ބޮޑެތި ކުށްތަކަށް އަރިގަތުމަށް ޖަޒީރާގެ އެކި ނަން ނަމުގައި ހިންގި ޓެލެގްރާމް ޗެނަލްގެ މައްސަލައިގައި ހައްޔަރު ކުރި އަންހެން މީހާގެ ބަންދަށް އިތުރު 15 ދުވަސް ޖަހައިފިއެވެ.

ޓެލެގްރާމް ޗެނަލްތައް އުފައްދައިގެން ގާނޫނާ ހިލާފު ކަންތައްތައް ހިންގާ ކަމަށް ހުށަހެޅޭ މައްސަލަތަކާއި ގުޅިގެން ޚާއްސަ އޮޕަރޭޝަނެއް ހިންގާ، 6 މާރިޗް 2024 ގައި ޖަޒީރާ އެޑްމިން އާއި ޖަޒީރާ ގާލްސް އާއި ޖަޒީރާ އެސްކޯޓް ގެލަރީ އާއި ޖަޒީރާ ސްކޭމް އެލާޓް އަދި ޖަޒީރާ ލިންކް ހަބަރު ޗެނަލް ފުލުހުންގެ ބާރުގެ ދަށަށް ގެނެސްފައިވާކަން ފުލުހުން ވަނީ ހާމަކޮށްފައެވެ.

އެކަމުގެ ތުހުމަތުގައި އުމުރުން 28 އަހަރުގެ ފިރިހެނަކާއި 39 އަހަރުގެ އަންހެނަކު ހައްޔަރުކޮށް، ތަހުގީގަށް ބަންދުގެ މުއްދަތު ޖަހާފައެވެ. އެއީ ދެމަފިރިން ކަމަށް މައުލޫމާތު ލިބެއެވެ. މީގެ އިތުރުން މާރޗު މަހުގެ 30 ވަނަ ދުވަހު 60 އަހަރުގެ ފިރިހެނެއް ވެސް ވަނީ ހައްޔަރުކޮށްފައެވެ. އޭނާއަކީ "ޖަޒީރާ"ގެ ނަމުގައި ހިންގި ޓެލެގްރާމު ގުރޫޕުތަކާ ގުޅުން ހުރި ޓެކްސީ ޑްރައިވަރެވެ.

މީހުންގެ ތެރެއިން އަންހެން މީހާގެ ބަންދުގެ މުއްދަތު ހަމަވާތީ ހުކުރު ދުވަހަށް ވަނީ ހަމަވެފައެވެ. އެހެންކަމުން ހުކުރު ދުވަހު ފުލުހުން ވަނީ އޭނާ ކްރިމިނަލް ކޯޓަށް ހާޒިރުކޮށް ބަންދުގެ މުއްދަތު އިތުރު ކުރުމަށް އެދިފައެވެ. ފުލުހުން އެގޮތަށް އެދުމުން އަންހެން މީހާ ވަނީ އޭނާއަކީ ވަޒީފާއެއްގައި އުޅޭ މީހަކަށްވާތީ އަވަހަށް ތަހުގީގު ނިންމަ ދޭން އެދިފައެވެ.

ނަމަވެސް ގާޒީ ވަނީ އޭނާގެ ބަންދަށް އިތުރު 15 ދުވަސް ޖަހާދީފައެވެ.

މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.

މި މައްސަލައިގައި ހައްޔަރުކުރި މީހުންނަކީ އާމްދަނީ ހޯދުމަށް ވަޒީފާއެއް އަދާކުރާ ބައެއް ނޫން ކަމަށާއި ނަމަވެސް އެކައުންޓްތަކުން ގިނަ އަދަދެއްގެ މުއާމަލާތްކޮށްފައިވާ ކަަމަށް ފުލުހުން ބުނެއެވެ.

އޭގެ ތެރެއިން އެކަކަކީ ކުށުގެ ރިކޯޑު އޮންނަ މީހެއް ކަމަށްވެސް ފުލުހުން ބުނެފައިވެއެވެ.

މިމައްސަލައާ ގުޅިގެން ގިނަ ބަޔަކަށް ތުހުމަތުކުރެވޭއިރު، އެއިން ކޮންމެ މީހެއްގެ އެކައުންޓުން ދެ މިލިއަނަށް ވުރެ ގިނަ ރުފިޔާ ދައުރު ކޮށްފައިވާކަމަށްވެސް ފުލުހުން ބުނެއެވެ.

ފުލުހުން މައުލޫމާތު ދިން ގޮތުގައި ހަށިވިއްކުމުގެ ވިޔަފާރި ހިންގުމަށްޓަކައި ރާއްޖެއާއި ރާއްޖެއިން ބޭރުން އަންހެނުން ހަރަކާތްތެރިވެފައިވާއިރު، މިކަމަށް އެއް ޓެކްސީ ޚާއްސަކޮށްފައިވެއެވެ.