ފުޓް އެންޑް މައުތުގެ ބިރަށްފަހު އިންޑޮނޭޝިއާގެ ނަޢަމްސޫފީގެ ވިޔަފާރި މެކުހަށް!

މީގެ އަހަރެއްހާ ދުވަސް ކުރިއެވެ. އިންޑޮނޭޝިއާގައި އޮތް 1.3 ހެކްޓަރުގެ މި ދަނޑު، އޭރު ފެންނަން އޮތީ ދިރުމެއް ނެތް ހަނަފަސް ބިމެއްގެ ގޮތުގައެވެ. މުޅި ދުނިޔެ އިނދަޖައްސައިލި ކޮވިޑް-19ގެ ބަލިމަޑުކަމާއި، ފުޓް އެންޑް މައުތު ޑިޒީޒް (އެފްއެމްޑީ)ގެ ބަލިމަޑުކަމުގައި ދަނޑުބިންތައް ހަލާކުވެ، އިންޑޮނޭޝިއާގައި އޮތް ނަޢަމްސޫފީގެ އާބާދީން 22000އަށްވުރެ ގިނަ ތަކެތި މަރުވިއެވެ.

ޖޮންގޯލްގެ ނަޢަމްސޫފީގެ ބާޒާރުން މިއަހަރު ފެންނަނީ ތަފާތު މަންޒަރެކެވެ. ބަރަކާތްތެރި އަޟްޙާ ޢީދުގެ މުނާސަބާ ގާތްވަމުން އަންނަ ވަރަކަށް، ޖޮންގޯލްގެ ނަޢަމްސޫފީގެ ވިޔަފާރީގެ ދުވެލި ފެންނަނީ މެކުހަށް ޖަހާފައި ވާތީއެވެ. ބައެއް ދުވަސް ދުވަހު، ވިއްކަން ނެރެފައި ހުންނަ ގެރިއާއި ކަންބަޅިބަކަރިތަކުގެ ޢަދަދު 800އަށްވެސް އަރައެވެ.

މި ބާޒާރަކީ ހުޅަނގު ޖާވާ ސަރަޙައްދުގައި އެންމެ އިހުގެ ގޮތަށް ހިންގާ ނަޢަމްސޫފީގެ ބާޒާރުތަކުގެ ތެރެއިންވެސް އެންމެ ބޮޑު އެއް ބާޒާރެވެ. އެފްއެމްޑީގެ އިތުރުން ލަމްޕީ ސްކިން ޑިޒީޒްގެ ސަބަބުން 2022 ވަނަ އަހަރު މި ބާޒާރު ބަންދުކުރަން މަޖުބޫރުވިއެވެ. ވިޔަފާރި އިންތިހާއަށް ދަށަށް ދިޔައެވެ. އިންޑޮނޭޝިއާގެ ރިސޯޓް ރަށެއް ކަމަށްވާ ބާލީން ބަލި ފެނުމާއެކު، ނަޢަމްސޫފީ ގެންގުޅޭ، އަވައްޓެރި ނިއުޒީލަންޑާއި އޮސްޓްރޭލިއާއިންވެސް ރައްކާތެރިކަމުގެ ފިޔަވަޅުތައް ވަރުގަދަކުރިއެވެ.

މި ބައްޔަކީ ޖަނަވާރުތަކަށް ނުރައްކާތެރި ބައްޔަކަށް ވީނަމަވެސް، އިންސާނުންގެ ޢާންމު ޞިއްޙަތަށް މާ ބޮޑު ނުރައްކަލެއް އޮތް ކަމަކަށް ނުބެލެވެއެވެ.

ނަޢަމްސޫފީގެ ބާޒާރުގައި އެންމެ ނަން ހިނގާ އެއް ވިޔަފާރިވެރިއެއް ކަމަށްވާ ހާޖީ ކާބުލްގެ އުއްމީދުތައް ފޮންޏެވެ. މިއަހަރު ބާޒާރަށް ނެރެވުނު ނަޢަމްސޫފީގެ ފެންވަރު ރަނގަޅުވެފައި، ކުރިއަށް އޮތް ޢީދަށް، ޑިމާންޑް އިތުރުވެގެން ދާތީއެވެ.

