ޕީއެންއެފް އާއި ދަ ޑިމޮކްރެޓްސްއަށް އެއްވެސް ގޮނޑިއެއް ނުލިބުނު

ޕީޕަލްސް ނޭޝަނަލް ފްރޮންޓް (ޕީއެންއެފް) އާއި ދަ ޑިމޮކްރެޓްސްގެ ފަރާތުން ރައްޔިތުންގެ މަޖިލީހަށް ވާދަކުރި އެއްވެސް ކެންޑިޑޭޓަކަށް ގޮނޑި ކާމިޔާބު ނުކުރެވި ނާކާމިޔާބީއާއި ކުރިމަތިލާން ޖެހިއްޖެ އެވެ.

ޕީއެންއެފްގެ ފަރާތުން 35 ކެންޑިޑޭޓަކު އިންތިޚާބުގައި ވާދަ ކުރި އެވެ. ނަމަވެސް ޕީއެންއެފްގެ އެއްވެސް ކެންޑިޑޭޓަކަށް ގޮނޑި ކާމިޔާބު ކުރެވިފައިނުވެއެވެ.

ޕީއެންއެފްއަކީ ކުރީގެ ރައީސް އަބްދުﷲ ޔާމީން ޕީޕީއެމްއިން ވަކިވެ ވަޑައިގެން އުފެއްދެވި ސިޔާސީ ޕާޓީއެކެވެ.

މީގެ އިތުރުން ކުރީގެ ރައީސް މުހައްމަދު ނަޝީދު އިސްވެ ހުންނަވައި އުފެއްދެވި ސިޔާސީ ޕާޓީ ދަ ޑިމޮކްރެޓްސްގެ ފަރާތުން މަޖިލީހަށް ވާދަކުރި އެއްވެސް ކެންޑިޑޭޓަކަށް ގޮނޑި ކާމިޔާބު ކުރެވިފައިނުވެއެވެ.

19 ވަނަ މަޖިލީހުގައި ތިއްބެވި ހަތް މެންބަރުންނާއެކު ޑިމޮކްރެޓްސްގެ ފަރާތުން އިންތިޚާބުގައި ޖުމްލަ 39 ކެންޑިޑޭޓުން ވާދަ ކުރެއްވިއެވެ. މީގެ ތެރޭގައި ގިނަ ދުވަސްތަކެއް ވަންދެން ދާއިރާގެ ގޮނޑި ދަމަހައްޓަމުން އައި މެންބަރުން ވެސް ހިމެނިވަޑައިގަންނަވައެވެ.

ވަގުތީ ނަތީޖާ ދައްކާ ގޮތުން 20 ވަނަ ރައްޔިތުން މަޖިލީހު ސުޕަ މެޖޯރިޓީ ނަގާފައިވަނީ ޕީއެންސީނެވެ.