ވެލެޑިކްޓޯރިއަންގެ ޝަރަފުން ތަބައްސުމް މަހްރޫމު ކުރީ ކޮން ޙައްޤަކާއިލައިގެން؟

ދުނިޔޭގައި އޮތް އެންމެ ވަރުގަދަ ޑިމޮކްރަސީ ކަމަށް ވަކާލާތު ކުރަމުންދާ ޤައުމަކީ، އެންމެ ނުފޫޒު ގަދަ ޤައުމު ކަމަށްވެސް ވަކާލާތު ކުރާ އެމެރިކާއެވެ. ނަމަވެސް އެމެރިކާގެ ދޭސީ މަސްރަޙުގައި ކަން ހިނގަމުން ދާ ގޮތަށް ބަލާއިރު، ހަމަހަމަ ކަމާއި އިންސާފުގެ ކަންފުޅެއްވެސް ފެންނަން ނޯވެއެވެ. ހުރިހާ ދިމާއަކުންވެސް ފެންނަނީ އެމީހަކަށް ކުރެވެން އޮތް ގޮތަކަށް ނުފޫޒުގެ ނާޖާއިޒު ފައިދާ ނަގާ މަންޒަރެވެ. މި ވާހަކަތަކަކީ ބަޔަކަށް ޙަޖަމް ކުރަން ދަތި ކަމަކަށް ވިއަސް، ކަން އޮތް ގޮތް އޮޅުވާލެވޭކަށް ނެތެވެ. ޔުނިވަރސިޓީ އޮފް ސަދަރން ކެލިފޯނިއާ (ޔޫއެސްސީ) ގައި ދާދި ފަހުން ހިނގާ ދިޔަ ކަންތަކުންވެސް އެމެރިކާގެ ޙާލަތު ސާފުވެއެވެ.

ދަސްވެނިވުމުގެ ރަސްމިއްޔާތުތައް އިންތިޒާމުކޮށްފައި އޮންނަނީ، އެ ފަހަރަކު އެ ދަސްވެނިވާ ދަރިވަރުންގެ ތެރެއިން ކިޔެވުމުގެ އިތުރަށް ދެންވެސް އެހެން ހުރިހާ ގޮތަކުން އެންމެ ފާހަގަކޮށްލެވޭ ދަރިވަރު، އެންމެހާ ޖަލީސުންނާ މުޚާޠަބުކޮށް ވާހަކަދައްކާ ގޮތަށެވެ. އެއީ ދަސްވެނިވާ ދަރިވަރަކަށް ލިބޭ އެންމެ ބޮޑު ޝަރަފުގެ ގޮތުގައި އޮންނަނީ ބަލައިގަނެވިފައެވެ. ޔޫއެސްސީގައި ކުރިއަށް އޮތް ދަސްވެނިވުމުގެ ރަސްމިއްޔާތުގައި މި ދެންނެވި ނަމްބަރު ފުރިހަމަ ކުރަން ހޮވުނީ މުސްލިމު ދަރިވަރެކެވެ. ނަމަވެސް ދެން ލިބުނު ޚަބަރަކީ، އެންމެ މޮޅު ދަރިވަރުގެ ވާހަކަދެއްކުމަށް ޚާއްޞަ ކޮށްފައި އޮތް ނަމްބަރު، ދަސްވެނިވުމުގެ ރަސްމިއްޔާތުގެ އެޖެންޑާއިން ނެގި ޚަބަރެވެ. ސަބަބެއް ކަމަށް ބަޔާން ކޮށްފައި ވަނީ ކެމްޕަހުގެ ސަލާމަތީ ކަންކަމާ މެދު ކަންބޮޑުވުންތަކެއް ހުރުމާއި، މެދުއިރުމަތީގެ މަސްރަހު ނުތަނަވަސްވުމެވެ. ޔޫއެސްސީގެ ނިންމުމާއެކު ތަފާތު އެތައް ގޮތަށް ބަހުސްތައް ވަނީ ފަށާފައެވެ. ދަރިވަރު ބުނި ގޮތުގައި، އޭނާއަށް އަލުން އެ ފުރުޞަތު ދިނުމަކީ އުސޫލުތަކަށް ލިބުނު ނަޞްރެއްގެ ގޮތުގައި ބަލައިގަންނަން މިހާރުވެސް ތައްޔާރަށް ހުރި ކަމަށެވެ.

