ޔޫކްރައިންގެ ކުރީ ސަފުގެ ސިފައިންގެ ފަހަތުގައި، ކޮމާންޑަރު "ކާފަ" އާއި ކާފަމެންގެ ޓީމު!

އޮލެކްސަންދްރަ ތަރާންގެ ހަތިޔާރުއެޅި ހަނގުރާމަވެރި ޔުނިޓަކީ ފަހަރެއްގައިވެސް ޔޫކްރައިން އަސްކަރިއްޔާގެ ރަސްމީ ގޮތްޕެއް ނޫނެވެ. ނަމަވެސް، ޔޫކްރައިންއަށް އަތްގަދަކޮށް، ވަރުގަދަ ހަނގުރާމައެއް ކުރަމުންދާ ރަޝިއާގެ ފައުޖުތަކާ ދެކޮޅަށް ހަނގުރާމަ ކުރުމުގައި އެ ޓީމުން ފަހަރެއްގައިވެސް ފަހަކަށް ނުޖެހެއެވެ.

'ސްޓެޕް ވުލްވްސް'ގެ ނަމުގައި ތަރާން ބަލަހައްޓަމުން އަންނަ ގުރޫޕުގައި މުޅިންވެސް ހިމެނެނީ ވޮލަންޓިއަރުންނެވެ. ގިނަ މެންބަރުންނަކީ، ޢުމުރުން 60 އަހަރުން މަތީގެ މީހުންނެވެ. އެއީ އަސްކަރިއްޔާގެ ޔުނިޓްތަކުގައި ހަނގުރާމަ ކުރުމުގެ ރަސްމީ ޝަރަރުތަކުގައި ބަޔާން ކުރާ ވަރަށް ވުރެ، ޢުމުރުން ދޮށީ މީހުންނެވެ. އެހެނެއް ކަމަކު، ހަނގުރާމައިގެ މައިދާނުގައި ފަސްޖެހުމެއް ނެތެވެ. ހިތުގައި ހިނގަމުން ދަނީ ޤައުމަށްޓަކައި ހަނގުރާމަ ކުރުމުގެ ވަރުގަދަ، ޖޯޝީ ލެޔެވެ. ތަރާންގެ ޢުމުރުންވެސް މިހާރު 68 އަހަރެވެ.

ސަފުގެ އެންމެ ކުރީ ސަފުގައި ރޮކެޓް ލޯންޗަރުތައް ހަރުކޮށްފައިވާ އުޅަނދުގެ ފަހަތުން، ތަރާންގެ ޓީމުން ހަރަކާތްތެރިވަނީ ފީލްޑް ކޮމާންޑަރުންގެ އިރުޝާދުތަކާއި ޢަމުރާ އެއްގޮތަށެވެ. އަސްކަރިއްޔާގެ އެހެން ޔުނިޓްތަކާވެސް އެކުގައެވެ. ރަޝިއާއާ ދެކޮޅަށް ހަނގުރާމަ ކުރުމުގައި ތަރާންގެ ޓީމުން ހަރަކާތްތެރިވި ނަމަވެސް، ޔޫކްރައިންގެ އަސްކަރިއްޔާއިން ރަސްމީ ސިފައެއްގައި އެކަމަކަށް މާ ބޮޑު އެއްބާރުލުމެއް ނުދެއެވެ.

'ސްޓެޕް ވުލްވްސް'ގެ އޮޕަރޭޝަންތަކަށް ފަންޑު ހޯދަނީ ހެޔޮ އެދޭ ފަރާތްތައް މެދުވެރިކޮށެވެ. އަދި އިދިކޮޅުން ދޭ ޙަމަލާތަކުގެ ތެރޭގައި ފެއިލްވާ ހަތިޔާރުތަކާއި އާލާތްތައް އެއްކޮށް، މަރަމާތުކޮށްގެންވެސް ބޭނުން ކުރެއެވެ. މަރާމާތު ކުރުމުގެ މަސައްކަތްވެސް ކުރަނީ ހަމަ ތަރާންގެ ޓީމުންނެވެ. މި ހުރިހާ ސާމާނެއް، ތަރާންގެ ޓީމާ ހިސާބަށް ގެނެސްދެނީ، އެންމެ ކުރީ ސަފުގައި ހަރަކާތްތެރިވާ ފައުޖުތަކުންނެވެ.