ނަޢަމްސޫފީގެ މެދުގައި މިއަހަރުވެސް ނުރައްކާތެރި ބަލިމަޑުކަމެއް ފެތުރިދާނެ ކަމަށްޓަކައި، އިންޑޮނޭޝިއާގެ ކަމާބެހޭ ފަރާތްތަކުން މިދިޔަ އަހަރު ވަނީ ޤައުމީ ފެންވަރުގައި ވެކްސިން ކެމްޕޭނެއް ހިންގާފައެވެ. އެ ކެމްޕޭން ހިންގީ ނަޢަމްސޫފިތަކަށް ވެކްސިން ދިނުމަށެވެ.

އިންޑޮނޭޝިއާގެ އިޤްތިޞާދީ ކަންކަމާބެހޭ ވުޒާރާއިން މަޢުލޫމާތު ދޭގޮތުގައި، 2022 ވަނަ އަހަރުގެ މެއި މަހު، ނަޢަމްސޫފީގެ ތެރެއިން 20000 ޖަނަވާރެއް އެފްއެމްޑީ އިންފެކްޝަނަށް ޕޮޒިޓިވްއިރު، ޖޫން މަހު އެ ޢަދަދު ވަނީ 2 ލައްކަ 32 ހާހަށްވުރެ މައްޗަށް އަރާފައެވެ.

ބަދުރުއްސަލާމަކީ ނަޢަމްސޫފީގެ ބާޒާރުން ޢާންމުކޮށް ވިޔަފާރިކުރާ މީހެކެވެ. އޭނާއަކީ ޢާންމުގޮތެއްގައި އަހަރެއްގެ މައްޗަށް ވިއްސަކަށް ގެރި ގަންނަ މީހެކެވެ. ނަޢަމްސޫފީގެ ޞިއްޙީ ޙާލަތު ރަނގަޅު ކުރުމަށްޓަކައި އަޅާފައިވާ ފިޔަވަޅުތަކާމެދު ބަދުރުއްސަލާމް ހުރީ ހިތްހަމަޖެހިފައެވެ.

ކަން މިހެން އޮތް ނަމަވެސް، މިއަހަރުގެ ބާޒާރުގައި އަގުތައް އުފުލިފައިވާކަން ބައެއް މީހުން ފާހަގަކުރެއެވެ. ނަޢަމްސޫފި ވިއްކުމުގައި އުޅުނު މީހަކު ބުނިގޮތުގައި، އޭނާ ޖަނަވާރު ވިއްކާ އަގުން 20 ޕަސެންޓް ވަނީ ބޮޑުކޮށްފައެވެ. މި އަހަރުގެ މެއި މަހު، އިންޑޮނޭޝިއާގެ އިންފްލޭޝަން ރޭޓް ހުރީ 4 ޕަސެންޓްގައެވެ.

ޙައްޖުގެ މަތިވެރި އަޅުކަމަށްފަހު މުސްލިމުންނާ ބައްދަލުކުރާ އަޟްޙާ ޢީދު ޚާއްޞަވަނީ، އެކަމަކަށް ކުފޫ ހަމަވެ، ކެރިކުޅަދާނަވާ މީހުން އުޟްޙިޔާ ކަތިލުމަށެވެ. ޛުލްޙިއްޖާ މަހުގެ އެންމެ މާތް 10 ދުވަސް ނިމިގެންދަނީ އަޟްޙާ ޢީދުންނެވެ. މި ދުވަހުގައި ޢީދު ނަމާދު ކުރުމާއި، އުޟްޙިޔާ ކަތިލުން އޮވެއެވެ. އެއީ ޢީދު ދުވަހު ގެރި ބަކަރިއާއި ޖަމަލުފަދަ ޖަނަވާރުގެ ޤުރުބާނެއް ﷲ ސުބުޙާނަހޫ ވަތަޢާލާއަށް ކުރުމެވެ. އެ ޤުރުބާނުގެ ސަބަބުން ﷲގެ ޙަޟްރަތަށް ކުއްތަންވެވޭނެއެވެ. އެއީ ﷲގެ މަގުގައި މުދާ ހޭދަކުރުމާއި ނިކަމެތިންނަށް އިޙްސާންތެރިވުމެވެ. އެހެންކަމުން އުޟްޙިޔާ ކަތިލުމަށް މުސްލިމުން ލޯބިކުރެއެވެ.