ޕީއެސްޖީ ބަލިކޮށް، ޑޯޓްމަންޑުން އުންމީދުގައި

ޔުއެފާ ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގުގައި ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ބަލިކޮށް، ޖަރުމަނުގެ ބޮރޫޝިއާ ޑޯޓްމަންޑުން ފައިނަލްގެ އުންމީދު ބޮޑުކޮށްފި އެވެ.

ޑޯޓްމަންޑުގެ އަމިއްލަ ދަނޑުގައި ބުދަ ދުވަހުގެރޭ ކުޅުނު ސެމީ ފައިނަލްގެ ފުރަތަމަ ލެގު އެ ޓީމުން ކާމިޔާބު ކުރީ 1-0 އިންނެވެ. މިއީ މި ސީޒަންގެ ޗެމްޕިއަންސް ލީގުގައި މި ދެ ޓީމު ބައްދަލު ކުރި ތިން ވަނަ ފަަހަރެވެ. މުބާރާތުގެ ގްރޫޕް ސްޓޭޖުގައި ދެ ޓީމު ބައްދަލު ކުރިއިރު، ޕީއެސްޖީގެ ދަނޑުގައި ކުޅުނު މެޗުން ޑޯޓްމަންޑު ބަލިވި ނަމަވެސް، އަމިއްލަ ދަނޑުގައި ކުޅުނު މެޗު ވަނީ އެއްވަރު ކޮށްފަ އެވެ.

ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނުނު މެޗުގައި، ޑޯޓްމަންޑުން ލަނޑު ޖަހައި ލީޑު ނެގީ ފުރަތަމަ ހާފުގެ 36 ވަނަ މިނެޓުގަ އެވެ. އެ ޓީމަށް ލީޑު ނަގައިދިނީ ނިކްލަސް ފުލްކްރޫގް އެވެ. އޭގެ ފަހުން ޕީއެސްޖީ އަށް ނަތީޖާ ހަމަހަމަ ކުރުމުގެ ފުރުސަތު ލިބުނުއިރު، ޑޯޓްމަންޑަށް ވަނީ ލީޑު ފުޅާ ކުރުމުގެ ފުރުސަތު ވެސް ލިބިފަ އެވެ.

ފުރަތަމަ ލެގުން ބަލިވުމުން، މުބާރާތުގެ ފައިނަލްގެ ޖާގައެއް ބޭނުންވާ ނަމަ، ޕީއެސްޖީ އަށް ޖެހޭނީ އަމިއްލަ ދަނޑުގައި ކުޅޭ ދެ ވަނަ ލެގުގައި ޑޯޓްމަންޑު ބަލި ކުރާށެވެ. ޕީއެސްޖީގެ ދަނޑުގައި މި ދެ ޓީމު ކުޅޭ ދެ ވަނަ ލެގުގެ މެޗު އޮންނާނީ، އަންނަ ހަފުތާގެ އަންގާރަ ދުވަހުގެ ރޭ އެވެ.