ޔޫކްރައިންގެ އިރުދެކުނު ޒެޕޮރީޜާގައި ހުންނަ 'ސްޓެޕް ވުލްވްސް'ގެ ބޭސްއަށް ރޮއިޓަރޒްގެ ނޫސްވެރިން ދިޔަ އިރުވެސް، އެ ޓީމުން އަވަދި ނެތި އުޅެމުން ދިޔައީ ހަތިޔާރު ތައްޔާރު ކުރުމުގެ މަސައްކަތުގައެވެ. 122 އެމްއެމް ގްރޭޑް ރޮކެޓް ހަމަލާތައް ތައްޔާރު ކުރުމުގެ މަސައްކަތުގައެވެ. އެ އާލާތްތައް ފަހުން ވަނީ، ހަނގުރާމައިގެ މައިދާނުގައި ހަރަކާތްތެރިވި އެހެން ޔުނިޓަކުން ބޭނުންވެސްކޮށްފައެވެ.

ތަރާންއަކީ 'ސްޓެޕް ވުލްވްސް'ގެ ކޮމާންޑަރެވެ. މައިދާނީ ނަމުން ނަމަ އެއީ 'ގްރޭންޑްޕާ' ނުވަތަ ކާފައެވެ. އޭނާ މިހާރު އަމާޒު ހިފާފައި ހުރީ ޔޫކްރައިންގެ އަސްކަރީ ބާރުތަކާއި ރަސްމީކޮށް ގުޅި، ސީދާ އެމީހުންނަށްވެސް ހަތިޔާރު ލިބޭނެ ގޮތް ހެދުމަށެވެ. އަދި މުސާރަވެސް ހަމަޖެހޭނެ ގޮތް ހެދުމަށެވެ. ނަމަވެސް، އަދި މިހާތަނަށް އެއްވެސް ވަރެއްގެ ކާމިޔާބެއް ނުލިބެއެވެ.

'ސްޓެޕް ވުލްވްސް'ގެ ޔުނިޓްގައި، ހިސާބަކަށް ޒުވާނުންވެސް އުޅެއެވެ. އެއީ ހަނގުރާމައިގެ މައިދާނަށް ނެރެވޭ ވަރަށް 'ފިޓް' ނޫން ކަމަށް، ޔޫކްރައިންގެ ކަމާ ބެހޭ ފަރާތްތަކުން ގިންތި ކޮށްފައިވާ ޒުވާނުންނެވެ.

ރަޝިޔާއިން ޔޫކްރައިންގައި ކުރަމުންދާ ވަރުގަދަ ހަނގުރާމައަށް 2 އަހަރަށްވުރެ ގިނަ ދުވަސް ވެފައި ވާ އިރު، ޔޫކްރައިންއާ ވީ ފަޅިން ހަނގުރާމަ ކުރުމުގެ ޝަޢުޤުވެރިކަން ދެމެހެއްޓުމަށް މިއަދު ވަނީ ގޮންޖެހުންތަކާ ކުރިމަތިވެފައެވެ. ހަނގުރާމައަށް ނުކުންނާނެ މީހުން އޮންނަނީ ނުވެފައެވެ. އިންސާނީ ވަސީލަތުގެ ގޮތުން ޔޫކްރައިންގެ ފަޅި ދަނީ ހީނަރުވަމުންނެވެ. ޔޫކްރައިންގައި ބަސްވިކޭ ބައެއް މީހުންނާއި، ބޭރުގެ ބައެއް ސަޕޯޓަރުންވެސް ދަނީ، ހަނގުރާމައަށް ނުކުމެވޭނެ އެންމެ ހަގު ޢުމުރު، އަދިވެސް އިތުރަށް ދަށް ކުރުމަށް ޔޫކްރައިންގެ ރައީސް، ވްލޮމީރް ޒެލެންސްކީއަށް ގޮވާލަމުންނެވެ. މިމަހުގެ ކުރީކޮޅުގައިވެސް ޒެލެންސްކީވަނީ އެފަދަ ބަދަލެއް ގެންނަވާފައެވެ. އެގޮތުން، ޔޫކްރައިންގެ އަސްކަރިއްޔާގައި ރަސްމީކޮށް ހަނގުރާމައަށް ނުކުމެވޭނެ އެންމެ ހަގު ޢުމުރު ވަނީ، 27 އަހަރުން 25 އަހަރަށް ބަދަލު ކޮށްފައެވެ.

2014 ވަނަ އަހަރު، ރަޝިއާއިން ޔޫކްރައިންއަށް އަތްގަދަ ކުރަން ފެށުމާއެކު ހަނގުރާމަ ކުރަމުން އަންނަ ތަރާން ޤަބޫލު ކުރާ ގޮތުގައި، ހަނގުރާމައިގެ މައިދާނަށް ނުކުންނަން މަޖުބޫރު ކުރުމަކީ، ދިފާޢު ކުރުމުގެ ޙަޤީޤީ ޖޯޝް ގެނުވުން ދުރު ކުރާނެ ކަމެކެވެ.