ނިމިގެންދިޔަ ރައީސް އިބްރާހީމް މުހައްމަދު ޞާލިހުގެ ސަރުކާރުން ބޯހިޔާވަހިކަމަށް ބޭނުންވާ ފަރާތްތަކަށް އެ ފުރުސަތުދީ ތޮއްޖެހިފައިވާ މާލޭގެ ހަލަބޮލިކަމުން މިންޖުވުމަށް ބޯހިޔާވަހިކަމުގެ އެންމެ ބޮޑު ޕްރޮޖެކްޓް ފެށިއެވެ. އެތައް ހާސް ބަޔަކަށް ފުރުސަތު ދިނުމުގެ ގޮތުންނެވެ. އަދި ވެރިކަން ނިމިގެންދިޔަ އިރު އެ ލިބޭ ފަރާތްތައް ކަނޑައަޅާ ލިސްޓް ހަދާ ގެޒެޓްވެސް ކުރިއެވެ. ނަމަވެސް މިއަދު އެތައް ހާސް ރައްޔިތުން ދަނީ ބޯހިޔާވަހިކަމަށް ލިބުނު ކުޑަ އުއްމީދާ ދޭތެރޭގައި މާޔޫސްކަމުގެ ނަޒަރަކުން ބަލަމުންނެވެ.

ސަބަބަކީ މިހާރު މި އޮތް ސަރުކާރެވެ. ވެރިކަމަށް އަންނަން ލައްކަ ވައުދުވިއެވެ. ވެރިކަމަށް އަންނަން ދެއްކި ވާހަކަތައް ކިތައްމެހާ ވެސް ޗާލެވެ. ކިތައްމެހާވެސް ރީއްޗެވެ. އެއިރު ބުނީ މިހެންނެވެ. ދިވެހި ރައްޔިތުންނަށް، ދިވެހި ސަރުކާރަކުން، އެއީ ގޯހުން ވިޔަސް އަދި ފެއިލްވެފައިވާ ސިޔާސަތަކުން ނަމަވެސް، ރައްޔިތުންނަށް ހެޔޮކަމެއް ވާނަމަ އެކަމަކަށް ހުރަސް އަޅައިގެން ނުވާނެ ކަމަށެވެ.

ރައީސް މުއިއްޒު ވެރިކަމަށް ވަޑައިގަންނަވަން ކުރެއްވި ދަތުރުފުޅުގައި ވިދާޅުވީ ހަނދުވެސް ނަގާފައި ވެދުމަކަށް އަރުއްވާނެ ވާހަކަފުޅެވެ.

މިހާރު ވެރިކަމުގައި ހުންނެވި ރައީސް ޑރ. މުހައްމަދު މުއިއްޒު ވިދާޅުވެފައިވަނީ އެމަނިކުފާނު ދެއްވަން ބޭނުންފުޅުވާ ޔަގީންކަމަކީ އެއްވެސް ރައްޔިތަކަށް ނިކަމެތިކަމެއް އެމަނިކުފާނުގެ ސަރުކާރެއްގައި ނުލިބޭނެ ކަމަށެވެ. ގެދޮރުވެރިކަމުގެ ސިޔާސަތަކީ އެންމެ މުހިންމު ސިޔާސަތުތަކުން އެމަނިކުފާނު ވަނީ ކެމްޕޭނުގައި ތަކުރާރުކޮށް ވިދާޅުވެފައެވެ.

ކުރީގެ ސަރުކާރުން އިއުލާންކުރި ގެދޮރުވެރިޔާ ސްކީމްގެ ދަށުން ފްލެޓް ލިބޭ މީހުންގެ ލިސްޓަށް އެއްވެސް އުނިއިތުރު ކަމެއް ނުގެނެސް، ލިސްޓާ އެއްގޮތަށް ފްލެޓްތައް ހަވާލު ކުރުމަށް ރައްޔިތުންގެ މަޖިލީހުން ވެސް ވަނީ ފާސްކޮށްފައެވެ. މަޖިލީހުން މިހެން ފާސްކޮށްފައި އޮތް ނަމަވެސް، ގެދޮރުވެރިޔާ ސްކީމުގެ ދަށުން ދޫކުރި ފްލެޓުތަކާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން ނެރެފައިވާ ރިޕޯޓު ބޮލާލާ ޖަހައި، ފްލެޓްތައް ނުދޭނެ ކަމަށް ސަރުކާރުން މިވަނީ ބުނެފައެވެ.

