އިންތިޚާބުތަކުން އެމްޑީޕީ ބަލިވި ސަބަބުތައް ދެނެގަތުމަށް ދިރާސާއެއް ކުރުމަށްފަހު މަގުޗާޓެއް އެކުލަވާލަނީ
މިއީ ރިޔާސީ އިންތިޚާބަކާއި ރައްޔިތުންގެ މަޖިލީހުގެ އިންތިޚާބަކުން އެމްޑީޕީއަށް ނާކާމިޔާބީ އާ ކުރިމަތިވި ފުރަތަމަ ފަހަރެއް ނޫން
އެމްޑީޕީގެ ނޫސްވެރިންގެ ބައްދަލުވުމުގެ ތެރެއިން
ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބުން އެމްޑީޕީ އަށް ކުރިމަތިވި ބޮޑު ނާކާމިޔާބީގެ ސަބަބުތައް ދެނެގަތުމަށް ދިރާސާއެއް ކުރުމާއެކު ރައްޔިތުން އެމްޑީޕީގެ ކުރިމަގާމެދު ދެކޭގޮތް ދެނެގަނެ ޕާޓީ ކުރިޔަށްގެންދާނެ ގޮތުގެ މަގު ޗާޓެއް އެކުލަވާލުމަށް އެމްޑީޕީގެ ގައުމީ މަޖިލީހުން ނިންމައިފިއެވެ.
ބުދަ ދުވަހުގެ ރޭ އެމްޑީޕީިން ވަނީ ސިއްރުކޮށްގެން އެޕާޓީގެ ގައުމީ މަޖިލީހެއް ބާއްވާފައެވެ. އެއަށްފަހު ނޫސްވެރިންނާ ބައްދަލުކޮށް އެޕާޓީގެ ރައީސް އަބްދުﷲ ޝާހިދު އާއި ޗެއަރޕާސަން ފައްޔާޒު އިސްމާއީލު ވަނީ ގައުމީ މަޖިލީހުގެ ނިންމުންތައް ނޫސްވެރިންނާ ހިއްސާކޮށްފައެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ޕާޓީގެ ރައީސް އަބްދުﷲ ޝާހިދު ވިދާޅުވީ މިއީ ރިޔާސީ އިންތިޚާބަކާއި ރައްޔިތުންގެ މަޖިލީހުގެ އިންތިޚާބަކުން އެމްޑީޕީއަށް ނާކާމިޔާބީ އާ ކުރިމަތިވި ފުރަތަމަ ފަހަރު ނޫންކަމަށެވެ. އެހެންކަމުން އަނެއްކާވެސް އެމްޑީޕީގެ ގައުމީ މަޖިލީހުން އެއްބަސްވީ ޕާޓީ އަލުން ތަރުތީބުވެގެން ނިކުމެ އެމްޑީޕީގެ ފިލޯސަފީތަކާ އެއްގޮތަށް ރައްޔިތުންނަށް ޚިިދުމަތް ކުރުމުގައި ރައްޔިތުން ބޭނުންވާ ކަންކަން ކޮށްދިނުމުގައި ބާރަށް މަސައްކަތް ފެށުމަށްކަމަށް ޝާހިދު ވިދާޅުވިއެވެ.
އަދި ގައުމީ މަޖިލީހުން ނަގާ ކޮމިޓީތަކުން އިންތިޚާބުތަކުން ޕާޓީ ބަލިވި ސަބަބު ދެނެގަތުމާއެކު ޕާޓީ ކުރިޔަށް އޮތްތަނުގައި ބައްޓަންވެގެންދާންވީ ގޮތުގެ މަސައްކަތްތައް ކުރިޔަށް ގެންދާނެކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ 2013 އަދި 2014 ގައި ބޭއްވި ރިޔާސީ އިންތިޚާބާއި މަޖިލިސް އިންތިޚާބުން ބަލިވުމުންވެސް ހަމަ މިގޮތަށް ބަލިވި ސަބަބު ދެނެގަތުމަށް ދިރާސާއެއްކޮށް އަލުންބަލުން މަސައްކަތްތަކެއް ކުރިކަމަށެވެ. އަދި އެކުރި މަސައްކަތްތަކުގެ އަލީގައި 2018 އަދި 2019 ވަނަ އިންތިޚާބު އެމްޑީޕީއަށް ބޮޑުތަނުން ކާމިޔާބުކުރެވުނުކަމަށް ޝާހިދު ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ފައްޔާޒު ވިދާޅުވީ ގައުމީ މަޖިލީހުގެ ބައްދަލުވުމުގައި އެކި މެމްބަރުންގެ ފަރާތުން ތަފާތު ޚިޔާލުތައް ލިބިގެންދިޔަކަމަށެވެ. އޭގެތެރޭގައި ޕާޓީ ކުރިޔަށް ގެންދަންވީ ގޮތާއި ޕާޓީގެ ހަރަކާތްތައް ކުރިޔަށްގެންދަންވީ ގޮތާއި އިންތިޚާބުތަކުން ނާކާމިޔާބުވާން ދިމާވި ސަބަބުތައް ކޮންމެ މެމްބަރަކުވެސް ފާހަގަކުރެއްވިކަމަށް ފައްޔާޒު ވިދާޅުވިއެވެ.
