ބޫތު ބަހައްޓާފައި ހުރިގޮތުން ވޯޓުގެ ސިއްރުކަން ކަށަވަރުކުރެވުނު، އިންޑިއާގެ އިންތިހާބުގައި ކުރެވިދާނެ ގިނަ ކަންކަން އެނގިގެންދިޔަ - ޝަހާބުއްދީން

އާދީއްތަ ދުވަހު ނިމިގެންދިޔަ ރައްޔިތުންގެ މަޖިލީހުގެ އިންތިހާބުގައި، ވޯޓު ކަރުދާހުގައި ފާހަގަޖަހަން ބަހައްޓާފައި ހުރި ބޫތު ބަހައްޓާފައި ހުރި ގޮތުން ވޯޓުގެ ސިއްރުކަން ކަށަވަރު ކުރެވުނު ކަމަށާއި، ވޯޓުލާ މީހުންނަށް ކަރުދާހުގެ ފޮޓޯ ނެގުމާއި ކަރުދާސް ބަދަލުކުރުމުގެ ފުރުސަތު ނުލިބޭ ކަމަށް އިންޑިއާގެ އިލެކްޝަންސް ކޮމިޝަނުގެ ކުރީގެ ޗީފް ޑރ ޝަހާބުއްދީން ޔައުޤޫބް ގުރައިޝީ ވިދާޅުވެއްޖެއެވެ.

އިންތިހާބު އޮބްޒާވްކުރަން އައި ބޭރުގެ އޮބްޒާވަރުންގެ ޓީމުގެ އިސްވެރިޔާ އަދި އިންޑިއާގެ އިލެކްޝަންސް ކޮމިޝަނުގެ ކުރީގެ ޗީފް ޑރ ޝަހާބުއްދީން ޔައުޤޫބް ގުރައިޝީ ވިދާޅުވީ އިންތިހާބުގެ މަސައްކަތްތައް ކުރިއަށްދިޔައީ ސުންގަޑިއަށް ކަމަށާއި، ވޯޓުލާ މަރުކަޒުތައް ގަޑިއަށް ހުޅުވިގެން ދިޔަ ކަމަށެވެ. މީގެ އިތުރުން ހުރިހާކަމެއްވެސް ދިޔައީ އޮންނަ އުސޫލުގެ ތެރެއިން ކަމަށާއި، ހުރިހާކަމެއް ވެސް ކުރިއަށް ގެންގޮސްފައިވަނީ ތަހުޒީބުކޮށް ކަމަށެވެ.

Advertisement

ޝަހާބުއްދީން ވިދާޅުވީ މަރުކަޒުގެ ތެރޭގައި ކަންކަން ހަމަޖެހިފައި ހުރިގޮތުން ހިތްހަމަޖެހުނު ކަމަށާއި، އެގޮތުން ގޮނޑިތައް އަތުރާފައި ހުރިގޮތާއި، ފަންކާ ހުރުން ފަދަ ކަންކަން ފާހަގަކުރެވުނު ކަމަށެވެ.

ޝަހާބުއްދީން ވިދާޅުވީ 90 އިންސައްތަ އޮފިޝަލުންނަކީ އަންހެނުން ކަމަށާއި، އެއީ އޮބްޒާވްކުރުމުގެ ތެރެއިން ފާހަގަކުރެވުނު މުހިންމު އެއްކަންތައް ކަމަށެވެ. މީގެ އިތުރުން ވޯޓު ގުނުމުގެ މަސައްކަތް ގަޑިއަށް ފެށުނު ކަމަށާއި، ހުރިހާކަމެއްވެސް ދިޔައީ އަމާންކަމާއެކު ކަމަށެވެ. އަދި އޮބްޒާވަރުންގެ ގޮތުގައި ތިބި ފަރާތްތަކުން ވެސް ދިނީ ޕޮޒިޓިވް ކޮމެންޓްތަކެއް ކަމަށެވެ.

އޭނާ ވަނީ ބޫތު ބަހައްޓާފައި ގޮތާއި އެކަންކޮށްފައިވާ ސަބަބު އެނގިވަޑައިގަތުމުން އެކަމަށްވެސް ތައުރީފް ކުރައްވާފައެވެ.

ޝަހާބުއްދީން ވަނީ އިންތިހާބުގެ އިންތިޒާމްތަކުގެ ތެރެއިން ހުރި ކުދި ކުދި ރަނގަޅު ކަންކަން ފާހަގަކޮށް އެކަމުގެ ސަބަބުން އިންތިހާބުގެ ކަންކަމަށް ލިބިފައިވާ ލުއިފަސޭހަތަކަށްވެސް ތައާރަފް ކުރައްވާފައެވެ. އެގޮތުން ވޯޓާސް ލިސްޓުގައި ޖިންސް ވަކިކުރަން ދެ ކުލައަކުން ހައިލައިޓް ކުރުމާއި، އޮންލައިން އަދި މެނުއަލްކޮށް ވޯޓުލާތަން ބެލޭނެ ގޮތް ހެދުން ފަދަ ކަންކަން ހިމެނެއެވެ.

އޭނާ ވިދާޅުވީ އިންތިހާބަށްފަހު ރިއަލްޓައިމްގައި ނަތީޖާތައް އިލެކްޝަނަށް ލިބެމުންދިޔަ ކަމަށާއީ، އެއީ ޝައުގުވެރިކަން ހުއްޓުނު އެއްކަންތައް ކަމަށެވެ. އަދި ޖުމްލަ ގޮތެއްގައި އިންތިހާބާއި ދޭތެރޭގައި ސުވާލު އުފައްދާނެ ޖާގައެއް ނެތް ކަމަށެވެ.