ރައީސް މުއިއްޒު ކެމްޕެއިނާއި އަދި ވެރިކަމަށް ވަޑައިގެން ދެއްކެވި ވާހަކަފުޅު މުޅިން ބަދަލުވެއްޖެއެވެ. ކަންކުރައްވާނެ ކަމަށް ވިދާޅުވި ވާހަކަަފުޅުގެ ރާގު ބަދަލުވެއްޖެއެވެ. ދިވެހި ރައްޔިތުން ގުބޯ ހައްދައިފިއެވެ.

ގެދޮރުވެރިޔާ ސްކީމްގެ ދަށުން ފްލެޓް ލިބޭ މީހުންގެ ލިސްޓަށް އެއްވެސް އުނިއިތުރު ކަމެއް ނުގެނެސް ލިސްޓާ އެއްގޮތަށް ފްލެޓްތައް ހަވާލު ކުރުމަށް ރައްޔިތުންގެ މަޖިލީހުން ފާސްކޮށްފައިވަނީ ހޯމަ ދުވަހުގެ ޖަލްސާގައެވެ. އެގޮތުން އެ ޖަލްސާގައި ގައުމީ ތަރައްގީ އާއި ތަރިކައިގެ ކޮމިޓީން ހުށަހެޅި ގޮތަށް މަޖިލީހުގެ ތަޅުމުން ފާސްކުރީ، 29 މެންބަރުންގެ ވޯޓުންނެވެ. ސަރުކާރަށް ނިސްބަވްތާ މެންބަރަކު މި ރިޕޯޓާއި ދެކޮޅަށް ވޯޓެއް ނުދެއެވެ. ސަރުކާރުން މިކަމާއި ދެކޮޅު ހަދަން ތިބި މެންބަރުން ވެސް އެ ދުވަހު މަޖިލީހަށް ހާޒިރެއް ނުވެއެވެ.

ނަމަވެސް އެ ދުވަހު ސަރުކާރުން ބުނީ ފްލެޓު ލިސްޓާ ގުޅޭ ގޮތުން އާންމުކުރި އޭސީސީގެ ރިޕޯޓްގައި ކަންބޮޑުވާ ކަންތައްތަކެއް އެބަހުރި ކަމަށެވެ. އަދި އެއްވެސް ރައްޔިތެއްގެ ހައްގު ގެއްލިގެން ދިޔުމަކީ މި ސަރުކާރުން ބޭނުންވާ ގޮތެއް ނޫން ކަމަށެވެ.

ސަރުކާރުން ބުނީ އޭސީސީގެ ރިޕޯޓުގައި ކަންބޮޑުވުންތަކެއް ހާމަކޮށްފައިވަނިކޮށް އެ ރިޕޯޓު ބޮލާލައި ޖަހާ، އެހެން ގޮތަކަށް ސަރުކާރުން ނިންމުމަކީ ފްލެޓު ނުލިބި ތިބި ފަރާތްތަކުގެ ވެސް އަދި ފްލެޓު ލިބިފައި ތިބި ފަރާތްތަކުގެ ވެސް ހައްގުތައް ގެއްލިގެންދާނެ ކަމެއް ކަމަށެވެ.

މަޖިލީހުގެ ނިންމުމާއި ފުލެޓް ލިބުނު 4000 މީހުންނާއި ދެކޮޅަށް ސަރުކާރުން ބޭނުންގޮތަކަށް ކަންކުރާނެކަމަށް ބުނެ ރައްޔިތުންގެ މޫނަށް އެޖެހީ ހައްޕުޑެވެ. މިހާރު ވެރިކަމުގައި އޮވެ ކުރިއަށް އޮތް މަޖިލީހުގެ ސުޕަރ މެޖޯރިޓީ ނަގައި ދެން ސަަރުކާރުން ހަދާނީ ބޭނުން އެއްޗެކެވެ. މި ފެންނަމުންދަނީ މިކަމުގެ ކޮޅުމައްޗެވެ.