ރައީސްގެ ފޫޅުގެ ސާޖަރީ އާ ބެހޭ ގޮތުން ދެކެވޭ ވާހަކަ އާ ގުޅިގެން ސުވާލު ކުރުމުން ތަރުޖަމާނު ވިދާޅުވަނީ "ތިދަނީ ޕްރޮފެޝަނަލް މިންގަނޑުން ބޭރަށް" ކަމަށް!

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ޞިއްޙީ ޙާލުކޮޅާ ގުޅޭ ގޮތުން ސުވާލު ކުރުމުން، ސަރުކާރުން ސާފު ޖަވާބެއް ދިނުމަށް ދެކޮޅު ހަދައިފި އެވެ.

ސޯޝަލް މީޑިއާގައި ސަރުކާރުގެ ވައްކަމާއި ކޮރަޕްޝަންގެ ވާހަކަތައް ހާމަ ކުރަމުން އަންނަަ "ޙަސަން ކުރުސީ" އެކައުންޓުގައި ކޮށްފައިވާ ޕޯސްޓެއްގައި ބުނެފައި ވަނީ، ރައީސް މުޢިއްޒު ޞިއްޙީ މައްސަލައެއްގައި ފޫޅުގެ ސާޖަރީއެއް ކުރައްވާފައިވާ ކަަމަށެވެ.

އެކަމާ ގުޅޭ ގޮތުން ރައީސުލްޖުމްހޫރިއްޔާގެ އޮފީހުގެ ތަރުޖަމާނު ހީނާ ވަލީދުއާ ސުވާލު ކުރެއްވުމުން ވިދާޅުވީ، "ރައީސް މުޢިއްޒުއާ ބެހޭ ގޮތުން ވާދަވެރިންނާއި، ފިލާ ތިބެ މުޖުތަމައު ފަސާދަ ކުރުމަށް ފިތުނަވެރި މައުލޫމާތު ފަތުރާ މީހުން އެ ދައްކަނީ ކަނޑައެޅިގެން ބޮޑެތި ދޮގު ވާހަކަތައް،" ކަމަށެވެ.

ހީނާ އެހެން ވިދާޅުވުމުން، ރައީސް މުޢިއްޒު އެއްވެސް ޞިއްޙީ ކަމެއްގައި މި ވަގުތު ފަރުވާ ހޯއްދަވާތޯ ސުވާލު ކުރުމުން، އެ ސުވާލަށް ހީނާ ސީދާ ޖަވާބެއް ނުދެއްވި އެވެ. އޭގެ ބަދަލުގައި ހީނާ ވިދާޅުވެފައި ވަނީ، "މިހާރު ތި ދަނީ ޕްރޮފެޝަނަލް މިންގަނޑުން ބޭރަށް" މިހެންނެވެ. އަދި ސުވާލަށް ޖަވާބު ދެވިފައިިވާ ކަމަށް ހީނާ ވިދާޅުވި އެވެ.

ނަމަވެސް އެއީ ޕްރޮފެޝަނަލް ސުވާލެއް ކަމަށާއި، ރައީސްގެ ޞިއްޙީ ޙާލުކޮޅު ބުނެދިނުމަކީ ސަރުކާރުން ކުރަން ޖެހޭނެ ކަމެއް ކަމަށް ފާހަގަކޮށް، އަނެއްކާ ވެސް އެ ސުވާލު ތަކުރާރު ކުރި ނަމަވެސް، ހީނާ އެއްވެސް ޖަވާބެއް ނުދެއްވި އެވެ.

ރައީސް މުޢިއްޒުގެ ޞިއްޙީ ޙާލުކޮޅާ ގުޅޭ ގޮތުން ސަރުކާރުން ސީދާ ޖަވާބެއް ދީފައި ނުވާއިރު، ދާދި ފަހުން ރައީސް މުޢިއްޒު ވަނީ ނުރަސްމީ ދަތުރުފުޅެއްގައި ސިންގަޕޫރަށް ވަޑައިގެންފަ އެވެ. ނުރަސްމީ ދަތުރުފުޅެއްގައި ރައީސް މުޢިއްޒު ސިންގަޕޫރަށް ވަޑައިގެންނެވީ ޖުލައި މަހުގެ 30 ވީ ބުދަ ދުވަހުގެ ރޭ އެވެ. އަދި އެނބުރި ރާއްޖެ ވަޑައިގެންފައި ވަނީ އަންގާރަ ދުވަހުގެ ރޭ އެވެ.

ރައީސްގެ ޞިއްޙީ ޙާލުކޮޅާ ގުޅޭ ގޮތުން ސުވާލު ކުރުމުން ސަރުކާރުން ސީދާ ޖަވާބެއް ދީފައި ނުވާއިރު، ދުނިޔޭގެ އެކި އެކި ޤައުމުތަކުގައި ރައީސުންގެ ޞިއްޙަތަަށް ދިމާވާ ކަންކަން ރައްޔިތުންނަށް ބުނެދެ އެވެ. އެގޮތުން ޞިއްޙީ ފަރުވާއެއް ރައީސް ހޯއްދަވާ ނަމަ، އެކަން ވެސް ބުނެދެ އެވެ.

ދާދި ފަހުން އެމެރިކާގެ ރައީސް ޑޮނަލްޑް ޓްރަމްޕްގެ ޞިއްޙީ ޙާލަތާ ގުޅޭ ގޮތުން އެ ޤައުމުގައި ކަންބޮޑުވުން ތަކެއް އުފެދިފައި ވަނިކޮށް، އެމެރިކާގެ ރިޔާސީ ގަނޑުވަރު ވައިޓް ހައުސްގެ ޕްރެސް ސެކްރެޓަރީ ވަނީ އެކަން ސާފު ކޮށްދެއްވައިފަ އެވެ. އެގޮތުން ރައީސް ޓްރަމްޕް އަށް ނާރުގެ ބައްޔެއް ދިމާވެފައިވާ ކަމަށާއި، އެކަމަށް ފަރުވާ ހޯއްދަވައި، ބޭސް ކުރައްވަމުން ގެންދަވާކަން ވެސް ހާމަ ކުރެއްވި އެވެ.