އެހެންކަމުން ކުރިޔަށްގެންދެވޭ ދިރާސާގެ ތެރޭގައި ޕާޓީގެ މެމްބަރުންގެ ޚިޔާލުގެ އިތުރުން ދިވެހި ރައްޔިތުންގެ ޚިޔާލުވެސް ހޯދޭނެކަމަށް ފައްޔާޒު ވިދާޅުވިއެވެ. އަދި އެމްޑީޕީ ކުރިޔަށްގެންދާނެ ގޮތެއް އެކުލަވާލާނީ އެއަށްފަހު އެދިރާސާގެ އަލީގައި ކަމަށް ފައްޔާޒު ވިދާޅުވިއެވެ.
ފައްޔާޒު ވިދާޅުވީ ކުރިޔަށް އޮތް އެއް އަހަރަށް ޕާޓީގެ ލީޑަރޝިޕްގެ ފޯކަސް އޮތީ އެމްޑީޕީ ވަރުގަދަކުރުމުގެ މައްޗަށްކަމަށެވެ. ކައިރިކައިރީގައި އިންތިޚާބުތަކެއް އައުމާއެކު ޕާޓީ ވަރުގަދަކުރުމަށް މަސައްކަތްތަކެއް ކުރެވިފައިނުވާކަމަށް ފައްޔާޒު ވިދާޅުވިއެވެ.
އަދި އެކަންކުރުމަށްޓަކައި ޕާޓީގެ ގްރޫސް ރޫޓް ޕާޓީ އާމެދު ދެކޭގޮތް ބަލާ ކަންކަން ހައްލުކުރެވެން ހުރި ގޮތްތައް ބަލާނެކަމަށް ފައްޔާޒު ވިދާޅުވިއެވެ. އަދި ޕާޓީ އިތުރަށް ވަރުގަދަ ކުރުމަށް މަސައްކަތްކުރުމަށް މަގު ޗާޓެއް އެކުލަވާލެވިގެންދާނެކަމަށް ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ޕާޓީގެ ރައީސް ޝާހިދު އަދި ޕާޓީގެ ޗެއަރޕާސަން ފައްޔާޒުވެސް ވިދާޅުވީ އެމްޑީޕީން ކެމްޕެއިން ކުރިޔަށްގެންދިޔައީ ބޮޑަށް އެންޓި ކެމްޕެއިންގެ ގޮތުގައި ދައްކާ ވާހަކަތައް ގަބޫލުނުކުރައްވާކަމަށެވެ. ފައްޔާޒު ވިދާޅުވީ ދިރާސާގެ އަލީގައި ކެމްޕެއިނުން ބަލިވީ ކެމްޕެއިން ކުރިޔަށްގެންދެވުނު ގޮތުންތޯ، ލީޑަރޝުޕްގެ މައްސަލައަކުންތޯ ނުވަތަ ރާއްޖޭގެ ސިޔާސީ މާހައުލަށް އައިސްފައި އޮތް ބަދަލުތަކުންތޯ ދެނެގަނެވޭނެކަމަށެވެ.
އަބަދުވެސް އިދިކޮޅުގައި ތިބޭ ބަޔަކު ސަރުކާރަކުން ކުރާ ގޯސްކަންތައްތަކުގެ ވާހަކަ ދައްކާނެކަމަށް ފައްޔާޒު ވިދާޅުވިއެވެ. ކެމްޕެއިން ބައްޓަންކުރީ ރާއްޖެ ހަމަމަގުން ގެއްލޭތަން ހަގީގަތުގައިވެސް ފެންނަމުންދާތީ އެކަންކަން ރައްޔިތުންނަށް ސާފުކޮށްދިނުމަށްކަމަށް ފައްޔާޒު ވިދާޅުވިއެވެ.
އެކަމާއި ގުޅޭގޮތުން ޝާހިދު ވިދާޅުވީ އެމްޑީޕީން އިންތިޚާބުގެ ތެރޭގައި އެންޓި ކެމްޕެއިން ނުކުރާކަމަށެވެ. އެމްޑީޕީން ސަރުކާރުގައި އޮތްއިރުވެސް އަދި އިދިކޮޅުގައި އޮތްއިރުވެސް ކުރި ކަމަކީ ހަގީގަތް ރައްޔިތުންނާ ހަމައަށް ގެނެސްދިނުންކަމަށް ޝާހިދު ވިދާޅުވިއެވެ.
އެކަންކަން ރައްޔިތުންނާ ހަމައަށް ގެނައުން އެއީ އެންޓި ކެމްޕެއިން ކުރުންކަމުގައި ބަޔަކަށް ތަސައްވަރު ކުރެވޭނަމަ އޭގައި ކުރެވޭނެ ކަމެއް ނޯންނާނެކަމަށާއި އެމްޑީޕީން އަބަދުވެސް ކުރާ ކަމަކީ ހަގީގަތް ރައްޔިތުންނަށް ހަމައަށް ގެނެސްދިނުންކަމަށް ޝާހިދު ވިދާޅުވިއެވެ.