އޭޕްރިލް 17 ވަނަ ދުވަހު ރޮއިޓަރޒްއާ ވާހަކަދައްކަމުން، ޢުމުރުން 21 އަހަރުގެ އަސްނާ ތަބައްސުމް ބުނީ، ޔޫއެސްސީގެ ނިންމުން، އިހު އޮތް ގޮތަށް ބަދަލު ކުރުމަކީ، މި ވަގުތު އޭނާ އެންމެ އުންމީދު ކުރަމުންދާ ކަންތައް ކަމަށެވެ. ތަބައްސުމް މަތީ ތަޢުލީމު ހާސިލު ކުރީ ބަޔޮމެޑިކަލް އިންޖިނޭރިންގގެ ދާއިރާއިންނެވެ. ޔޫއެސްސީގެ މަންދޫބުންނާއެކު ކުރި މަޝްވަރާތަކުގެ ވާހަކަ ހިއްސާ ކުރަމުން ތަބައްސުމް ބުނީ، އެއީ ވަކި ފަރާތަކަށް ޖެހިފައި އޮތް މަޝްވަރާތަކެއް ކަމަށެވެ. ސަލާމަތީ ކަންބޮޑުވުންތަކެއް ހުރި ކަމަށް ބުނެ، އެޖެންޑާއަށް ބަދަލު ގެނައި އިރު، އެ ކަންކަން ތަފްސީލު ކޮށްދީފައި ނުވާކަން ވެސް ތަބައްސުމް ފާހަގަ ކުރިއެވެ.

ދަސްވެނި ވުމުގެ ރަސްމިއްޔާތުގައި ތަބައްސުމް ވާހަކަ ދައްކާ ގޮތަށް އޮތް އޮތުން ބާތިލު ކުރަން ނިންމި ކަން ޔޫއެސްސީއިން އިޢުލާން ކުރީ އޭޕްރިލް 15 ވަނަ ދުވަހުއެވެ. އެ ނަމްބަރު، އެޖެންޑާއިން އުނި ކުރަން ނިންމާފައި ވަނީ އެ ޝަރަފު ލިބޭ ކުއްޖާގެ ވަނަވަރާއި، ކަންކަމުގައި ދެކޭ ގޮތަށް ރިޢާޔަތް ކޮށްގެން ނޫން ކަމަށާ، ނަމަވެސް އެ ނިންމުން ނިންމަން ޖެހުނީ ޙާލަތު މުރާޖާ ކުރުމަށް ފަހު، ސަލާމަތާއި ރައްކާތެރިކަމުގެ ނަޒަރިއްޔާއިން ވިސްނުމަށް ފަހުގައި ކަމަށެވެ.

އެފަދަ ނިންމުމެއް ނިންމުމަކީ ފަސޭހަ ކަމެއް ނޫން ކަމަށާ، އެހެން ނަމަވެސް އެއީ ކޮންމެހެން ކުރަން ޖެހިފައި އޮތް ކަމެއް ކަމަށް ޔޫއެސްސީއިން ސިފަ ކުރެއެވެ. އެކަން ބަޔާންކޮށް، ޔޫއެސްސީއިން ނެރުނު ބަޔާނުގައިވެސް، ސަލާމަތީ ނުރައްކާތަކުގެ އެއްވެސް ތަފްސީލެއް ދީފައެއް ނުވެއެވެ. އަދި އެ ޔުނިވަރސިޓީއަށް އިންޒާރުތަކެއް ދީފައި ވާ ކަން، ނުވަތަ ނޫން ކަންވެސް ބަޔާންކޮށްދީފައެއް ނުވެއެވެ.

މި ހުރިހާ ކަމެއް މިހެން ހުރި އިރު، ސޯޝަލް މީޑިއާގެ އެކި ޕްލެޓްފޯމްތަކުގައި ކުރަމުންދާ ބަހުސްތަކާއެކު، ތަބައްސުމްއަށް ވަނީ ނަފްސާނީ ގޮތުންވެސް ނޭދެވޭ އަސަރުތަކެއް ކުރަން ފަށާފައެވެ.

ދަސްވެނިވުމުގެ ރަސްމިއްޔާތުގެ އެންމެ ފަޚްރުވެރި ނަމްބަރު ނުވަތަ ވެލެޑިކްޓޯރިއަންގެ ގޮތުގައި ވާހަކަދައްކާ ދަސްވެނީގެ މަޤާމަށް ތަބައްސުމް ހޮވުނީ، ޝަރުތު ހަމަވާ ދަރިވަރުންގެ ތެރެއިން އެކަމަށް އެދި ހުށަހެޅި 100 އެއްހާ ދަސްވެނީންގެ ތެރެއިން ފުރޭނިގެންނެވެ. ވެލެޑިކްޓޯރިއަންގެ މަޤާމަށް ވާދަ ކުރުމަށްޓަކައި، ދަސްވެނިވާ ކޯހުގެ ގްރޭޑް-ޕޮއިންޓް-އެވަރޭޖް (ޖީޕީއޭ) ވަކި ޢަދަދަކަށް ވުރެ މަތި ވާން ޖެހެއެވެ.