޖަމިއްޔާއިން ވަނީ ބުނެފައެވެ.
އެ އެސޯސިއޭޝަނުން ވަނީ މި އަނިޔާވެރި އަމަލު ވަގުތުން ވަގުތަށް ހުއްޓާލުމަށް ގޮވާލާފައެވެ. މީގެ އިތުރުން ހައްޔަރުކޮށްފައިވާ ޑްރައިވަރުންނާއި ޓެކްސީތައް ދޫކޮށްލަން ދެން އަޑު އުފުލާނެ ކަމަށް ވެސް ބަޔާނުގައި ބުނެފައިވެއެވެ.
އެ ޖަމިއްޔާއިން މިފަދަ ބަޔާނެއް ނެރެފައިވާއިރު ހައްޔަރުކޮށްފައިވާ ޓެކްސީ ޑްރައިވަރުން ދޫކޮށްލަން ދެން ހަމަހިމޭން އިހުތިޖާޖެއް ކުރިއަށްގެންދަން ޓެކްސީ ޑްރައިވަރުން ވަނީ ނިންމާފައވެ.
އެގޮތުން ޑްރައިވަރުން އިންތިޒާމް ކުރި ފުރަތަމަ އެއްވުން ހުކުރު ދުވަހުގެ ރޭ ވަނީ ބާއްވާފައެވެ. އެކަމާއި ގުޅޭގޮތުން ޓެކްސީ ޑްރައިވާސް ކޮމިއުނިޓީން ބުނެފައި ވަނީ ރުއްގަނޑު ސަރަހައްދުގައި ކުރިއަށްދާ އެ އިހުތިޖާޖު ކުރިއަށް ގެންދާނީ ސުލްހަވެރިކަމާއެކު ކުރިއަށްދާ އެއްވުންތަކެއްގެ ގޮތުގައި ކަމަށެވެ.
އެ އެއްވުންތަކުގެ ބޭނުމަކީ ހައްޔަރު ކޮށްފައި ތިބި ޑްރައިވަރުން މިނިވަންކުރުމާއި، ޓޯ ކޮށްފައި ހުރި ކާރުތަކުގެ ތެރެއިން ދޫކޮށްނުލާ ހުރި ކާރުތައް ދޫކޮށްލަން ގޮވާލުން ކަމަށް ޑްރައިވަރުން ވަނީ ބުނެފައެވެ. މި އެެއްވުންތައް ސިލްސިލާކޮށް ކުރިއަށްގެންދާނެ ކަމަށާއި ޑްރައިވަރުންގެ ކަންބޮޑުވުންތަކަށް ހައްލެއް ނުލިބެނީސް އެއްވުންތައް ހުއްޓާ ނުލާނެ ކަމަށް ޑްރައިވަރުން ވަނީ ބުނެފައެވެ.
